ឃាត់ខ្លួនជនសង្ស័យ ០៣នាក់ ពីបទ លួច(ទូរស័ព្ទ) និងប្រើប្រាស់សារធាតុញៀនដោយខុសច្បាប់

(បន្ទាយមានជ័យ) ៖ នៅវេលាម៉ោង ១២ និង ០០នាទី ថ្ងៃទី០៣ ខែតុលា ឆ្នាំ២០១៩ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង ចុះបង្ក្រាបបានករណី លួច(ទូរស័ព្ទ) និងប្រើប្រាស់សារធាតុញៀនដោយខុសច្បាប់ ។ លោកវរសេនីយ៍ត្រី នួន នីណារ៉ូ បានឲ្យដឹងថា ៖ យោងពាក្យបណ្តឹងរបស់ជនរងគ្រោះឈ្មោះ ប៉ុក នៅ ភេទ ប្រុស អាយុ ៥១ឆ្នាំ ជនជាតិខ្មែរ បច្ចុប្បន្នរស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត បានបញ្ជាក់ថា ៖ នៅយប់ថ្ងៃទី០២ ខែតុលា ឆ្នាំ២០១៩ កូនរបស់ខ្លួនបានទុកទូរស័ព្ទ ០១គ្រឿង ក្នុងកាបូបពណ៌ខ្មៅ ហើយព្យួរនិងជញ្ជាំងផ្ទះ ហើយក៏ដេកលក់ទៅ លុះព្រឹកឡើងក៏បាត់ទូរស័ព្ទពីកាបូបរកមិនឃើញ ។ លោកវរសេនីយ៍ត្រី នួន នីណារ៉ូ បានបន្តថា ៖ ក្រោយទទួលបានពាក្យបណ្តឹង កម្លាំងជំនាញកងរាជអាវុធហត្ថបានចុះធ្វើការស៊ើបអង្កេត និងកំណត់បានមុខសញ្ញាជនសង្ស័យ ធ្វើការកោះហៅជនសង្ស័យមកសាកសួរ និងឃាត់ខ្លួនតែម្តងក្រោយពីការសាកសួររួច ចំនួន ០៣នាក់ រួមមាន៖ ១-ឈ្មោះ អឿន បូ ភេទប្រុស អាយុ ១៤ឆ្នាំ ជនជាតិខ្មែរ បច្ចុប្បន្នរស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ២-ឈ្មោះ អឿន បឿក ភេទប្រុស អាយុ ១៨ឆ្នាំ ជនជាតិខ្មែរ បច្ចុប្បន្នរស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ៣-ឈ្មោះ ជឹម សីហា ភេទប្រុស អាយុ ១៩ឆ្នាំ ជនជាតិខ្មែរ បច្ចុប្បន្នរស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ។ ក្រោយពីសមត្ថកិច្ចជំនាញក្រុង ធ្វើការសាកសួររួច បានកសាងសំណុំរឿងបញ្ជូនមកទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្ត ។
លោកវរសេនីយ៍ត្រី គុណ ណាវ នាយការិយាល័យបទល្មើសប្រហ្មទណ្ឌ នៃមន្ទីរយុត្តិធម៌ កងរាជអាវុធហត្ថខេត្តបន្ទាយមានជ័យ បានឲ្យដឹងថា ៖ ក្រោយពីកម្លាំងជំនាញធ្វើការសាកសួរ ជនសង្ស័យបានសារភាពថា ៖ ឈ្មោះ អឿន បូ ជាអ្នកចូលទៅលួច ចំណែកខ្លួនទាំង ០២នាក់ ជាអ្នកយកទូរស័ព្ទទៅដាក់បញ្ចាំបន្តដើម្បីយកប្រាក់ទៅទិញគ្រឿងញៀនសម្រាប់ប្រើប្រាស់ ។ បច្ចុប្បន្នជនសង្ស័យត្រូវបានកម្លាំងជំនាញ កសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី ៕