ឃើញគេកំពុងផឹកស៊ី បុរសម្នាក់ដើរចូលទៅផឹកដែរ ដោយគេមិនហៅ ហើយកើតជម្លោះ ទាញកាំបិតបុ័ងតោកាប់ឲ្យរបួស
រាជធានីភ្នំពេញ៖ នគរបាលខណ្ឌមានជ័យឃាត់ខ្លួនជនសង្ស័យម្នាក់ ករណីអំពើហិង្សាដោយចេតនា មានស្ថានទម្ងន់ទោស យកកាំបិតបុ័ងតោកាប់បណ្តាលឲ្យរបួសរបួស២នាក់ ពេលកំពុងអង្គុយផឹកស៊ី។
នគរបាលខណ្ឌមានជ័យ បានឲ្យដឹងថា ករណីនេះកើតឡើងក្នុងពេលជនរងគ្រោះជួបជុំគ្នាផឹកស៊ីជាមួយមិត្តភក្តិ ពេលនោះជនសង្ស័យបានដើរមកម្នាក់ឯង ចូលទៅផឹកស៊ីជាមួយក្រុមជនរងគ្រោះ (ដោយខ្លួនឯងដោយមិនមានគេហៅ) ក្នុងពេលកំពុងអង្គុយផឹកស៊ីនោះ ជនរងគ្រោះទាំង២នាក់ បាននិយាយគ្នាសើចលេង ស្រាប់តែជនសង្ស័យបានខឹង (ដោយគិតថាជនរងគ្រោះនិយាយដើមខ្លួន) ភ្លាមនោះជនសង្ស័យបានស្ទុះទៅយកកាំបិទបុ័ងតោចំនួន ១ ដើម ដែលនៅក្បែរនោះ កាប់ទៅលើជនរងគ្រោះទាំងពីនាក់បណ្ដាលឲ្យធ្ងន់ កាលពីវេលាម៉ោង១និង២០នាទីរំលងអធ្រាត្រ ថ្ងៃទី២៣ ខែមករា ឆ្នាំ២០២០ ស្ថិតនៅចំណុចផ្ទះជួល ផ្លូវលេខ២៧១ ភូមិ៥ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
មន្ត្រីនគរបាលខណ្ឌមានជ័យ បានឲ្យដឹងថា៖ ជនសង្ស័យឈ្មោះ ស៊ុក សារ៉ាត់ ភេទ ប្រុស អាយុ ៣៤ឆ្នាំ ជនជាតិខ្មែរ ទីលំនៅ និងមុខរបរមិនពិតប្រាកដ មានផ្ទុកសារធាតុញៀន ។ រីឯជនរងគ្រោះទី១ឈ្មោះ ស៊ឹម ប៊ុនរ័ត្ន ហៅ ប៉ុង ភេទប្រុស អាយុ ២៥ឆ្នាំ ជនជាតិខ្មែរ ទីលំនៅផ្ទះលេខគ្មាន ផ្លូវលេខ២៧១ ភូមិ៥ សង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ មុខរបរនៅផ្ទះ (របួសកណ្តាលក្បាល ១កន្លែង កណ្តាលថ្ងាស ១កន្លែង និងកដៃខាងស្តាំ ១កន្លែង និងជនរងគ្រោះទី២ ឈ្មោះ រិទ្ធ បូរី ហៅ វ៉េវ ភេទប្រុស អាយុ២២ឆ្នាំ ជនជាតិខ្មែរ ទីលំនៅផ្ទះលេខ២៩៦Z ផ្លូវលេខ២៧១ ភូមិ៥ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ មុខរបរនៅផ្ទះ របួសកំប៉េះគូទ ១កន្លែង ចង្កេះខាងស្តាំ ១កន្លែង ស្មាខាងស្តាំ ១កន្លែង និងចិញ្ចើមខាងស្តាំ ១កន្លែង ។
បច្ចុប្បន្នជនសង្ស័យឈ្មោះ ស៊ុក សារ៉ាត់ ឃាត់ខ្លួននៅអធិការដ្ឋាន នគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី ៕
