អ្នកនាំពាក្យរដ្ឋបាលរាជធានី បញ្ជាក់ថា៖ អ្នកដែលដួលសន្លប់នៅក្នុងមន្ទីរពេទ្យររុស្ស៊ី ពុំមែនករណី Covid-19នោះទេ
ភ្នំពេញ៖ អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានបញ្ជាក់អោយដឹងថា ចំពោះករណីបុរសម្នាក់មានឈ្មោះ ដែន ផល្លី អាយុ៣៤ឆ្នាំ មកពីខេត្តបន្ទាយមានជ័យ ដែលបានមកសម្រាកព្យាបាលជម្ងឺនៅមន្ទីរពេទ្យរុស្ស៊ី ហើយកាលពីយប់ថ្ងៃទី០៦ខែមីនានេះ ដោយសារស្ថានភាពខ្សោយ ក៏បានដួលសន្លប់នៅក្នុងមន្ទីរពេទ្យរុស្ស៊ីនោះ គឺពុំមែនករណី Covid-19នោះទេ ននិងបានសូមបងប្អូនប្រជាពលរដ្ឋបញ្ឈប់ការចែកចាយព័ត៌មានមិនពិតនេះ ដើម្បីកុំអោយសាធារណៈជនមានការភាន់ច្រលំ និងភ័យខ្លាច។
លោកម៉េត មាសភក្តី បានអោយដឹងទៀតថា បុរសដែលដួលសន្លប់នោះ ដោយសារគាត់ មានអាការៈសុខភាពចុះខ្សោយ ជាតិស្កទាប ដែលធ្វើអោយគាត់ដួលសន្លប់ភា្លមៗ ប៉ុន្តែពុំមែនករណីឆ្លងកូវីដ១៩នោះឡើយ។ ដូច្នេះសូមបងប្អូនប្រជាពលរដ្ឋកុំមានការយល់ច្រលំ។
លោកបន្តថា ក្រោយពេលដួលសន្លប់ហើយ បុរសម្នាក់នោះមានសុខភាពល្អធម្មតា អាចនិយាយទូរស័ព្ទបាន ហើយគាត់ក៏បានសូមអោយអ្នកលេងបណ្តាញសង្គមទាំងឡាយ បញ្ឈប់ការយករូបរបស់លោកដែលដួលសន្លប់នោះទៅបង្ហោះខុសពីការពិត ដែលនាំអោយប៉ៈពាល់និងសេចក្តីថ្លៃថ្នូររបស់គាត់(លោក ដែន ផល្លី )។
លោកម៉េត មាសភក្តី ក៏បានអំពាវនាវដល់ប្រជាពលរដ្ឋ សូមបញ្ឈប់ការចែករំលែកព័ត៌មានក្លែងក្លាយ ហើយត្រូវចេះផ្ទៀងផ្ទាត់ប្រភពព័ត៌មានឲ្យបានច្បាស់លាស់ ជាមុនសិនមុននឹងទទួលយកព័ត៌មានមកចែកចាយបន្ត។ បន្ថែមពីនេះទៀត សូមប្រជាពលរដ្ឋកុំមានការភ័យខ្លាចជ្រួលច្របល់ ហើយត្រូវធ្វើអនាម័យការពារខ្លួនអោយបានជាប់ជាប្រចាំតាមការណែនាំរបស់ក្រសួងសុខាភិបាល ដើម្បីថែរក្សាសុខភាពទប់ស្កាត់កុំអោយវីរ៉ុសខូវីដ១៩នេះ៕