កូវីដ-១៩ សម្តេចតេជោ ស្នើបងប្អូនប្រជាពលរដ្ឋ ចូលរួមទាំងអស់គ្នា ដើម្បីទប់ស្កាត់កុំឲ្យជំងឺនេះ កុំឲ្យឆ្លងកើតមាននៅក្នុងប្រទេស
ភ្នំពេញ៖ សម្តេចតេជោ បានស្នើដល់បងប្អូនជនរួមជាតិ ចូលរួមទប់ស្កាត់ព័ត៌មាន មិនពិត ដោយជនខិលខូចមួយចំនួន ក្នុងបណ្តាញសង្គម ដែលមានចេតនាអក្រក់ បង្ខូចបំពុលសង្គមជាតិ។ ហើយទិសដៅចម្បងកម្ពុជាពេលនេះ គឺចូលរួមជាមួយសហគមអន្តរជាតិ ប្រយុទ្ធប្រឆាំងនឹងជំងឺឆ្លងកូវីដ-១៩ ដូច្នេះសូមបងប្អូនប្រជាពលរដ្ឋ ចូលរួមទាំងអស់គ្នា ដើម្បីទប់ស្កាត់កុំឲ្យជំងឺនេះ ឆ្លងកើតមាននៅក្នុងប្រទេសយើង ដោយការធ្វើការថែរក្សា និងសម្អាតអនាម័យ ដើម្បីសុខភាពផ្ទាល់ខ្លួន នឹងសម្រាប់ក្រុមគ្រួសារ ។
នៅថ្ងៃទី៧ខែមីនានេះ ផេកហ្វេសប៊ុក Samdech Hun Sen, Cambodian Prime Minister បានផ្សាយព័ត៌មានថា សុខសប្បាយជាទេបងប្អូនជនរួមជាតិ?។
សម្តេចតេជោ ហ៊ុនសែន បានថ្លែងថា “ខ្ញុំពិតជារីករាយប្រកបដោយជំនឿទុកចិត្ត ចំពោះបងប្អូនប្រជាពលរដ្ឋយើង ដែលមានការយល់ដឹងកាន់តែខ្ពស់ អំពីការថែរក្សា និងសម្អាតអនាម័យ ដើម្បីសុខភាពផ្ទាល់ខ្លួន នឹងសម្រាប់ក្រុមគ្រួសារ។ ទម្លាប់មានអនាម័យល្អ គឺនឹងធ្វើឲ្យសុខភាពកាន់តែល្អរឹងមាំ”។
ដូចបងប្អូនជនរួមជាតិបានដឹងទាំងអស់គ្នាដឹងហើយថា ទិសដៅចម្បងកម្ពុជាពេលនេះ គឺចូលរួមជាមួយសហគមអន្តរជាតិ ប្រយុទ្ធប្រឆាំងនឹងជំងឺឆ្លងកូវីដ-១៩ (កូរ៉ូណា)។ ដូច្នេះសូមបងប្អូនប្រជាពលរដ្ឋ ចូលរួមទាំងអស់គ្នា ដើម្បីទប់ស្កាត់កុំឲ្យជំងឺនេះ ឆ្លងកើតមាននៅក្នុងប្រទេសយើង។ ក្នុងករណីមានការចាំបាច់ណាមួយ ក្រសួងសុខាភិបាល នឹងជម្រាបជូនព័ត៌មានជាសាធារណៈ ដល់បងប្អូនមិនខាន។
អរគុណបងប្អូនជនរួមជាតិ និងក្មួយៗយុវជន ដែលចូលរួមទប់ស្កាត់ព័ត៌មាន មិនពិត ដោយជនខិលខូចមួយចំនួន ក្នុងបណ្តាញសង្គម ដែលមានចេតនាអក្រក់ បង្ខូចបំពុលសង្គមជាតិយើង។ សូមជូនពរបងប្អូនជនរួមជាតិ បានសប្បាយរីករាយ ក្នុងថ្ងៃឈប់សម្រាកចុងសប្តាហ៍៕
