ចូលរួមអប់រំ ផ្សព្វផ្សាយ ពីសុខភាពអនាម័យ និងវិធីការពារទប់ស្កាត់ជំងឺឆ្លង Covid-19 ដល់ប្រជាពលរដ្ឋតាមសហគម
ក្រោយពីសេចក្តីប្រកាសរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាកាលពីថ្ងៃទី ៤ មីនា ឆ្នាំ២០២០ កន្លងទៅនេះ ដែលបញ្ជាក់ច្បាស់ថា រាជរដ្ឋាភិបាលកម្ពុជា បានសម្រេចទិសដៅចម្បងនៅពេលនេះគឺ “ប្រយុទ្ធប្រឆាំង និងទប់ស្កាត់ជំងឺឆ្លងកូវីដ-១៩” គឺមានមន្រ្តីរាជរដ្ឋាភិបាលជាច្រើនរូប បានចុះអប់រំផ្សព្វផ្សាយអំពីវិធានការការពារឬទប់ស្កាត់ ព្រមទាំងបានជួយពិនិត្យ ពិគ្រោះ និងព្យាបាលជំងឺផ្សេងៗ ជូនបងប្អូនប្រជាពលរដ្ឋដោយឥតគិតថ្លៃទៀតផង។ នេះបើតាមការផ្សាយលើផេកហ្វេសប៊ុក Samdech Hun Sen, Cambodian Prime Minister នៅថ្ងៃទី៧ខែមីនានេះ។
តាមប្រសាសន៍ណែនាំដ៏ខ្ពង់ខ្ពស់របស់ សម្តេចតេជោនាយករដ្ឋមន្រ្តី ដែលបានជម្រាបជូនបងប្អូន ប្រជាពលរដ្ឋជាច្រើនលើក មកហើយ គឺសូមបងប្អូនកុំមានការភ័យខ្លាចជ្រុលពេក ដែលអាចនឹងបង្កើតឲ្យមានកំហឹង ស្អប់គុំគួន និងអំពើរើសអើងជាតិសាសន៍មិនខាន។ ភាពភ័យខ្លាចហួសហេតុនេះ គឺអាចនឹងធ្វើឱ្យមនុស្សមួយចំនួន បាត់បង់នូវភាពម្ចាស់ការ បាត់បង់គុណធម៌ និងបាត់បង់ជំនឿទុកចិត្តលើខ្លួនឯង ហើយ ស្លន់ស្លោ ដោយសារតែចាញ់កល់ការបំភិតបំភ័យ បំភ្លៃព័ត៌មាន និងការបន្លាចរបស់ក្រុមជនអគតិមួយចំនួន ដែលនឹងធ្វើឲ្យបាត់បង់សេចក្តីសុខ ក្នុងការរស់នៅក្រុមគ្រួសារ មិត្តភក្តិ និងក្នុងសហគម។
បើតាមសម្តេចតេជោ នាយករដ្ឋមន្រ្តី អរគុណអស់លោក លោកស្រី មន្រ្តីតំណាងរាស្រ្ត មន្រ្តីរាជការ មន្រ្តីគណបក្សប្រជាជន ក្រុមគ្រូពេទ្យ និងក្រុមអ្នកស្ម័គ្រចិត្ត អង្គការដៃគូ ម្ចាស់មូលនិធិ និងម្ចាស់ក្រុមហ៊ុននានា ដែលបានចូលរួមអប់រំហ្វឹកហ្វឺន ផ្សព្វផ្សាយបានទូលំទូលាយ ឲ្យបងប្អូនប្រជាពលរដ្ឋ នៅតាមសហគមបានយល់ដឹងកាន់តែច្បាស់ ពីអនាម័យសុខភាព ជាពិសេសអំពីវិធានការផ្សេងៗ ក្នុងការទប់ស្កាត់មិនឲ្យមានរោគកូវីដ-១៩ ឆ្លងចូលនៅតាមសហគមនានាទូទាំងប្រទេស។
ទន្ទឹមនឹងនេះ សូមអរគុណបងប្អូនប្រជាពលរដ្ឋ ដែលបានចូលរួមពង្រឹងអនាម័យសុខភាព នៅតាមសហគម និងបានចូលរួមទប់ស្កាត់ជំងឺឆ្លងនានារួមទាំងជំងឺឆ្លងកូវីដ- ១៩ ផងដែរ៕
