សម្ដេចតេជោ ប្រកាសបិទសាលារៀនទាំងអស់ នៅទីរួមខេត្តសៀមរាប និងលុបកម្មវិធីអង្គរសង្រ្កាន
ភ្នំពេញ៖ បន្ទាប់ពីយកកំហាកមនុស្សទាំងបួននាក់ ដែលស្និទ្ធនឹងជនជាតិជប៉ុន ធ្វើតេស្តរកមេរោគជំងឺកូវីដ-19 មក ជាលទ្ធផលមានតែបុរសម្នាក់អាយុ 38 ឆ្នាំម្នាក់ប៉ុណ្ណោះ ដែលរកឃើញថាមានមេរោគ។ តែទោះយ៉ាងណាអ្នកទាំងបួន មិនទាន់មានចេញជារោគសញ្ញាអ្វីនោះទេ ហើយពួកគេកំពុងស្ថិតនៅទីកន្លែងដាច់ដោយឡែក និងត្រូវដាក់បន្តតាមដានសុខភាពតទៅទៀត។
នាយកដ្ឋានប្រយុទ្ធនឹងជំងឺឆ្លង CDC ក៏បានប្រកាសព័ត៌មានថា រហូតដល់ម៉ោង ៨យប់ ថ្ងៃទី ៧ មីនា ២០២០ យើងបានរកឃើញករណីថ្មីមួយទៀត ដែលគាត់ជាជនជាតិខ្មែរ ភេទប្រុស អាយុ ៣៨ឆ្នាំ ដែលគាត់បានប៉ះពាល់ផ្ទាល់ ជាមួយអ្នកជំងឺជនជាតិជប៉ុនមានវិជ្ជមាន COVID-19 ហើយ៣នាក់ផ្សេងទៀត ដែលប៉ះពាល់ផ្ទាល់ដែរ មិនបានរកឃើញវិជ្ជមាន COVID-19 ទេ ។ ដូច្នេះយើងមាន២ករណីហើយ ក្នុងប្រទេសយើង ដែលយើងរកឃើញករណីមុន ដែលគាត់ជាជនជាតិចិន ហើយគាត់បានព្យាបាលជាសះស្បើយ ដោយគ្រូពេទ្យនៅក្រុងព្រះសីហនុ និងបានវិលត្រឡប់ទៅប្រទេសចិនវិញ នៅថ្ងៃទី ១០ កុម្ភ: ២០២០ ។ រហូតពេលនេះ បុរសអាយុ៣៨ឆ្នាំ មានសុខភាពល្អ និងមិនមានរោគសញ្ញានោះទេ ។ ដោយឡែកអ្នកប៉ះពាល់ផ្ទាល់ ៤នាក់ ទៀត និង ៤០នាក់ប៉ះពាល់ប្រយោល ជាមួយអ្នកជំងឺជនជាតិជប៉ុន ដែលតម្រូវឱ្យគាត់នៅដោយឡែកពីគេចំនួន ១៤ថ្ងៃ និងតាមដានសុខភាពនោះ រហូតពេលនេះពួកគាត់ពុំទាន់មានរោគសញ្ញានៅឡើយទេ តែយើងក៏តម្រូវយកវត្ថុវិភាគទាំងអស់មកពិនិត្យ ។ យើងនៅតែបន្តធ្វើការងារខាងលើនេះ ដោយសហការយ៉ាងជិតស្និទ្ធជាមួយអាជ្ញាធរដែនដី មន្រ្តីអង្គការសុខភាពពិភពលោក WHO មជ្ឈមណ្ឌលប្រយុទ្ធនឹងជំងឺឆ្លងសហរដ្ឋអាមេរិក USCDC និងវិទ្យាស្ថានប៉ាស្ទ័រកម្ពុជា IPC ។
ព័ត៌មានបន្ថែមសូមទាក់ទងលេខ ១១៥។
ក្នុងសន្និសីទសារព័ត៌មានមួយ នៅក្នុងទីស្តីការក្រសួងសុខាភិបាល នាព្រលប់ថ្ងៃទី៧ ខែមីនា ឆ្នាំ២០២០នេះ ដើម្បីប្រកាសអំពីវត្តមានជំងឺកូវីដ១៩ នៅលើបុរសជនជាតិខ្មែរម្នាក់អាយុ៣៨ឆ្នាំ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល បានថ្លែងថា ក្រុមគ្រូពេទ្យរបស់យើងមានជំនឿ ក្នុងព្យាបាលបុរសម្នាក់ជនជាតិខ្មែរ អាយុ៣៨ឆ្នាំ ផ្ទុកមេរោគ Covid-19 ឲ្យជាសះស្បើយ ក្រោយពីបទពិសោធន៍ព្យាបាលបុរសជនជាតិចិននាលពេលកន្លងមក។
នៅយប់ថ្ងៃទី៧ ខែមីនា ឆ្នាំ២០២០ ក្រសួងសុខាភិបាលចេញសេចក្តីព័ត៌មានប្រកាសផ្លូវការ អំពី ករណីរកឃើញបុរសជនជាតិខ្មែរម្នាក់ អាយុ៣៨ឆ្នាំ មានផ្ទុកមេរោគ Covid-19 នៅខេត្តសៀមរាប។
សេចក្តីប្រកាសព័ត៌មានបានបញ្ជាក់ថា នៅវេលាម៉ោង១២និង៥០នាទី ថ្ងៃទី៧ ខែមីនា ឆ្នាំ២០២០នេះ ក្រសួងសុខាភិបាលទទួល បានលទ្ធផលពីវិទ្យាស្ថានប៉ាស្ទ័រកម្ពុជាថា បុរសម្នាក់អាយុ៣៨ឆ្នាំ ដែលជាអ្នកប៉ះពាល់ផ្ទាល់ ជាមួយបុរសជនជាតិជប៉ុន អាយុជាង៤០ឆ្នាំ មានវីរុសកូវីដ១៩នោះ មានលទ្ធផលវិជ្ជមានវីរុសកូវីដ១៩៕
