បើករថយន្តគេចពីរម៉កកង់បី ជ្រុលចង្កូតទៅ បុករបាំងថ្មពុះចែកទ្រូងផ្លូវ ក្រឡាប់ផ្ងារជើង
ភ្នំពេញ: បុរសម្នាក់បានបើករថយន្ត Lexus RX400 មួយគ្រឿងក្នុងល្បឿនលឿនបានគេចពីរម៉កកង់បីមួយគ្រឿងដែលកំពុងឆ្លងផ្លូវ ក៏ជ្រុលចង្កូតទៅបុករបាំងថ្មពុះចែកទ្រូងផ្លូវបណ្ដោយក្រឡាប់រថយន្ត។
ហេតុការណ៍នេះកើតឡើងកាលពីវេលាម៉ោង ១១និង ៣០ នាទីយប់ថ្ងៃទី 16 ខែកក្កដាឆ្នាំ 2020 ចំណុច ផ្លូវលេខ 271 ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
តាមប្រភពព័ត៌មានពីប្រជាពលរដ្ឋបានប្រាប់ឱ្យដឹងថា នៅមុនពេលកើតហេតុគេបានឃើញបុរសម្នាក់បានបើករថយន្តមួយគ្រឿងម៉ាក Lexus RX400h ពណ៌ទឹកប្រាក់ ពាក់ស្លាកលេខ ភ្នំពេញ 2AK-9165 ធ្វើដំណើរតាមបណ្ដោយផ្លូវលេខ 271 ទិសដៅពីត្បូងទៅជើង ក្នុងល្បឿនលឿនខណៈពេលដែលមកដល់ចំណុចកើតហេតុ ក៏ស្រាប់តែមានកង់បីឥណ្ឌាមួយគ្រឿង ធ្វើដំណើតាមបណ្តោយផ្លូវលេខ ៥០៦ ទិសដៅពីលិច ទៅកើត ដោយបានឆ្លងផ្លូវលេខ២៧១ ខ្វះការប្រុងប្រយ័ត្ននោះដែលហេតុធ្វើឲ្យរថយន្ត ចាប់ហ្វ្រាំងបួងចង្កូតគេច ក៏ជ្រុលទៅបុករបាំងថ្មពុះចែកទ្រូងផ្លូវចំនួន 2 កង់បណ្ដាលឲ្យដួលនិងបណ្ដាលឲ្យរថយន្តក្រឡាប់ផ្ងារជើងតែម្ដង ។ ភ្លាមនោះម្ចាស់កង់បីក៏បានបន្ថែមល្បឿនរត់គេចខ្លួនបាត់ពីកន្លែងកើតហេតុបន្សល់ទុកតែរថយន្តក្រឡាប់តែប៉ុណ្ណោះ។
ក្រោយពេលកើតហេតុកម្លាំងសមត្ថកិច្ចមូលដ្ឋានបានចុះមកដល់ទីតាំងកើតហេតុនិងបានធ្វើការទំនាក់ទំនងទៅកម្លាំងសមត្ថកិច្ចជំនាញចរាចរណ៍ក្រុងឱ្យចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញដើម្បីធ្វើការដោះស្រាយនៅពេលក្រោយ។
