រថយន្តមួយគ្រឿង បើកបុកម៉ូតូបណ្តាលឲ្យស្ត្រីម្នាក់ស្លាប់ ហើយបើករត់គេចបាត់
ភ្នំពេញ៖ស្ត្រីម្នាក់បានបាត់បង់ជីវិតបន្ទាប់ពីជួយគ្រោះថ្នាក់ចរាចរណ៍ ត្រូវរថយន្តមិនចាំម៉ាកបុកពីក្រោយពេញទំហឹងរួចកិនពីលើបណ្តាលឲ្យស្លាប់ភ្លាមៗនៅកន្លែងកើតហេតុ។
ហេតុការណ៍នេះដែរកើតឡើងនៅវេលាម៉ោង ៤និង៣០ នាទីរសៀលថ្ងៃចន្ទទី២ ខែវិច្ឆិកាឆ្នាំ ២០២០ ស្តិតនៅតាមបណ្តោយផ្លូវជាតិលេខ៤ សង្កាត់ កំបូលខណ្ឌកំបូល រាជធានីភ្នំពេញ។
ប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុគេបានឃើញស្ត្រីជនរងគ្រោះជិះម៉ូតូម៉ាក ប៊ិត មួយគ្រឿង ដែលពាក់ផ្លាកលេខ តាកែវ 1V 3095 ធ្វើដំណើរក្នុងទិសដៅពីជើងមកត្បូង មកដល់ចំណុចកើតហេតុ ត្រូវបានរថយន្តមួយគ្រឿងមិនចាំម៉ាក បើកក្នុងល្បឿនលឿនមកបុកពីក្រោយពេញទំហឹងរួចកិនពីលើបណ្តាលឲ្យស្លាប់នៅនិងកន្លែងកើតហេតុភ្លាមៗ ។ ចំណែកឯម្ចាស់រថយន្តក៏បើករត់គេចខ្លួនបាត់ស្រមោល ។
សពជនរងគ្រោះ ឈ្មោះ សុខហេង ភេទស្រី អាយុ ២៩ ឆ្នាំ មានស្រុកកំណើត នៅខេត្តតាកែវ។
ក្រោយពេលកើតហេតុ សមត្ថកិច្ចមូលដ្ឋានសហការជាមួយជំនាញ ចុះមកដល់រួចក៏ទាក់ទងទៅខាងជំនាញចរាចរណ៍ក្រុង ឲ្យចុះមកវាស់វែងយកម៉ូតូទៅរក្សាទុក និងធ្វើកំណត់ហេតុប្រគល់សពជូនក្រុមគ្រួសារធ្វើបុណ្យតាមប្រពៃណី។ ចំណែកឯជនបង្ក សមត្ថកិច្ចតាមស្រាវជ្រាវបន្ត ដើម្បីយកមកចាត់ការទៅតាមផ្លូវច្បាប់៕
