គ.ជ.ប ប្រកាសលទ្ធផលសវនាការ ពាក់ព័ន្ធនឹងការជំនុំជម្រះលើ អ្នកដឹកនាំធ្វើយុទ្ធនាការម្រាមដៃស្អាត ៥នាក់ នៅខេត្តបាត់ដំបង
ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសលទ្ធផល នៃសវនាការរបស់ខ្លួន ពាក់ព័ន្ធនឹងការជំនុំជម្រះលើ អ្នកដឹកនាំធ្វើយុទ្ធនាការម្រាមដៃស្អាត ៥នាក់ នៅខេត្តបាត់ដំបង។
កាលពីព្រឹក ថ្ងៃទី៨ ខែសីហា ឆ្នាំ២០១៨ គណៈកម្មាធិការជាតិរៀបចំការបោះឆ្នោត (គ.ជ.ប) បានបើកសវនការជំនុំជម្រះលើសំណុំរឿងលេខ០០១ ដែលពាក់ព័ន្ធនឹងយុទ្ធនាការម្រាមដៃស្អាត នៅខេត្តបាត់ដំបង ហើយនៅម៉ោង៣ រសៀលនេះ ជំនុំជម្រះបានសម្រេចតម្កល់សេចក្តីសម្រេចរបស់គណៈកម្មការរៀបចំការបោះឆ្នោតខេត្តបាត់ដំបង ទុកជាបានការដដែល តែមានការកែប្រែខ្លះ គឺ២នាក់ សម្រេចពិន័យ៥លានរៀល ហើយ២នាក់ បានរួចខ្លួន និងបើកឲ្យមានការប្តឹងជំទាស់តាមកំណត់ច្បាប់។ បុគ្គលទាំង៥រូប ដែលរងនូវការប្តឹងនេះរួមមានឈ្មោះ ជា ជីវ, ថោង សារឿន, ម៉ាង ឈុន, ពៅ តាំង និង គ្រុយ គឹមសាំង។ បុគ្គលទាំង៥នាក់ ត្រូវបានគណៈកម្មការបោះឆ្នោតខេត្តបាត់ដំបង សម្រេចពិន័យក្នុងម្នាក់ៗ១០លានរៀល ប៉ុន្តែអ្នកទាំង៥ មិនទទួលយក ហើយបានប្តឹងបន្តមក គ.ជ.ប។
ការបើកសវនាការនេះ ធ្វើឡើងបន្ទាប់ពីភាគីចុងចម្លើយបានប្តឹងបន្តមក គ.ជ.ប ជំទាស់នឹងសេចក្តីសម្រេចលេខ០០១ ចុះថ្ងៃទី២៦ ខែកក្កដា ឆ្នាំ២០១៨ របស់គ.ខ.បខេត្តបាត់ដំបង។
លោក ឌឹម សុវណ្ណារុំ បានបញ្ជាក់ថា ក្នុងករណីសេចក្តីសម្រេចដោយគ.ជ.ប ពេលនេះ ភាគីពាក់ព័ន្ធនៅតែមិនអស់ចិត្ត ពួកគាត់ក៏អាចប្តឹងដើម្បីឱ្យមានការដោះស្រាយចុងក្រោយ នៅក្រុមប្រឹក្សាធម្មនុញ្ញផងដែរ។
សូមបញ្ជាក់ថា បន្ទាប់ពីបើកសវនាការអស់រយៈពេលមួយព្រឹកនៅថ្ងៃទី២៦ ខែកក្កដា ឆ្នាំ២០១៨នេះ គណៈកម្មាធិការជាតិរៀបចំការបោះឆ្នោត គ.ជ.ប ខេត្តបាត់ដំបង បានសម្រេចធ្វើការផាកពិន័យ ជាទឹកប្រាក់ចំពោះសមាជិកអតីតគណបក្សប្រឆាំង ចំនួន៥នាក់ខាងលើនេះ ក្នុងម្នាក់ៗចំនួន១០លានរៀល ពាក់ព័ន្ធការធ្វើយុទ្ធនាការម្រាមដៃស្អាត ដែលបំផុសបំផុសដោយ លោក សម រង្ស៊ី មេចលនាសង្រ្គោះជាតិ។
សូមបញ្ជាក់ថា សវនាការនេះ បានធ្វើឡើងនៅសាលប្រជុំ គ.ជ.ប ហើយក្រុមប្រឹក្សាជំនុំជម្រះរួមមាន ទី១ លោក ស៊ិក ប៊ុនហុក ប្រធាន ទី២ លោក នុត សុខុម ជាសមាជិក ទី៣, លោក មាន សទិ ជាសមាជិក ទី៤ លោក ឌឹម សុវណ្ណារុំ ជាសមាជិក ទី៥ លោក ឌុច សុន ជាសមាជិក ទី៦ លោក ហ៊ីង ធីប្ញទ្ធិ ជាសមាជិក ទី៧ លោក ឯម សូផាត ជាសមាជិក ទី៨ លោក ហ៊ែល សារ៉ាត់ ជាសមាជិក និងទី៩ លោក ហង្ស ពុទ្ធា ជាសមាជិក។ ក្នុងនោះមានការចូលរួមពីមេធាវីតំណាងដើមបណ្តឹង និងមេធាវីតំណាងចុងចម្លើយផងដែរ៕
