តើអាចមានការខកចិត្តពីមន្ត្រីចាស់ទេក្នុងការតែងតាំងបុត្ររបស់ព្រះអង្គ១រូប ជាប្រធានស្តីទីរបស់គណបក្សរាជានិយមហ្វ៊ុនស៊ិនប៉ិច?
ភ្នំពេញ៖ សម្តេចក្រុមព្រះនរោត្តម រណរទ្ធិ ព្រះប្រធានគណបក្សហ្វ៊ុនស៊ិនប៉ិច ដែលកំពុងសម្រាកព្យាបាលសុខភាព នៅក្រៅប្រទេស ថ្មីៗនេះបានសេចក្តីសម្រេចមួយ តែងតាំងបុត្ររបស់ព្រះអង្គ១រូប ជាប្រធានស្តីទីរបស់គណបក្សរាជានិយមហ្វ៊ុនស៊ិនប៉ិច នៅថ្ងៃទី១១ ខែសីហា ឆ្នាំ២០១៨។
ព្រះរាជបុត្រខាងលនេះព្រះនាមព្រះអង្គម្ចាស់ នរោត្តម ចក្រាវុឌ្ឍ គឺជាព្រះរាជបុត្រច្បងរបស់ សម្តេចក្រុមព្រះនរោត្តម រណឫទ្ធិ ជាមួយម្ចាស់ក្សត្រិយ៍ម៉ារី រណឫទ្ធិ ដែលត្រូវបានសម្តេចក្រុមព្រះ សម្រេចឱ្យធ្វើជាប្រធានស្តីទី នៃគណបក្សហ្វ៊ុនស៊ិនប៉ិច កាលពីថ្ងៃទី០៨ ខែសីហា ឆ្នាំ២០១៨។ក្រៅពីការតែងតាំងព្រះអង្គម្ចាស់ នរោត្តម ចក្រាវុឌ្ឍ ជាប្រធានស្តីទី សម្តេចក្រុមព្រះក៏តែងតាំង អគ្គលេខាធិការរងម្នាក់ ដែលកាន់កាប់ហិរញ្ញវត្ថុបក្ស គឺលោក ពេជ្រ សូដេថ្ថា ឱ្យធ្វើជាអគ្គលេខាធិការគណបក្សហ្វ៊ុនស៊ិនប៉ិចផងដែរ។
ពាក់ព័ន្ធការតែងតាំងនេះនៅថ្ងៃទី៨ ខែសីហានេះគណបក្សហ្វ៊ុនស៊ិនប៉ិច បានទទួលសេចក្តីសម្រេចនេះហើយ ហើយថ្នាក់ដឹកនាំទាំងអស់នឹងដង្ហែតាមព្រះរាជតម្រិះរបស់សម្តេចប្រធានគណបក្ស។ទោះបីជាយ៉ាងណាក៏មានមន្ត្រីចាស់ៗមួយចំនួនក៏មានការខកចិត្តផងដែរ។
គួរបញ្ជាក់ថា៖សម្តេចក្រុមព្រះនរោត្តម រណឫទ្ធិ បានរងរបួសយ៉ាងដំណំក្នុងករណីគ្រោះថ្នាក់ចរាចរណ៍ដ៏រន្ធត់មួយ ដែលបណ្តាលមកពីរថយន្តតាក់ស៊ី ជែងរថយន្តផ្សេងទៀត ហើយជ្រុលមកបុកក្បួនព្រះទីនាំងរបស់ព្រះអង្គ នៅស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ គ្រោះថ្នាក់ចរាចរណ៍នេះបានបណ្តាលឱ្យអ្នកម្នាង អ៊ុក ផល្លា រណឫទ្ធិ ទទួលមរណភាព រួមទាំងអ្នករួមដំណើរមួយចំនួនទៀតរងរបួស។ ចំណែកសម្តេចក្រុមព្រះ ត្រូវបានបញ្ជូនទៅព្យាបាល នៅក្រៅប្រទេសរហូតមក។
វាសនាគណបក្សហ្វ៊ុនស៊ិនប៉ិចនៅតែមិនទាន់ច្បាស់លាស់ដដែលខណៈដែលគិតរហូតមកដល់ពេលនេះ ព្រះសុខភាពពិតប្រាកដរបស់សម្តេចក្រុមព្រះ ដែលមានព្រះជន្ម៧៤ព្រះវស្សា នៅមិនទាន់ដឹងច្បាស់នៅឡើយទេ ខណៈដែលមន្ត្រីគណបក្សហ្វ៊ុនស៊ិនប៉ិច បាននិយាយថា ព្រះសុខភាពរបស់ព្រះអង្គ មានភាពប្រសើរជាងមុនបន្តិចហើយ។
ប៉ុន្តែទោះជាយ៉ាងណា កាលពីមុនបោះឆ្នោត គណបក្សហ្វ៊ុនស៊ិនប៉ិច បានចេញសេចក្តីប្រកាសថា ព្រះអង្គនឹងយាងចូលរួមបោះឆ្នោតនៅកម្ពុជា ប៉ុន្តែជាក់ស្តែងព្រះអង្គមិនបានយាងមកបោះឆ្នោត តាមការប្រកាសទេ៕
