សូមអញ្ជើញមើលលទ្ធផល នៃការប្រកួតវ៉ូវីណាម ជើងឯកជាតិ
ភ្នំពេញ៖ឯកឧត្តមប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា និងលោក ស៊ូម សារឿន ប្រធានសហព័ន្ធកីឡាវ៉ូវីណាមកម្ពុជានារសៀលថ្ងៃទី២៩ ខែមករា ឆ្នាំ២០២១ បានអញ្ជើញចូលរួមពិធីបិទ និងប្រគល់មេដាយជូនកីឡាករ-កីឡាការិនីវ៉ូវីណាមនៃការប្រកួតកីឡាវ៉ូវីណាម ជ្រើសរើសជើងឯកថ្នាក់ជាតិឆ្នាំ២០២០នាសាលបាល់បោះរបស់មជ្ឈមណ្ឌលជាតិហ្វឹកហ្វឺនកីឡា។
លោកអ៊ូរតនាអគ្គលេខាធិការសហព័ន្ធបានប្រាប់ឲ្យដឹងថា ការប្រកួតកីឡាវ៉ូវីណាមជើងឯកថ្នាក់ជាតិឆ្នាំ២០២០បានប្រព្រឹត្តទៅ
ចាប់ពីថ្ងៃទី២៧ដល់ថ្ងៃទី២៩ខែមករាឆ្នាំ២០២១ ដែលមានការសហការណ៍យ៉ាងជិតស្និទ្ធជាមួយមជ្ឈមណ្ឌលជាតិហ្វឹកហ្វឺនកីឡា ក្រោមថវិកាគាំទ្ររបស់ក្រសួងអប់រំ ។ ព្រឹត្តិការណ៍ប្រកួតនេះមានក្លិបចូលរួម១២មកពីរាជធានី ខេត្ត និងក្រសួងស្ថាប័ន២ ដែលមានកីឡាករ ៤៨នាក់ កីឡាការិនី ២៨នាក់សរុបទាំងអស់៧៦នាក់ មាន១៧វិញ្ញាសា ការប្រកួតចែកជា២ផ្នែកធំៗ។
លោកស៊ូម សារឿនបានមានប្រសាសន៍ថា ការប្រកួតលើកនេះធ្វើឡើងក្នុងគោលបំណងត្រៀមលក្ខណៈពង្រឹងសមត្ថភាពនៃការ
ប្រកួតកីឡាSEA GAMES 2023 លើកទី៣២ដែលប្រទេសកម្ពុជានឹងធ្វើជាម្ចាស់ផ្ទះនាពេលខាងមុខនេះ។
ឯកឧត្តមប៊ូ ជុំសេរី ក៏បានមានប្រសាសន៍ថា ការប្រកួតជើងឯកត្រូវបានរៀបចំធ្វើឡើងជារៀងរាល់ឆ្នាំ ក្នុងគោលបំណងដើម្បីធ្វើការ
វាស់ស្ទង់និងពង្រឹងសមត្ថភាពបន្ថែមនៃការប្រកួតរបស់កីឡាករកីឡាការិនី នៅក្នុងកម្រិតនៃក្របខណ្ឌការប្រកួតថ្នាក់ជាតិតំបន់និងអន្តរជាតិ ក្នុងការស្វែងរកចំណុចខ្លាំងនិងចំណុចខ្សោយរបស់អត្តពលិក ដើម្បីធ្វើជាមូលដ្ឋានសម្រាប់ធ្វើការកែលម្អចំណុចខ្វះខាតទាំងអស់នោះ ក្នុងន័យចូលរួមការប្រកួតប្រកបដោយសក្តានុពល និងពោរពេញដោយលក្ខណៈបច្ចេកទេសខ្ពស់សម្រាប់ការប្រកួតSEA GAMESនៅទីក្រុងហាណូយ ឆ្នាំ២០២១នេះ និង SEA GAMES ឆ្នាំ២០២៣ នាពេល ខាងមុខ។
ក្នុងឳកាសនោះផងដែរលោកតង់ ធារ៉ាប្រធានមន្ទីរអប់រំកាយនិងកីឡាខេត្តប៉ៃលិន ឧបត្ថម្ភដល់ក្រុមអត្តពលិកវ៉ូវីណាមខេត្តប៉ៃលិន
ចំនួន១,៨០០,០០០រៀលគឺក្នុងមួយម្នាក់២០ម៉ឺនរៀល។ សម្រាប់ការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិឆ្នាំ២០២០នេះដែល ក្រុមអត្តពលិកវ៉ូវីណាមខេត្តប៉ៃលិនដណ្តើមបានមេដាយមាស១គ្រឿង មេដាយប្រាក់១គ្រឿង និងមេដាយសំរិទ្ធ១គ្រឿង៕
