លោកហ៊ុន ម៉ានី ៖ សរសើរ ការប្រកួតកីឡាប៉េតង់ជើងឯកជាតិ
ភ្នំពេញ៖លោកហ៊ុន ម៉ានី ប្រធានគណៈកម្មការទី៧នៃរដ្ឋសភា និងជាប្រធានសហភាពសហព័ន្ធយុវជនកម្ពុជាឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា និងប្រធានសហព័ន្ធកីឡាប៊ូល និងប៉េតង់កម្ពុជា និងប្រធានសមាគម-ក្លិបកីឡាប៊ូលនិងប៉េតង់នៅតាមក្រសួងស្ថាប័នរាជធានីខេត្តនឹងអញ្ជើញចូលរួមពិធីបិទព្រឹត្តិការណ៍ការប្រកួតកីឡាប៉េតង់ជ្រើសរើសជើងឯកថ្នាក់ជាតិប្រចាំឆ្នាំ២០២០នារសៀលថ្ងៃទី៣១ខែមករាឆ្នាំ២០២១នៅទីលានសហព័ន្ធនៃពហុកីឡដ្ឋានជាតិអូឡាំពិករៀបចំឡើងដោយសហព័ន្ធកីឡាប៊ូល និងប៉េតង់កម្ពុជាប្រើប្រាស់ថវិកាគាំទ្ររបស់ក្រសួងអប់រំ យុវជន និងកីឡា។
លោកស សុខា បានមានប្រសាសន៍ថា ការប្រកួតកីឡាប៉េតង់ជ្រើសរើសជើងឯកថ្នាក់ជាតិឆ្នាំ២០២០មាន ក្រុមកីឡាករ-កីឡាការិនីប៉េតង់ចំនួន៣៥០នាក់សរុបចំនួន៤៥២នាក់មានក្លិប-សមាគមចំនួន ៥៩ មកពី១៦ខេត្ត រួមជាមួយ៦វិញ្ញាសាវិញ្ញាសាបុរស ៣នាក់ទល់៣នាក់ (ពានធំ) វិញ្ញាសានារី ៣នាក់ទល់៣នាក់ យុវជនអាយុ១៨ឆ្នាំចុះ ៣នាក់ទល់៣នាក់ យុវនារីអាយុ១៨ឆ្នាំចុះ ២នាក់ទល់២នាក់យុវជនអាយុ១៥ឆ្នាំចុះ១នាក់ទល់១នាក់និងវិញ្ញាសាអាយុ១៥ឆ្នាំចុះ១នាក់ទល់១នាក់។ក្រោមស្នាមដៃបិតាស្ថាបនិកសហព័ន្ធកីឡាប៉េតង់សម្តេចក្រឡាហោម ស ខេង និងសម្តេចវិបុលបញ្ញា សុខ អាន កម្ពុជាដណ្តើមមេដាយលើឆាកអន្តរជាតិជាង៣០០គ្រឿង។
លោកហ៊ុនម៉ានីក៏បានមានប្រសាសន៍ថាអបអរសាទរក្រុមកីឡាករកីឡាការិនីនិងជ័យលាភីនៃការប្រកួតកីឡាប៉េតង់ជើងឯក
ថ្នាក់ជាតិឆ្នាំ២០២០ ហើយភាពជោគជ័យនៅថ្ងៃនេះបានបង្ហាញពីការខិតខំប្រឹងប្រែង វិន័យការតស៊ូ និងស្មារតីជាក្រុមទាំងអស់គ្នា។ ទោះបីជាលទ្ធផលយ៉ាងណាក្តីតែអ្វីដែលមិនអាចកាត់ថ្លៃបានគឺមិត្តភាព និងសាមគ្គីភាពហើយតាមរយៈការប្រកួតនេះគឺជាបទពិសោធន៍ថ្មីមួយ និងការហ្វឹកហាត់បន្ថែមដើម្បីបន្តភាពរឹងមាំសម្រាប់ឆ្នាំបន្តបន្ទាប់ និងអនាគតនៃកីឡានេះដើម្បីកិត្តិសព្ទកម្ពុជាដែលទទួលបានកន្លងមក។
លោកបានបន្តថាប្រទេសកម្ពុជាទទួលបានការកោតសរសើរនិងការវិវឌ្ឍជាបន្តបន្ទាប់ចាប់តាំងពីការកកើតឡើងនៃសហព័ន្ធកីឡាប៊ូល និងប៉េតង់កាលពីឆ្នាំ១៩៩២ ដោយមានសម្តេចក្រឡាហោម ស ខេង និងសម្តេចវិបុលបញ្ញា សុខ អាន ជាស្ថាបនិក ជាមួយស្ថានិកដទៃទៀត ដែលកម្ពុជាទទួលបានមេដាយអន្តរជាតិសរុបរហូតដល់ ៣០៦គ្រឿង ក្នុងនោះមានមេដាយមាស ៨៨គ្រឿង ប្រាក់ ១០៨គ្រឿង និង ១១០សំរឹទ្ធ គ្រឿង៕
