រថយន្តក្រឡុកស៊ីម៉ងត៍ បើកលឿនបុកម៉ូតូ ស្លាប់ប្រពន្ធ ឯប្តីរងរបួស

កណ្តាល ៖ គ្រោះថ្នាក់ចរាចរណ៍រវាងរថយន្ត និងម៉ូតូ បណ្ដាលឱ្យខាងអ្នកជិះម៉ូតូស្លាប់ម្នាក់ របួសម្នាក់ កាលវេលាម៉ោង ១០ព្រឹកថ្ងៃទី៩ខែឧសភា ឆ្នាំ២០២១ ឋិតនៅចំណុចបណ្តោយផ្លូវលេខ ជាតិលេខ ៨ ក្នុងភូមិព្រៃធំ ឃុំសន្លុង ស្រុកខ្សាច់កណ្តាល ខេត្តកណ្ដាល ។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍ខាងលើនេះ បង្កឡើងដោយរថយន្តក្រឡុកសុីម៉ងត៍ ម៉ាកហុីយ៉ានដាយ (HYUNDAI) ពណ៌ស ក្បាលសណ្តោងពាក់ផ្លាកលេខភ្នំពេញ3D-8738 សណ្តោងរ៉ឺម៉កពាក់ផ្លាកលេខ ភ្នំពេញ4A4159 បើកបរដោយឈ្មោះសុឹង ស៊ុនណារី ភេទប្រុស អាយុ៥៥ឆ្នាំ រស់នៅភូមិព្រៃគគីរ ឃុំមេមត់ ស្រុកមេមត់ ខេត្តកំពង់ចាម (ឃាត់ខ្លួន) ក្នុងទិសដៅពីកើតទៅលិចស្របទិសគ្នា មកដល់ចំណុចភូមិឃុំខាងលើ បានបុកម៉ូតូ១គ្រឿងម៉ាក ហុងដាស្កុបពី ពណ៌ស ផ្លាកលេខភ្នំពេញ 1AH 2295 បើកបរដោយឈ្មោះឈន ម៉ៃ ភេទប្រុស អាយុ៣៣ឆ្នាំ មុខរបរកម្មកររោងចក្រ រស់នៅភូមិសំបួរ ឃុំកំពងប្រាំង ស្រុកពារាំង ខេត្តព្រៃវែង(របួសស្រាល) និងអ្នករួមដំណើរ១នាក់ឈ្មោះធូ ចន្ថា ភេទស្រី (ប្រពន្ធ) អាយុ២៧ឆ្នាំ មុខរបរកម្មកររោងចក្រ រស់នៅភូមិឃុំជាមួយគ្នា(ស្លាប់)។

មូលហេតុ ៖ អ្នកបើករថយន្តបើក ល្បឿនលឿនខ្វះការប្រុងប្រយ័ត្ន បណ្តាលឲ្យបុកអ្នកជិះម៉ូតូ ស្លាប់មនុស្សនៅកន្លែង កើតហេតុ។ សពជនរងគ្រោះ សមត្ថកិច្ចបានប្រគល់ ឲ្យក្រុមគ្រួសារយកធ្វើបុណ្យតាមប្រពៃណី ។ ចំណែក រថយន្តបង្ក និងម៉ូតូជនរងគ្រោះ ត្រូវបានកម្លាំងជំនាញនគរបាលចរាចរណ៍ យកមករក្សារទុក នៅអធិការដ្ឋាននគរបាល ស្រុកខ្សាច់ កណ្តាល រង់ចាំដោះស្រាយតាមនីតិវិធី៕