រថយន្តធុនធ្ងន់២គ្រឿង ប៉ះទង្គិចគ្នា នៅក្រុងកំពង់ឆ្នាំង បណ្តាលឲ្យរបួសធ្ងន់មនុស្សម្នាក់

កំពង់ឆ្នាំង ៖ រថយន្តដឹកទំនិញធុនធ្ងន់២គ្រឿង បានប៉ះទង្គិចគ្នា ខណៈកំពុងធ្វើណើរបញ្ច្រាសទិសគ្នា បណ្តាលឲ្យរងរបួសធ្ងន់មនុស្សម្នាក់ ។
ហេតុការណ៍នេះកើតឡើងនៅ វេលាម៉ោង៣និង៥៥នាទីព្រឹក ថ្ងៃទី២៣ ខែឧសភា ឆ្នាំ២០២១ នៅលើកំណាត់ផ្លូវជាតិលេខ០៥ ចន្លោះបង្គោលគីឡូម៉ែត្រលេខ៨៦-៨៧ ត្រង់ចំណុចមុខហាង នាងពួន ស្ថិតនៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។

សមត្ថកិច្ចបានឲ្យដឹងថា រថយន្តទី១ម៉ាក HYUNDAI ពណ៌ក្រហម ពាក់ស្លាកលេខ កំពង់ស្ពឺ 3A-1966 សណ្តោងសឺមីរ៉ឺម៉កពណ៌ស ពាក់ស្លាកលេខភ្នំពេញ 4A-2829 ដែលជារបស់ក្រុមហ៊ុនដឹកជញ្ជូនទំនិញ អក្សរ K បើកបរដោយឈ្មោះ វ័ន សុខហេង ភេទប្រុស អាយុ២៦ឆ្នាំ ជនជាតិខ្មែរ មានទីលំរស់នៅភូមិថ្មសែត ឃុំថ្មសែត ស្រុកថ្មសែត ខេត្តកំពង់ស្ពឺ ដោយមានអ្នករួមដំណើរជាមួយចំនួន០១នាក់ បើកបរចេញពីខាងត្បូងទៅទិសខាងជើង ។

លុះពេលបើកបរមកដល់ត្រង់ចំណុចខាងលើ ក៏បានបុកជាមួយរថយន្ត ០១ គ្រឿងម៉ាក HYUNDIA ពណ៌ខៀវ ពាក់ស្លាកលេខព្រះសីហនុ 3A-3959 សណ្តោងសឺមីរ៉ឺម៉កពណ៌ខៀវ ពាក់ស្លាកលេខភ្នំពេញ 4A-0599 ដែលជារបស់ក្រុមហ៊ុនដឹកជញ្ជូនទំនិញ អក្សរ T បើកបរដោយឈ្មោះ គ្រុឌ លីណា ភេទប្រុស អាយុ៣៥ឆ្នាំ ជនជាតិខ្មែរ មានទីលំនៅភូមិព្រៃទាវ ឃុំស្រែអំបិល ស្រុកស្អាង ខេត្តកណ្ដាល បើកបរម្នាក់ឯង ក្នុងទិសដៅពីជើងទៅទិសខាងត្បូង ក្នុងដំណើរច្រាសទិសគ្នា ។ ក្នុងហេតុការណ៍នេះ បណ្តាលឲ្យរងរបួសធ្ងន់មនុស្ស០១នាក់ និង ខូចខាតរថយន្ត០២គ្រឿងធ្ងន់ធ្ងរ ។

សមត្ថកិច្ចបញ្ជាក់ថា គ្រោះថ្នាក់ចរាចរណ៍នេះបណ្ដាលមកពីបញ្ហាសុខភាព(ងងុយដេកពេលបើកបរ)។

បច្ចុបុ្បន្ន មធ្យោបាយទាំង២គ្រឿង ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលក្រុងកំពង់ឆ្នាំង ដើម្បីដោះស្រាយតាមនីតិវិធី ៕