ពីរនាក់ប្តីប្រពន្ធ ត្រូវសមត្ថកិច្ចនគរបាលស្រុកក្រគរ ឃាត់ខ្លួន ករណី ផលិតស្រាស មានជាតិពុល បណ្តាលឲ្យមនុស្ស០៩នាក់ស្លាប់

ខេត្តពោធិ៍សាត់ ៖ សមត្ថកិច្ចនគរបាល នៃអធិការដ្ឋាននគរបាលស្រុកក្រគរ ឃាត់ខ្លួនសង្ស័យ២នាក់ ប្តីប្រពន្ធ ពាក់ព័ន្ធ ករណីផលិតស្រាស មានសារជាតិពុល ដែលបណ្តាលមនុស្សប្រុសស្រី៩នាក់ ស្លាប់ជាបន្តបន្ទាប់ នៅឃុំអន្សាចំបក់ ស្រុកក្រគរ ខេត្តពោធិ៍សាត់ មានចំនួន៣ភូមិ ភូមិសានសរ ភូមិថ្គោលធំ និងភូមិកំពង់ថ្គោល ចាប់ពីថ្ងៃទី២៨ ខែឧសភា ឆ្នាំ២០២១ ដល់ថ្ងៃទី២ ខែមិថុនា ឆ្នាំ២០២១។

យោងកំណត់ហេតុស្តាប់ការបំភ្លីរបស់ ឈ្មោះ តាវ សុគា ភេទស្រី អាយុ៦៦ឆ្នាំ ជនជាតិខ្មែរ មានទីលំនៅភូមិកំពង់ថ្គោល ឃុំអន្សាចំបក់ ស្រុកក្រគរ ខេត្តពោធិ៍សាត់ និងឈ្មោះ សឿង រស់ ភេទស្រីអាយុ ៥០ឆ្នាំ ជនជាតិខ្មែរ មានទីលំនៅភូមិកំពង់ថ្គោល ឃុំអន្សាចំបក់ ស្រុកក្រគរ ខេត្តពោធិ៍សាត់ ព្រមទាំងឈ្មោះ ស្រី សារ៉ា ភេទស្រី អាយុ៤១ឆ្នាំ ជនជាតិខ្មែរ មានទីលំនៅភូមិថ្គោលធំ ឃុំអន្សាចំបក់ ស្រុកក្រគរ ខេត្តពោធិ៍សាត់ បានបំភ្លឺថា ពួកគាត់បានទិញស្រាស ពីឈ្មោះ ទ្រី វណ្ណា អាយុ៦១ឆ្នាំ ជនជាតិខ្មែរ មានទីលំនៅភូមិសានសរ ឃុំអន្សាចំបក់ ស្រុកក្រគរ ខេត្តពោធិ៍សាត់ មកលក់បន្តជាប្រចាំ ខណៈដឹងរឿងហេតុថាមានអ្នកពុលស្រាស្លាប់ ឈ្មោះ ទ្រី វណ្ណា បានជិះម៉ូតូ និងតេទូរស័ព្ទប្រាប់ឲ្យពួកគាត់ ចាក់ស្រាសចោលទៅ ហើយឈ្មោះ ទ្រី វណ្ណា នឹងជួយចេញសោហ៊ុយខាតឲ្យវិញ ។

បើតាមការបំភ្លីរបស់ ឈ្មោះ មិទ្ធិ ចាន់កញ្ញា ភេទស្រី អាយុ៣០ឆ្នាំ ជនជាតិខ្មែរ មានទីលំនៅភូមិថ្គោលធំ ឃុំ អន្សាចំបក់ ស្រុកក្រគរ ខេត្តពោធិ៍សាត់ ។ រយៈកាលកន្លងមក ម្តាយក្មេកខ្លួនឈ្មោះ ខេន សុខគា បានទិញស្រាស ពីឈ្មោះទ្រី វណ្ណា អាយុ៦១ឆ្នាំ ជនជាតិខ្មែរ មានទីលំនៅភូមិសានសរ ឃុំអន្សាចំបក់ ស្រុកក្រគរ ខេត្តពោធិ៍សាត់ ។

ហើយសព្វថ្ងៃនេះ ម្តាយក្មេកខ្លួនបានហូបស្រាដែលបានទិញពី ឈ្មោះទ្រី វណ្ណា ក្នុងមួយថ្ងៃ ១កូនកែវឬ២កូនកែវ ហើយនៅថ្ងៃទី៣១ ខែឧសភា ឆ្នាំ២០២១ នៅវេលាម៉ោង៧ និង០០នាទីព្រឹក ស្រាប់តែមានអាការៈវិលមុខ និងងងឹតភ្នែក ពួកខ្លួនក៏បញ្ជូនគាត់ទៅមន្ទីពេទ្យបង្អែកស្រុកក្រគរ ហើយគេក៏បានបញ្ជូន ទៅដល់មន្ទីពេទ្យបង្អែកខេត្តពោធិ៍សាត់ ។ លុះដល់ថ្ងៃទី១ ខែមិថុនា ឆ្នាំ២០២១ នៅវេលាម៉ោង១និង៤០នាទីរំលងអធ្រាត ពេទ្យបានប្រាប់ថាគាត់ឡើងសម្ពាធឈាមដាច់សរសៃខួរក្បាល ស្លាប់បាត់ហើយ ចំណែកឈ្មោះ ហ៊ុល សុខជា ភេទស្រី និងឈ្មោះ ប៉ុល កាន ភេទស្រី គាត់បានហូបស្រាជាមួយម្តាយក្មេកខ្លួនដែរ បន្ទាប់មកពីធ្វើការរោងចក្រ ហើយគាត់ទាំង២នាក់នេះ មុនពេលស្លាប់ ពួកគាត់ក៏ មានអាការៈដូចម្តាយក្មេកខ្លួនដែរ ហើយនៅថ្ងៃទី១ ខែមិថុនា ឆ្នាំ២០២១ នៅវេលាម៉ោង ១២ និង ១៣នាទី ឈ្មោះ ទ្រី វណ្ណា បានមកចូលបុណ្យសពម្តាយក្មេកខ្លួន ហើយគាត់បានចូលតូបលក់របស់ប្អូនថ្លៃខ្លួន ឈ្មោះ ឡាយ ចាន់រស្មី ឲ្យចាក់ស្រាដែលទិញពីគាត់ចាក់ចោល គឺឈ្មោះ ទ្រី វណ្ណា ចាក់ចោលខ្លួនគាត់ ស្រានៅក្នុងកានមានចំណុះប្រហែល ៥ ទៅ ៧លីត្រ ។

លោកវរសេនីយ៍ឯក ឯម រុន អធិការនៃអធិការដ្ឋាននគរបាលស្រុកក្រគរ បានបញ្ជាក់ឲ្យដឹងថា ក្រោយទទួលព័ត៌មាន និងក្តាប់បានពីមុខសញ្ញាជនសង្ស័យ ករណីមនុស្សស្លាប់ដោយពិសារស្រាស ដូចខាងលើ ព្រមទាំងមានការបញ្ជាពីឯកឧត្តម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិសាត់ នៅថ្ងៃទី២ ខែមិថុនា ឆ្នាំ២០២១ វេលាម៉ោង១៥ និង ៣៤នាទី សមត្ថកិច្ចជំនាញ បានចុះឃាត់ខ្លួនជនសង្ស័យពីរនាក់ប្តីប្រពន្ធ យកមកកាន់អធិការដ្ឋាននគរបាលស្រុក ដើម្បីធ្វើការស្រាវជ្រាវ ។

លោកអធិការបានបន្តថា ជនសង្ស័យទាំង២នាក់ ទី១ ឈ្មោះ ស៊ុយ គឹមទៀង ភេទប្រុស អាយុ៧១ឆ្នាំ ជនជាតិខ្មែរ ទី២ឈ្មោះ ទ្រី វណ្ណា អាយុ៦១ឆ្នាំ ជនជាតិខ្មែរ មានទីលំនៅភូមិសានសរ ឃុំអន្សាចំបក់ ស្រុកក្រគរ ខេត្តពោធិ៍សាត់ បច្ចុប្បន្នជនសង្ស័យទាំង២នាក់ ត្រូវបានឃាត់ខ្លួននៅអធិការដ្ឋាននគរបាលស្រុកក្រគរ កសាងសំណុំរឿង តាមនីតិវិធីច្បាប់ ។ ដោយឡែក វត្ថុតាងស្រាស ត្រូវបានយកទៅពិនិត្យឡាបូ រង់ចាំលទ្ធផលពេលក្រោយ។ តែទោះជាយ៉ាងណា សមត្ថកិច្ចនឹងខិតខំស្រាវជ្រាវបន្តទៀត ដើម្បីបង្ហាញអំពីមូលហេតុច្បាស់លាស់នៃករណីពុលនេះ។

បន្ទាប់ពីទទួលបានព័ត៌មាន ពីអាជ្ញាធរ និងសមត្ថកិច្ចជំនាញ ករណីប្រជាពលរដ្ឋរងគ្រោះដោយករណីពុលគ្រឿងស្រវឹង (ស្រាស ស្រាថ្នាំ) បណ្តាលឱ្យស្លាប់ជាបន្តបន្ទាប់ និងមួយចំនួនទៀតកំពុងសម្រាកព្យាបាលនោះ លោក ម៉ៅ ធនិន អភិបាលខេត្តពោធិ៍សាត់ នារសៀលថ្ងៃទី២ ខែមិថុនា ឆ្នាំ២០២១នេះ បានអញ្ជើញចុះសួរសុខទុក្ខ និងនាំយកអំណោយ ដើម្បីផ្តល់ជូនដល់អ្នករងគ្រោះ កំពុងសម្រាកព្យាបាលនៅមន្ទីរពេទ្យបង្អែកខេត្តពោធិ៍សាត់។

លោក ម៉ៅ ធនិន បានបញ្ជាក់ថា ក្រោយកើតហេតុភ្លាមៗ និងក្រោយទទួលបានព័ត៌មាននេះភ្លាម លោកបានបញ្ជាឱ្យកម្លាំងនគរបាល ចុះជួយអន្តរាគមន៍ ដឹកជនរងគ្រោះ ទៅកាន់មន្ទីរពេទ្យ ដើម្បីជួយសង្គ្រោះ។ ជាមួយគ្នានោះ លោកបានបញ្ជូនមន្ត្រីជំនាញមួយក្រុម ចុះទៅពិនិត្យផ្ទាល់ និងស្រាវជ្រាវ នៅកន្លែងដែលសង្ស័យថាពុលស្រា នៅភូមិសានស ឃុំអន្សាចំបក់ ស្រុកក្រគរ ខេត្តពោធិ៍សាត់។

គួរបញ្ជាក់ថា គិតចាប់ពីថ្ងៃទី២៨ ខែឧសភា រហូតដល់ថ្ងៃទី០២ ខែមិថុនា ឆ្នាំ២០២១នេះ មានករណីស្លាប់ប្រជាពលរដ្ឋជាបន្តបន្ទាប់ ហើយត្រូវបានគ្រូពេទ្យជំនាញ និងនគរបាលបច្ចេកទេស ដាក់ការសន្និដ្ឋានថា សង្ស័យពុលគ្រឿងស្រវឹង (ស្រាស ស្រាថ្នាំ) ក្នុងពិធីបុណ្យសព នៅឃុំអន្សាចំបក់ ស្រុកក្រគរ ខេត្តពោធិ៍សាត់ ខណៈមនុស្សជាង៧០នាក់នាក់ទៀត កំពុងសង្គ្រោះនៅមន្ទីរពេទ្យបង្អែកខេត្ត៕