រដ្ឋបាលរាជធានីចាត់មន្ត្រី ចុះទៅធ្វើការអប់រំណែនាំបន្ថែមដល់បងប្អូនកម្មករ កម្មការនីនៅរោងចក្រ ហ្វត្រេសដែលរត់គេចឱ្យសហការ ជាមួយក្រុមគ្រូពេទ្យស្ម័គ្រចិត្តយកសំណាក

ភ្នំពេញ៖ក្រោយកម្មករ-កម្មការិនីនៅរោងចក្រហ្វ័រត្រេស រត់ចេញពីកន្លែងយកសំណាក កាលពីយប់ថ្ងៃទី៩ ខែមិថុនា ឆ្នាំ២០២១ មនៅរោងចក្រហ្វ័រត្រេស មានកម្មករ-កម្មការិនីប្រហែលជាង១០០០នាក់នៅភូមិស្រែញ័រ សង្កាត់ពងទឹក ខណ្ឌដង្កោ ខណះក្រុមគ្រូពេទ្យបានចុះយកសំណាកនៅ ទីតាំងរោងចក្រផ្ទាល់។ ជាក់ស្ដែងនៅព្រឹកថ្ងៃទី១០ ខែមិថុនា ឆ្នាំ២០២១ នេះ រដ្ឋបាលរាជធានីភ្នំពេញ បានចាត់មន្រ្តីរដ្ឋបាលខណ្ឌ-សង្កាត់ ចុះទៅធ្វើការអប់រំណែនាំបន្ថែមដល់បងប្អូនប្រជាពលរដ្ឋ នៅរោងចក្រ ហ្វត្រេស ស្ថិតក្នុងសង្កាត់ពងទឹក ខណ្ឌដង្កោឱ្យយល់ច្បាស់អំពីការងារ ប្រយុទ្ធប្រឆាំងនឹងជំងឺកូវីដ-១៩ និងការសហការជាមួយក្រុមគ្រូពេទ្យស្ម័គ្រចិត្ត នៅក្នុងការយកសំណាក។
គួរបញ្ជាក់ថា៖ការដែលកម្មករកម្មការនីរោងចក្ររត់ចេញ ពីរោងចក្រខាងលើដោយសារតែក្រុមគ្រូពេទ្យ បានចាប់ផ្តើមយកសំណាកពេលនោះ កម្មករសុំឱ្យក្រុមគ្រូពេទ្យវ៉ៃត្រាបញ្ជាក់ថា ពួកគាត់បានយក សំណាករួចតែក្រុមគ្រូពេទ្យក៏ប្រាប់បន្តថា ទាល់តែធ្វើតេស្តលើកទី២ ទើបក្រុមគ្រូពេទ្យអាចបញ្ជាក់បាន ពេលនោះកម្មករក៏ចាប់ផ្តើមបង្កភាព អនាធិបតេយ្យមិនស្តាប់ការណែនាំ របស់ក្រុមគ្រូពេទ្យ និង អាជ្ញាធរឡើង ថែមទាំងនាំគ្នារត់ចេញ ពីក្នុងរោងច្រចេញមកក្រៅតែម្តង ។
ឆ្លៀតក្នុងឱកាសនេះរដ្ឋបាលរាជធានីភ្នំពេញ សូមអំពាវនាវដល់បងប្អូនកម្មករ-កម្មការិនីទាំងអស់ ក៏ដូចជាបងប្អូនប្រជាពលរដ្ឋ ទូទាំងរាជធានីភ្នំពេញសូមរួបរួមគ្នា សាមគ្គីគ្នា សហការជាមួយរដ្ឋបាលរាជធានីភ្នំពេញ មន្រ្តីអាជ្ញាធរមូលដ្ឋាន មន្រ្តីសុខាភិបាល ក៏ដូចជាក្រុមគ្រូពេទ្យស្ម័គ្រចិត្តទាំងអស់ នៅក្នុងការងារពិនិត្យ សំណាក ការងារធ្វើចត្តាឡីស័ក ត្រូវចូលរួមអនុវត្តតាមវិធានការ របស់ក្រសួងសុខាភិបាល និងចូលរួមគោរពតាមអនុសាសន៍ ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ” បីការពារ បីកុំ ” ដើម្បីទប់ស្កាត់ការរីករាលដាលនៃជំងឺកូវីដ-១៩ ក្នុងគោលដៅថែរក្សា នូវសុខុភាព អាយុជីវិត របស់បងប្អូនប្រជាពលរដ្ឋទាំងអស់គ្នា។
ជាមួយគ្នានោះលោកឃួង ស្រេង អភិបាលរាជធានីភ្នំពេញបានអំពាវនាវ ដល់បងប្អូនកម្មកររោងចក្រខាងលើ នាំគ្នាទៅពិនិត្យនិងយកសំណាក ហើយមិនមានកូវីដ១៩ទេការពិនិត្យនេះ ដូចជួយការពារកូវីដហើយជួយការងារ បងប្អូននៅបន្តនិរន្តរភាពហើយ រោងចក្រនៅតែបន្តដដែល ដូច្នេះសូមបងប្អូនសហកា រជាមួយអាជ្ញាធរដែលនេះជាប្រយោជន៌របស់បងប្អូននិងប្រជាពលរដ្ឋដែរ។
លោកក៏សូមសរសើរ ដល់ការខិតខំប្រឹងប្រែង របស់បងប្អូនមន្រ្តីអាជ្ញាធរមូលដ្ឋាន កងកម្លាំងប្រដាប់អាវុធ មន្រ្តីសុខាភិបាល និងក្រុមគ្រូពេទ្យស្ម័គ្រចិត្តទាំងអស់របស់យើង គឺ ដើម្បីឧត្តមប្រយោជន៍របស់បងប្អូន សុខុមាលភាពរបស់បងប្អូន និងការងាររបស់បងប្អូន នៅក្នុងដំណាក់កាល នៃការទប់ស្កាត់ការ រីករាលដាលនៃជំងឺកូវីដ-១៩នេះ ៕