ប៉ូលិសខណ្ឌច្បារអំពៅ ក្របួចចោរលួចគាស់ទ្វាររថយន្តម្នាក់ យកទ្រព្យសម្បត្តិម្ចាស់រថយន្ត សរុបជិត១០០០០ដុល្លារ

ភ្នំពេញ ÷ ជនសង្ស័យម្នាក់ ក្នុងចំណោមបក្ខ២នាក់ ត្រូវបានកម្លាំងជំនាញព្រហ្មទណ្ឌខណ្ឌច្បារអំពៅ ធ្វើការស្រាវជ្រាវ និងឃាត់ខ្លួនបានភ្លាមៗ ក្រោយពេលធ្វើសកម្មភាពគាស់ទ្វាររថយន្ត លួចយកទ្រព្យសម្បត្តិ និងសម្ភាររបស់ម្ចាស់រថយន្ត បានសម្រេចសរុបជាទឹកប្រាក់ជិត ១០០០០ដុល្លារសហរដ្ឋអាមេរិក។

ហេតុការណ៍ភ្ញាក់ផ្អើលខាងលើនេះ បានកើតឡើងកាលពីវេលាម៉ោង ១និង០០នាទីរសៀល ថ្ងៃទី១៤ ខែកក្កដា ឆ្នាំ២០២១ ស្ថិតនៅចំណុចការ៉ាស់សាំងកាល់តិច ក្នុងភូមិដើមអំពិល សង្កាត់ច្បារអំពៅ១ ខណ្ឌច្បារអំពៅ។

សមត្ថកិច្ចបានឲ្យដឹងថា ជនរងគ្រោះមានឈ្មោះ ជា សុខ ភេទប្រុស អាយុ ៤៥ឆ្នាំ មុខរបរកសិករ ស្នាក់នៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល។ រីឯជនសង្ស័យវិញមានឈ្មោះ ហែម សុងហេង ភេទប្រុស អាយុ១៩ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ភូមិតាងៅ សង្កាត់និរោធ ខណ្ឌច្បារអំពៅ។

តាមការរៀបរាប់របស់ជនរងគ្រោះ បានឲ្យដឹងថា មុនពេលកើតហេតុ រូបគាត់បានជិះរថយន្តមួយគ្រឿងម៉ាក Lexus Rx 300 មួយគ្រឿងពណ៌ទឹកមាស ពាក់ផ្លាកលេខ ភ្នំពេញ 2AH 4945 បានឈប់ចតក្បែរការ៉ាស់សាំងមួយភ្លែត ហើយចុះទៅទិញផ្លែទុរេន លុះត្រឡប់មកវិញ ទើបដឹងថាមានចោរលួចគាស់ទ្វាររថយន្ត របស់គាត់ យកទ្រព្យសម្បត្តិក្នុងរថយន្តបាត់អស់ រូបគាត់បានបន្តទៀតថា ទ្រព្យសម្បត្តិដែលត្រូវចោរលួច យកទៅបាត់នោះរួមមាន ÷ ខ្សែកមាសមួយបណ្តោងរូបយុទ្ធផ្កា ទម្ងន់២តម្លឹង ខ្សែកប្លាទីនមួយខ្សែ បណ្តោងរូបមាន់ មានទម្ងន់១តម្លឹង លុយខ្មែរចំនួន ១,៣៥០,០០០រៀល
ទូរស័ព្ទដៃមួយគ្រឿងម៉ាកSamsung Note 8 ពណ៌ខ្មៅមួយគ្រឿង. អត្តសញ្ញាណបណ្ណសញ្ជាតិខ្មែរមួយសន្លឹក។

បន្ទាប់មកជនរងគ្រោះ ក៏បានប្រញាប់ប្រញាល់ ទៅដាក់ពាក្យបណ្តឹងភ្លាមៗ ដើម្បីឲ្យសមត្ថកិច្ច ជួយអន្តរាគមន៍ដល់រូបគាត់។​ ក្រោយពេលទទួលពាក្យបណ្តឹង ពីជនរងគ្រោះរួចហើយ សមត្ថកិច្ចនគរបាលប៉ុស្តិ៍ច្បារអំពៅទី១ សហការជាមួយកម្លាំងជំនាញព្រហ្មទណ្ឌខណ្ឌច្បារអំពៅ បើកការស្រាវជ្រាវ លុះដល់វេលាម៉ោង៥និង៣០នាទីល្ងាច ថ្ងៃទី១៤ ខែកក្កដា ឆ្នាំ២០២១ កម្លាំងជំនាញបានឃាត់ខ្លួនជនសង្ស័យ បានម្នាក់ រួមនិងវត្ថុតាងសម្ភាររបស់ម្ចាស់រថយន្ត យកមកសាកសួរ តាមចម្លើយសារភាពរបស់ជនសង្ស័យខាងលើ បានសារភាពថា រូបគេនិងបក្ខពួកម្នាក់ទៀត ឈ្មោះ អារុក ពិតជាបានធ្វើសកម្មភាព លួចយកទ្រព្យសម្បត្តិ នៅក្នុងរថយន្តរបស់ជនរងគ្រោះពិតប្រាកដមែន។

សមត្ថកិច្ចបានបញ្ជាក់ថា ជនសង្ស័យខាងលើ មានសារធាតុញៀនផងដែរ។
បច្ចុប្បន្នជនសង្ស័យខាងលើ ត្រូវបានបញ្ជូនទៅឃុំខ្លួន បណ្តោះអាសន្ននៅអធិការដ្ឋាននគរបាលខណ្ឌច្បារអំពៅ ដើម្បីកសាងសំណុំរឿង បញ្ជូនទៅកាន់តុលាការ ចាត់ការតាមនីតិវិធី។ ដោយឡែកសម្ភារដែលត្រូវចោរលួច ត្រូវបានសមត្ថកិច្ចធ្វើកំណត់ហេតុ ប្រគល់ទៅឲ្យម្ចាស់រថយន្តវិញ រួចរាល់ផងដែរ៕