ឡានបុកឡាន របួស២នាក់ នៅឃុំដីឥដ្ឋ

កណ្ដាល៖ ប៉ូលិសបានអោយដឹងនៅព្រឹកថ្ងៃទី០៨ ខែសីហានេះថា ករណីគ្រោះថ្នាក់ចរាចរណ៍ ផ្លូវគោក រវាងរថយន្តបុកជាមួយរថយន្ត ក្នុងទិសដៅផ្ទុយ
បណ្តាលអោយមនុស្សរងរបួសចំនួន០២នាក់ និងខូចខាតរថយន្ត០២គ្រឿង កាលពីម៉ោង១០យប់ថ្ងៃទី០៧ខែសីហា ឆ្នាំ២០២១នេះ នៅលើកំណាត់ផ្លូវជាតិលេខ១ ចន្លោះគីឡូម៉ែត្រលេខ ២៤.២៥ស្ថិត
នៅក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល។

ប៉ូលិសបន្តទៀតថា នៅថ្ងៃខែឆ្នាំវេលាម៉ោងកើតហេតុខាងលើ មានរថយន្ត ០១គ្រឿងម៉ាក SANG YONG ពណ៌ស ពាក់ផ្លាកលេខភ្នំពេញ2AU-5613 បើកបរដោយឈ្មោះណាល់ ម៉ះ ភេទប្រុស អាយុ១៩ ឆ្នាំជនជាតិខ្មែរ មានទីលំនៅភូមិតាម៉ា ឃុំតាម៉ា ស្រុកបាភ្នំ ខេត្តព្រៃវែង និងអ្នករួមដំណើរម្នាក់ទៀត ឈ្មោះឡយ ឡុង ភេទប្រុសអាយុ២៥ឆ្នាំ មានទីលំនៅភូមិមេសាង ឃុំព្រែកម្តេញ ស្រុកមេសាង ខេត្តព្រៃវែង បើកបរក្នុងទិសដៅអ្នកលឿងទៅភ្នំពេញ។ ពេលបើក មកដល់ចំណុចកើតហេតុ បានជែករថយន្តកុងតឺន័រក៏បានជ្រុងទៅបុក រថយន្ត០១គ្រឿងទៀត ម៉ាកHYUNDAI ពណ៌ស ពាក់ផ្លាកលេខ កំពង់ចាម 3A-7475 អ្នកបើកបរមិនស្គាល់អត្តសញ្ញាណ ក្នុងទិសដៅផ្ទុយគ្នា បណ្តាលអោយអ្នកបើកបររថយន្ត SANG YONG រងរបួសធ្ងន់ និងអ្នករួមដំណើររងរបួសស្រាល ត្រូវបានរថយន្តសង្គ្រោះមន្ទីពេទ្យបង្អែកស្រុកកៀនស្វាយ ដឹកទៅព្យាបាលនៅភ្នំពេញ
ចំនែករថយន្តខូចខាតទាំងពីរគ្រឿង ត្រូវកំលាំងចរាចរណ៍សណ្តាប់ធ្នាប់ ស្រុកកៀនស្វាយ ធ្វើការវាស់វែង យករក្សាទុកនៅអធិការដ្ឋាននគរបាលស្រុកកៀនស្វាយ ។

ការសន្និដ្ឋាន៖ ករណីខាងលើបណ្តាលមកពី
អ្នកបើកបររថយន្តម៉ាក SANG YONG បើកធ្វេសប្រហែស បើកបរក្នុងល្បឿនលឿន មិនប្រុងប្រយ័ត្នជែង ក្នុងស្ថានភាពគ្រោះថ្នាក់៕