អ្នកលេងល្បែង ភ្នាល់ទឹកភ្លៀង ចំនួន០៥នាក់ត្រូវបានឃាត់ខ្លួន នៅក្រុងបាត់ដំបង
ខេត្តបាត់ដំបង៖ នគរបាលខេត្តបាត់ដំបង ចុះប្រតិបត្តិការបង្ក្រាបករណីល្បែងស៊ីសង ( ភ្នាល់ទឹកភ្លៀង)ចំនួន០២ ចំណុចគឺនៅចំណុចភូមិអញ្ចាញ សង្កាត់អូរចារ ក្រុងបាត់ដំបង និងចំណុចក្នុងព្រលានយន្តហោះ ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង និងបាននាំខ្លួនអ្នកប្រព្រឹត្តចំនួន០៥នាក់រួមទាំងរថយន្តនិងសម្ភារៈពាក់ព័ន្ធមួយចំនួនមកកាន់ស្នងការដ្ឋាននគរបាលខេត្តបាត់ដំបង។
វត្ថុតាងដកហូតរួមមាន ៖ - ទូរស័ព្ទដៃ ចំនួន ០៧ គ្រឿង - វិទ្យុទាក់ទងចំនួន ០៥ គ្រឿង - រថយន្តចំនួន ០៣ គ្រឿង ។
ស្នងការនគរបាលខេត្តបាត់ដំបងបញ្ជាក់ថា
ករណីល្បែងភ្នាល់ទឹកភ្លៀងនេះ កន្លងទៅសមត្ថកិច្ចធ្លាប់បានធ្វេីការបង្រ្កាប ជារឿយៗហេីយថែម
ទាំងបានឃាត់ខ្លួនបញ្ជូនទៅកាន់អយ្យការអមសាលាដំបូងអនុវត្តតាមច្បាប់ទៀតផង តែអ្នកប្រព្រឹត្តមួយចំនួន មិនបានបោះបង់នោះទេ ក្នុងនោះ ពួកគាត់បានផ្លាស់ប្តូររូបភាពពីការប្រមូលផ្តុំគ្នាច្រេីនៗ ទៅជារូបភាពតូចៗ នៅតាមទីវាលស្រែឆ្ងាយ ឬទីឆ្ងាយស្រឡះ ដេីម្បីមេីលមេឃ និងបានឃេីញជាមុនក្នុងករណីពេលមានការចុះបង្រ្កាបពីសំណាក់សមត្ថកិច្ច។
អ្នកប្រព្រឹត្តល្បែងភ្នាល់ទឹកភ្លៀងទាំង០៥នាក់ព្រមទាំងសម្ភារៈភស្តុតាងផងការិយាល័យជំនាញកំពុងកសាងសំណុំរឿងដេីម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធីច្បាប់៕
