ជនសង្ស័យមួយក្រុមមានគ្នាបីម៉ូតូ ធ្វើសកម្មភាពធាក់ប្លន់ម៉ូតូមួយគ្រឿងបានសម្រេច , ប្លន់ចំជនរងគ្រោះមានកាំភ្លើង បាញ់បណ្តាលឲ្យស្លាប់ចោរម្នាក់
ភ្នំពេញ ៖ ជនសង្ស័យមួយក្រុមមានគ្នាបីម៉ូតូធ្វើសកម្មភាពធាក់ប្លន់ម៉ូតូមួយគ្រឿងបានសម្រេច តែត្រូវជនរងគ្រោះដកកាំភ្លើងខ្លីបាញ់ជាច្រើនគ្រាប់បណ្ដាលឲ្យជនសង្ស័យម្នាក់ស្លាប់ភ្លាមៗ រីឯបក្សពួករត់គេចខ្លួនបាត់ ។ ហេតុការណ៍នេះ កើតឡើងស្ថិតនៅតាមបណ្ដោយផ្លូវ៥០ម៉ែត្រ ក្នុងសង្កាត់ព្រៃស ខណ្ឌដង្កោ រាជធានីភ្នំពេញ វេលាម៉ោង៥និង៤៥នាទីព្រឹក ថ្ងៃទី២៤ ខែមីនា ឆ្នាំ២០២២។
មុនពេលកើតហេតុជនរងគ្រោះជាសមត្ថកិច្ចបញ្ជាក់ថា ជាមន្រ្តីយោធាម្នាក់ បានជិះម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ២០២២ ពណ៌ខ្មៅពាក់ផ្លាកលេខភ្នំពេញ1JC-4840 ធ្វើដំណើរតាមបណ្តោយផ្លូវ៥០ម៉ែត្រ ចេញពីម្តុំវត្តឬស្សីសាញ់ ក្នុងទិសដៅពីជើងទៅត្បូង លុះដល់ចំណុចកើតហេតុផ្លូវស្ងាត់ អត់សូវមានមនុស្សផងនោះ ស្រាប់តែលេចមុខជនសង្ស័យមួយក្រុមជិះម៉ូតូ២គ្រឿង ប្រដាប់ដោយអាវុធខ្លី១ដើម បានជិះមកក្បែរជនរងគ្រោះ ធាក់ផ្តួលប្លន់យកម៉ូតូពីជនរងគ្រោះ បម្រុងនឹងជិះរត់គេចខ្លួន ពេលនោះជនរងគ្រោះបានដកកាំភ្លើងខ្លីម៉ាកLOCK មួយដើមបានបាញ់ចំនួន៩គ្រាប់ ត្រូវចំពីក្រោយជនសង្ស័យ៣គ្រាប់ បណ្តាលឲ្យដេកដួលស្លាប់ក្បែរម៉ូតូរបស់ជនរងគ្រោះភ្លាមៗតែម្តង។
ក្រោយពេលកើតហេតុសមត្ថកិច្ចប៉ុស្តិ៍នគរបាលសង្កាត់ព្រៃស កម្លាំងជំនាញនៃអធិការដ្ឋាននគរបាលខណ្ឌដង្កោ កម្លាំងការិយាល័យព្រហ្មទណ្ឌកម្រិតធ្ងន់ កម្លាំងការិយាល័យកោសល្យវិច័យ និងបច្ចេកទេស នៃស្នងការដ្ឋាននគរបាលរាជធានីភ្នំពេញ កម្លាំងអាវុធហត្ថខណ្ឌដង្កោ បានចុះទៅទីតាំងកើតហេតុបើកការស្រាវជ្រាវ និងពិនិត្យជុំវិញបរិវេណទីតាំងកើតហេតុខាងលើ និងរកឃើញសំបកគ្រាប់កាំភ្លើង ដែលបាញ់រួចចំនួន៩គ្រាប់ ដែលជាប្រភេទអាវុធខ្លីម៉ាកLOCK ផលិតនៅប្រទេសអូទ្រីស និងបានឃាត់ខ្លួនខ្មាន់កាំភ្លើង ដែលជាមន្ត្រីយោធាខាងលើ បញ្ជូនទៅកាន់អធិការដ្ឋាននគរបាលខណ្ឌដង្កោ ដើម្បីធ្វើការសាកសួរ។
ចំណែកសពជនសង្ស័យ សមត្ថកិច្ចបានដឹកតាមរថយន្តដឹកសព យកទៅតម្កល់ទូកនៅវត្តឬស្សីសាញ់ ដើម្បីធ្វើការស្រាវជ្រាវរកក្រុមគ្រួសារសាច់ញាតិ មកទទួលយកទៅធ្វើបុណ្យតាមប្រពៃណី៕