២ថ្ងៃនៃការត្រួតពិនិត្យយានយន្ត កែច្នៃខុសលក្ខណៈបច្ចេកទេស នៅខេត្តព្រះវិហារ ឃាត់រថយន្តបាន៤០គ្រឿង
ខេត្តព្រះវិហារ៖ ក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេស ខេត្តព្រះវិហារ ២ថ្ងៃជាប់គ្នានេះ បានឃាត់រថយន្តដឹកទំនិញបានចំនួន៤០ គ្រឿង និងបានរកឃើញរថយន្តល្មើសច្បាប់ជាច្រើនគ្រឿងផងដែរ ដើម្បីធ្វើការផាកពិន័យនិងកាត់ទ្រុងចេញ។
លោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារបានអោយដឹងថា នៅក្នុងរយះពេល២ថ្ងៃកន្លងមក ពោលគឺថ្ងៃទី ១៤ ខែ កញ្ញា ឆ្នាំ ២០១៨ និងនៅថ្ងៃទី ១៣ ខែ កញ្ញា ឆ្នាំ ២០១៨ ក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេស ខេត្តព្រះវិហារបានឃាត់រថយន្តចំនួន៤០ គ្រឿង និងបានរកឃើញរថយន្តល្មើសច្បាប់ជាច្រើនគ្រឿងដើម្បីធ្វើការផាកពិន័យនិងកាត់ទ្រុងចេញ។
ក្នុងនោះនៅថ្ងៃ សុក្រ ០៥កើត ខែ ភទ្របទ ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១៤ ខែ កញ្ញា ឆ្នាំ ២០១៨ ក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេស ខេត្តព្រះវិហារ បានធ្វើការ ត្រួតពិនិត្យយានយន្ត សរុបចំនួន ២៣ គ្រឿង ក្នុងនោះ ពិនិត្យឃើញថាត្រឹមត្រូវ ចំនួន ១២ គ្រឿងសំពីងសំពោងចំនួន ០២ គ្រឿង ខ្វះឯកសារ ចំនួន ០៧ គ្រឿងដោះរានខាងក្រោយចំនួន ០១ គ្រឿង គ្មានបណ្ណបើកបរចំនួន ០១ នាក់។
ចំណែកនៅថ្ងៃ ព្រហស្បតិ៍ ០៤កើត ខែ ភទ្របទ ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១៣ ខែ កញ្ញា ឆ្នាំ ២០១៨ ក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេស ខេត្តព្រះវិហារ បានធ្វើការ ត្រួតពិនិត្យយានយន្ត សរុបចំនួន ១៧ គ្រឿង ក្នុងនោះ ពិនិត្យឃើញថាត្រឹមត្រូវចំនួន ០៨ គ្រឿង ខ្វះឯកសារ ចំនួន ០៨ គ្រឿង ឯកសារក្លែងក្លាយ ចំនួន ០១ គ្រឿង។
គួររំលឹកថា កាលពីថ្ងៃសុក្រ ៩រោច ខែមាឃ ឆ្នាំរកា ព.ស២៥៦១ ត្រូវនឹងថ្ងៃទី០៩ ខែកុម្ភៈ ឆ្នាំ២០១៨កន្លងទៅ នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសដែរអញ្ជើញជាអធិបតីភាពបើកការដ្ឋានសាងសង់ស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ សម្តេចតេជោ ហ៊ុន សែនបានដាក់ឱសានវាទ ចាប់ពីម៉ោង០០យប់ថ្ងៃទី៩កុម្ភៈ តទៅ គ្មានវត្តមានឡាន តទ្រុង លើដងផ្លូវទៀតឡើយ។ បើមាននៅតំបន់ណា ភូមិសាស្ត្រណា ចៅហ្វាយខេត្ត និងក្រុងនោះ ជាអ្នកទទួលខុសត្រូវ។ បើនរណាមកតវ៉ាឬអ្នកកាង ទោះជាឋានៈណាក៏ដោយ ក៏ធ្លាក់បុណ្យស័ក្តិទាំងអស់ និងបញ្ចូលព្រៃសតែម្តង៕
