នគរបាលភ្នំពេញថ្មី បង្ក្រាបក្រុមក្មេងស្ទាវ ៧៣នាក់ ដកហូតបានម៉ូតូ២៨គ្រឿង និងកាំបិតបុ័ងតោ ដាវ

ភ្នំពេញ ៖ កាលពី ថ្ងៃទី៨ ខែឧសភា ឆ្នាំ២០២២ កម្លាំងនគរបាលនៃអធិការដ្ឋានខណ្ឌសែនសុខ សហការជាមួយកម្លាំងប៉ុស្តិ៍នគរបាលរដ្ឋបាលភ្នំពេញថ្មី បានចុះប្រតិបត្តិការបង្ក្រាបក្រុមក្មេងស្ទាវបាន៧៣នាក់ កំពុងប្រមូលផ្ដុំគ្នាដកហូតបានម៉ូតូ២៨គ្រឿង និងកាំបិតបុ័ងតោ ដាវ ចម្ពាមកៅស៊ូជាច្រើន នៅចំណុចមុខដីឡូត៍មួយកន្លែងតាមបណ្តោយផ្លូវលេខ១៩៦៦ កែងនឹងផ្លូវលេខ១០០៣ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ក្រោយពីឃាត់ខ្លួនក្មេងស្ទាវទាំងនោះបានភ្លាម សមត្ថកិច្ចក៏បានធ្វើការរុករកនៅក្នុងព្រៃស្ថិតក្នុងដីឡូត៍មួយកន្លែងក៏បានប្រទះឃើញកាំបិតប័ុងតោ ដាវនិងចម្ពាមកៅស៊ូជាច្រើនត្រូវបានកម្លាំងសមត្ថកិច្ចដកហូតទុកជាវត្ថុតាង។
មុននឹងចុះបង្ក្រាបក្មេងស្ទាវខាងលើនេះកម្លាំងនគរបាលនៃអធិការដ្ឋានខណ្ឌសែនសុខ បានសហការជាមួយកម្លាំងប៉ុស្តិ៍នគរបាលរដ្ឋបាលភ្នំពេញថ្មីចុះល្បាតក្នុងមូលដ្ឋានក៏ប្រទះឃើញក្មេងស្ទាវខាងលើកំពុងតែប្រមូលផ្ដុំគ្នា ហើយដោយមានការសង្ស័យសមត្ថកិច្ចក៏បានឃាត់ខ្លួនភ្លាមៗតែម្តង។

ក្មេងស្ទាវ រួមនឹងវត្ថុតាងត្រូវបានកម្លាំងសមត្ថកិច្ចបញ្ជូនខ្លួនទៅអធិការដ្ឋាននគរបាលខណ្ឌសែនសុខដើម្បីធ្វើការសួរនាំនិងស្រាវជ្រាវបន្ត៕