នគរបាលអូស្ត្រាលី រកឃើញគ្រឿងញឿនកូកាអ៊ីនចំនួន ៥០គីឡូក្រាម តម្លៃ ១៤លានដុល្លារ
បរទេស ៖ សារព័ត៌មានReuter បានឲ្យដឹងថា នៅថ្ងៃអង្គារទី៩ឧសភា នគរបាលអូស្ត្រាលី បាបារកឃើញកូកាអ៊ីនចំនួន ៥០គីឡូក្រាម ដែលត្រូវបានគេប៉ាន់ស្មានថាមានតម្លៃប្រហែល ១៤លានដុល្លារសហរដ្ឋអាមេរិក ត្រូវបានគេរកឃើញនៅក្បែរអ្នកមុជទឹកម្នាក់ដែលបានទើរនៅលើច្រាំងទន្លេនៅរដ្ឋ New South Wales ។
នគរបាលរដ្ឋ New South Wales បាននិយាយថា កាលពីថ្ងៃចន្ទ បុរសម្នាក់ដែលពាក់ឧបករណ៍មុជទឹកទំនើបត្រូវបានគេប្រទះឃើញដេកសន្លប់នៅក្បែរទន្លេ Hunter River នៅ Newcastle ចម្ងាយប្រហែល ១៧០ គីឡូម៉ែត្រ ភាគខាងជើងនៃទីក្រុង Sydney ។ ប៉ុន្តែទោះជាមានការព្យាបាលពីគ្រូពេទ្យក៏ដោយ ក៏បុរសមិនស្គាល់អត្តសញ្ញាណនោះបានស្លាប់នៅកន្លែងកើតហេតុ។
កញ្ចប់ដែលមានម្សៅពណ៌សជាច្រើនដែលគេជឿថាជាកូកាអ៊ីនត្រូវបានគេរកឃើញនៅក្បែរនោះ។
អគ្គនាយកស៊ើបអង្កេតនគរបាល New South Wales លោក Robert Critchlow បានប្រាប់អ្នកយកព័ត៌មាន “យើងកំពុងព្យាយាមស្វែងរកថាតើឧប្បត្តិហេតុទាំងពីរមានជាប់ទាក់ទងគ្នា ឬក៏អត់។ វាអាចទាក់ទងគ្នា ប៉ុន្តែយើងនៅបើកចំហចំពោះជម្រើសនៅចំពោះមុខយើង” ៕
