កីឡាការិនី ស្នូឃ័រ និងប៊ីយ៉ាស្រួង ភាវី ឈ្នះមេដាយសំរឹទ្ធ ជើងឯកពិភពលោក
ក្រសួងអប់រំយុវជននិងកីឡា បានចេញសេចក្តីប្រកាស អបអរសាទរកីឡាការិនី ស្នូឃ័រ និងប៊ីយ៉ា ជម្រើសជាតិកម្ពុជា ស្រួង ភាវី ឈ្នះមេដាយសំរឹទ្ធ ពីការប្រកួតកីឡាស្នូឃ័រជើងឯកពិភពលោក 3-Cushion-World Championship Ladies លើកទី៨ នៅទីក្រុង Izmir សាធារណរដ្ឋតួកគី ដោយទទួលបានមេដាយសំរឹទ្ធមួយគ្រឿង បន្ទាប់បានឆ្លងកាត់ចំនួន ៥ប្រកួត។
កីឡាការិនីជម្រើសជាតិប៊ីយ៉ា និងស្នូកឃ័រកម្ពុជា ស្រួង ភាវី ទទួលបានមេដាយសំរឹទ្ធ ក្រោយចាញ់កីឡាការិនីជប៉ុន ៣០-១០ ក្នុងវគ្គពាក់កណ្តាលផ្តាច់ព្រ័ត្រ នៃការប្រកួតជើងឯកស្នូឃ័រ ពិភពលោកនៅប្រទេសតួកគី ដែលបញ្ចប់ទៅកាលពីថ្ងៃទី២០កញ្ញា។
កីឡាការិនីតំណាងឲ្យកម្ពុជា ស្រួង ភាវី ធ្វើបានល្អក្នុងការប្រកួតសន្សំពិន្ទុ ក្នុងពូលរហូតឡើងវគ្គ៨នាក់ចុងក្រោយ និងវគ្គ៤នាក់ចុងក្រោយ ប៉ុន្តែសម្រាប់ការប្រកួតវគ្គពាក់កណ្តាលផ្តាច់ព្រ័ត្រ ឬវគ្គ៤នាក់ចុងក្រោយបានចាញ់កីឡាការិនីជប៉ុន Orie HIDA ដោយពិន្ទុ ៣០-១០ ដែលបាត់បង់ឱកាសឡើងវគ្គផ្តាច់ព្រ័ត្រ។ តាមពិតទៅ ភាវី ធ្លាប់បានឈ្នះកីឡាការិនីជប៉ុនរូបនេះ ដោយពិន្ទុ ២៥-២៤ ក្នុងសន្សំពិន្ទុតាមពូល។
ចំពោះចំណាត់ថ្នាក់លេខ១បានទៅកីឡាការិនីហុល្លង់ Therse Klompenhouwer ដែលទទួលបានមេដាយមាស បន្ទាប់ពីឈ្នះកីឡាការិនីជប៉ុន Hida ដែលទទួលបានមេដាយប្រាក់ ខណៈកីឡាការិនីម្ចាស់ផ្ទះទួរគី Gulsen DEGENER បានលេខ៤ទទួលបានមេដាយសំរឹទ្ធផ្ទួន។
ស្រួង ភាវី នឹងទទួលបានប្រាក់រង្វាន់ ៦៤លានរៀល (១៦០០០ ដុល្លារអាមេរិក) តាមអនុក្រឹត្យរាជរដ្ឋាភិបាល។ មេដាយសំរឹទ្ធនេះគឺស្មើនឹងទទួលបានចំណាត់ថ្នាក់លេខ៣ ក្នុងព្រឹត្តិការណ៍ (8th World Championship Ladies 3-Coshion Izmir )។
បើតាមផេកហ្វេសប៊ុក អ្នកស្រី ស្រួង ភាវី បានថ្លែងថា “ខ្ញុំជាកូនស្រីរបស់កម្ពុជា ត្រូវតែក្លាហាន ត្រូវតែរឹងមាំ ដើម្បីដើរ លើពិភពលោក ខ្ញុំបានឈ្នះមេដាយសំរឹទ្ធ លេខ៣ ពីការប្រកួតកីឡាស្នូឃ័រ ជើងឯកពិភពលោក នៅតួកគី ជាការប្រគួតដំបូងសម្រាប់ខ្ញុំ សូមអរគុណពុកម៉ែបងប្អូន នៅកម្ពុជាទាំងអស់”៕