បញ្ឈប់ការប្រកបអាជីវកម្មទូកកាណូតទេសចរណ៍ ឈ្មោះ បុប្ផាអង្គរ ជាស្ថាព័រចាប់ពីថ្ងៃនេះតទៅ
ភ្នំពេញ៖ក្រោយទទួលបានព័ត៌មានចែកចាយនៅតាមបណ្តាញសង្គមពីម្ចាស់គណនីហ្វេសបុកឈ្មោះ Buntha Chheang បានបង្ហោះវីដេអូអំពីសកម្មភាពបុគ្គលនៅលើទូកបោះសម្រាមចូលទន្លេរ រួចមក។
នាព្រឹកថ្ងៃទី២៩ ខែឧសភា ឆ្នាំ២០២៤ វេលាម៉ោង ១០:០០នាទីរដ្ឋបាលខណ្ឌដូនពេញ និងអង្គភាពពាក់ព័ន្ធបានអញ្ជើញ ម្ចាស់ទូកកាណូតទេសចរណ៍ដែលមានឈ្មោះ បុប្ផាអង្គរ មកសាកសួរ ហើយម្ចាស់ទូកខាងលើ បានអះអាងទទួលស្គាល់ថាពិតជាបានបោះចោលសំរាមចូលក្នុងទន្លេពិតប្រាកដមែន។
បន្ទាប់ពីបានធ្វើការសាកសួរ រួចមក រដ្ឋបាលខណ្ឌបានសម្រេចដូចខាងក្រោម ÷១-អប់រំណែនាំដល់ម្ចាស់ទូកកាណូតទេសចរណ៍ខាងលើ ឱ្យយល់ច្បាស់ពីច្បាប់ស្តីពីបរិស្ថាន។
២-ផាកពិន័យម្ចាស់ទូកកាណូតទេសចរណ៍ខាងលើ ជាទឹកប្រាក់ចំនួន ២០០,០០០រៀល តាមជំពូកទី៧ នៃអនុក្រឹត្យលេខ ១១៣ អនក្រ.បក របស់ក្រសួងបរិស្ថាន។
៣-បញ្ឈប់ការប្រកបអាជីវកម្មទូកកាណូតទេសចរណ៍ឈ្មោះ បុប្ផាអង្គរ ជាស្ថាព័រចាប់ពីថ្ងៃនេះតទៅ។
រដ្ឋបាលខណ្ឌដូនពេញ និងអង្គភាពពាក់ព័ន្ធសូមអរគុណដល់ម្ចាស់គណនី Buntha Chheang ដែលបានបង្ហោះ ក្នុងន័យឈឺឆ្អើល ដើម្បីចូលរួមថែរក្សាទន្លេរ និងបរិស្ថានរបស់យើងទាំងអស់គ្នា។
បរិស្ថានស្អាតផ្តើមចេញពីការចូលរួមយើងទាំងអស់គ្នាពីរដ្ឋបាលខណ្ឌដូនពេញ។
ជាមួយគ្នានេះដែរប្រជាពលរដ្ឋនិងមន្ត្រីរាជការក្រោយឃើញបណ្ដាញសង្គមចែកចាយព័ត៌មានតគ្នារួចមកបាននាំគ្នារិៈគន់ចំពោះទង្វើអាក្រក់ របស់កាណូតទេសចរណ៌មួយគ្រឿងឈ្មោះបុប្ផាអង្គរទេសចរណ៌ដែលចោលសំរាមក្នុងទន្លេសាបនាព្រឹកថ្ងៃទី២៩ឧសភា២០២៤នេះដែលមិនគួរយកគំរូតាម ជាទង្វើដែលបំផ្លាញមុខមាត់ និងការខិតខំរបស់អាជ្ញាធរ រាជធានីហេីយករណីនេះត្រូវបានអាជ្ញាធរមានសមត្ថកិច្ច ខណ្ឌដូនពេញនិងមន្ទីរពាក់ព័ន្ធហៅអ្នកទទួលខុសត្រូវមកសួរនាំ និងចាត់វិធានការរួចហើយ៕