ឯកឧត្តមបណ្ឌិត ជិន ម៉ាលីន៖អាជ្ញាធរជាតិដោះស្រាយវិវាទក្រៅប្រព័ន្ធតុលាការ «អ.ដ.ក»គឺជាស្ថាប័នសំខាន់មួយក្នុងការជួយសម្រួលដល់ដំណើរការដោះស្រាយវិវាទនៅកម្ពុជា

កណ្ដាល៖ឯកឧត្តមបណ្ឌិត ជិន ម៉ាលីន បានគូសបញ្ជាក់ថា អាជ្ញាធរជាតិដោះស្រាយវិវាទក្រៅប្រព័ន្ធតុលាការ «អ.ដ.ក»គឺជាស្ថាប័នសំខាន់មួយក្នុងការជួយសម្រួលដល់ដំណើរការដោះស្រាយវិវាទនៅកម្ពុជា ដោយផ្តល់នូវយន្តការដោះស្រាយវិវាទក្រៅប្រព័ន្ធតុលាការ ដែលមានលក្ខណៈសម្រួល ឆាប់រហ័ស ចំណាយតិច និងរក្សាបាននូវសម្ព័ន្ធភាពរវាងភាគីវិវាទ។
ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជាអនុប្រធានប្រចាំការនៃ «អ.ដ.ក. »ជាតំណាងដ៏ខ្ពង់ខ្ពស់ ឯកឧត្តម កើត រិទ្ធ ឧបនាយកនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. បានថ្លែងបែបនេះខណៈដែលឯកឧត្ដមធ្វើជាគណៈអធិបតីនៃសិក្ខាសាលាមួយផ្សព្វផ្សាយអំពីបេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ «អ.ដ.ក.»នៅសាលាខេត្តកណ្តាលកាលពីថ្ងៃទី២២ ខែសីហា ឆ្នាំ២០២៤។
ឯកឧត្ដមបន្តថា សិក្ខាសាលានេះ មានគោលបំណងផ្សព្វផ្សាយ និងបញ្ជ្រាបការយល់ដឹងអំពីតួនាទី និងសារៈសំខាន់របស់ «អ.ដ.ក. »ដែលជាស្ថាប័នថ្មីមួយរបស់រាជរដ្ឋាភិបាល និងជាយន្តការបំពេញបន្ថែមឱ្យប្រព័ន្ធដោះស្រាយវិវាទបច្ចុប្បន្ននៅកម្ពុជា ជូនដល់មន្ត្រីថ្នាក់ក្រោមជាតិ ដែលជាតួអង្គនៅជិតប្រជាពលរដ្ឋ និងជាអ្នកផ្តល់សេវាដោះស្រាយវិវាទដោយផ្ទាល់ជូនប្រជាពលរដ្ឋនៅមូលដ្ឋាន។
ឯកឧត្ដមបន្តទៀតថាសិក្ខាសាលានេះ បានផ្តោតទៅលើការផ្សព្វផ្សាយ និងបញ្ជ្រាបការយល់ដឹងអំពីបេសកកម្ម និងសារៈសំខាន់នៃ «អ.ដ.ក. »ដែលជាស្ថាប័នថ្មីមួយរបស់រាជរដ្ឋាភិបាល និងជាយន្តការបំពេញបន្ថែមឱ្យប្រព័ន្ធដោះស្រាយវិវាទបច្ចុប្បន្ននៅកម្ពុជា។ វាមានសារៈសំខាន់យ៉ាងខ្លាំងក្នុងការជួយដល់មន្ត្រីថ្នាក់ក្រោមជាតិ ដែលជាតួអង្គនៅកៀកជិតនឹងប្រជាពលរដ្ឋ និងជាអ្នកផ្តល់សេវាដោះស្រាយវិវាទដោយផ្ទាល់ជូនប្រជាពលរដ្ឋនៅមូលដ្ឋាន ឱ្យយល់ដឹងកាន់តែច្បាស់អំពីតួនាទី និងភារកិច្ចរបស់ «អ.ដ.ក. »ក្នុងការដោះស្រាយវិវាទនានា។
ឯកឧត្តមបណ្ឌិត ជិន ម៉ាលីន បានគូសបញ្ជាក់ថា អ.ដ.ក. គឺជាស្ថាប័នសំខាន់មួយក្នុងការជួយសម្រួលដល់ដំណើរការដោះស្រាយវិវាទនៅកម្ពុជា ដោយផ្តល់នូវយន្តការដោះស្រាយវិវាទក្រៅប្រព័ន្ធតុលាការ ដែលមានលក្ខណៈសម្រួល ឆាប់រហ័ស ចំណាយតិច និងរក្សាបាននូវសម្ព័ន្ធភាពរវាងភាគីវិវាទ។ តាមរយៈសិក្ខាសាលានេះ មន្ត្រីថ្នាក់ក្រោមជាតិនឹងទទួលបានចំណេះដឹង និងជំនាញចាំបាច់ក្នុងការផ្សព្វផ្សាយ និងណែនាំប្រជាពលរដ្ឋអំពីដំណើរការដោះស្រាយវិវាទតាមរយៈ «អ.ដ.ក.»សិក្ខាសាលានេះ ក៏បានផ្តល់ឱកាសដល់អ្នកចូលរួមក្នុងការសួរសំណួរ និងពិភាក្សាអំពីបញ្ហាប្រឈម និងយន្តការដោះស្រាយវិវាទនានា ដែលអាចជួយពួកគេក្នុងការអនុវត្តការងារប្រចាំថ្ងៃរបស់ខ្លួនបានកាន់តែមានប្រសិទ្ធភាព។
ឯកឧត្ដមបញ្ជាក់ផងដែរថាសិក្ខាសាលាផ្សព្វផ្សាយអំពីបេសកកម្មនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ នៅខេត្តកណ្តាល នេះ ត្រូវបានបញ្ចប់ដោយជោគជ័យ ដោយបានផ្តល់នូវចំណេះដឹង និងជំនាញដ៏សំខាន់ដល់មន្ត្រីថ្នាក់ក្រោមជាតិ ក្នុងការផ្សព្វផ្សាយ និងណែនាំប្រជាពលរដ្ឋអំពីដំណើរការដោះស្រាយវិវាទតាមរយៈ «អ.ដ.ក. »នេះជាជំហានដ៏សំខាន់មួយក្នុងការពង្រឹងប្រព័ន្ធដោះស្រាយវិវាទនៅកម្ពុជា និងធានាឱ្យប្រជាពលរដ្ឋទទួលបាននូវយុត្តិធម៌ដោយឆាប់រហ័ស និងមានប្រសិទ្ធភាព។
គួរបញ្ជាក់ថា៖សិក្ខាសាលានេះបានប្រព្រឹត្តទៅដោយមានការចូលរួមពីថ្នាក់ដឹកនាំជាច្រើនរូប រួមមាន ឯកឧត្តម ប៉ូច សោភ័ណ សមាជិក អ.ដ.ក., ឯកឧត្តម យ៉ម ផារ៉ូត អគ្គលេខាធិការនៃ អ.ដ.ក., ឯកឧត្តម នូ សាខន ប្រធានក្រុមប្រឹក្សាខេត្តកណ្តាល, ឯកឧត្តម នុត ពុធដារ៉ា អភិបាលរងខេត្តកណ្តាល, ឯកឧត្តម ជឺ សុខ ប្រធានសាលាដំបូងខេត្តកណ្តាល, ឯកឧត្តម លាវ ស្រេង ព្រះរាជអាជ្ញានៃអយ្យការអមសាលាដំបូងខេត្តកណ្តាល, ថ្នាក់ដឹកនាំនៃអគ្គលេខាធិការដ្ឋាននៃ អ.ដ.ក., សមាជិកក្រុមប្រឹក្សាខេត្តកណ្តាល និងដោយមានការចូលរួមពីមន្ត្រីនៃអង្គភាពពាក់ព័ន្ធជុំវិញខេត្តកណ្តាល រួមមាន តំណាងស្នងការដ្ឋាននគរបាលខេត្ត, ប្រធានមន្ទីរពាក់ព័ន្ធ, ប្រធានក្រុមប្រឹក្សាក្រុង-ស្រុក, អភិបាលក្រុង-ស្រុក, ប្រធានការិយាល័យប្រជាពលរដ្ឋខេត្ត, ប្រធានការិយាល័យនីតិកម្មនិងសម្រុះសម្រួលវិវាទមូលដ្ឋានក្រុង-ស្រុក និងមេឃុំ ចៅសង្កាត់ ទូទាំងខេត្តកណ្តាល សរុបចំនួន ២១០ រូប៕