ផ្កា៣យោធាចារិតអន់ ជិះឡានម៉ាក Mazda ខ.ម 02.2.1215 ផឹកស៊ីហៅនារី អ្នកចម្រៀងម្នាក់ទៅគេង តែនាងមិនព្រម ទះ៣កំផ្លៀងយ៉ាងព្រៃផ្សៃ
ភ្នំពេញ៖ បុរសដែលអះអាងថា ជាឧត្តមសេនីយ៍ឯកយោធា (ពាក់ផ្កាយ៣) ម្នាក់ រួមនិងបក្ខពួក មានប្រុស មានស្រីជាង១០នាក់ទៀត ចូលផឹកស៊ីនៅ ភោជនីយដ្ឋានបឹងមាស ដល់ពេលស្រវឹង តណ្ហាពុះកញ្រ្ជោល ក៏បានបបួលនារីជាអ្នកចម្រៀង ទៅគេងជាមួយ តែនាងមិនព្រម ក៏ខឹងទះនាង៣កំផ្លៀង រួចរត់គេចខ្លួនបាត់ស្រមោល។
ហេតុការណ៍នេះបានកើតឡើងកាលពីម៉ោងជាង១១យប់ថ្ងៃទី២៧ ខែកុម្ភៈ ឆ្នាំ២០១៩ ចំណុចក្នុងភោជនីយដ្ឋាន បឹងមាស ស្ថិតនៅតាមបណ្តោយផ្លូវជាតិលេខ៦ ក្នុងសង្កាត់ជ្រោយចង្វា ខណ្ឌជ្រោយចង្វា។
សាក្សីនិយាយថា ហេតុការណ៍ទះកំផ្លៀងចំនួន២ដៃ លើស្ត្រីអ្នកចម្រៀងឈ្មោះ យិន ផល្លី ហៅស្រីពៅ អាយុ៣២ឆ្នាំ បានកើតឡើងនាម៉ោងប្រមាណជាង១០យប់ ថ្ងៃទី២៧កុម្ភៈនៅក្នុងភោជនីយដ្ឋានបឹងមាស លើផ្លូវជាតិលេខ៦ ភូមិគៀនឃ្លាំង សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។ ស្ត្រីចម្រៀងរូបនោះ បានថ្លែងថា នាងបានដាក់ពាក្យបណ្តឹង ទៅអាជ្ញាធរមូលដ្ឋាន ដើម្បីរកយុត្តិធម៌ហើយ។ បុរសដែលប្រព្រឹត្តអំពើហិង្សាបង្ខំស្ត្រីចម្រៀងនោះ ឈ្មោះ ពៅ ស៊ីនួន ដែលអះអាងថា ជាផ្កាយបី ក្នុងជួរកងយោធពលខេមរភូមិន្ទ។ រូបថតរបស់បុរសអះអាងថា ជាផ្កាយបីជាមួយនឹងរថយន្តស្លាកលេខយោធា ត្រូវបានសាក្សីថតទុកថែមទៀត ក្រោយអំពើហិង្សាទះកំផ្លៀង២ដៃ ។
បុរសដែលបានអួតខ្លួនថា ជាមន្ត្រីយោធានោះ បានហៅអ្នកចម្រៀងចំនួន៤នាក់ រួមទាំងរូបស្ត្រីរងគ្រោះផងដែរ ដែលកំពុងច្រៀងនៅលើឆាក ឲ្យចុះមករាំកំដរនៅខាងក្រោម។ ក្នុងពេលកំពុងតែរាំ ជនដៃដល់នោះ បានមកនិយាយជាមួយរូបនាងថាឲ្យនៅផឹកស៊ីកំដររូបគេទៅ គេនិងឲ្យលុយធីប២០ដុល្លារ បន្ទាប់មករូបនាងក៏មិនបានឆ្លើយឆ្លងវែងឆ្ងាយអ្វីឡើយ។
ឧត្តមសេនីយ៍ឯកយោធានោះ ក្នុងពេលកំពុងស៊ីផឹកជាមួយស្ត្រីអ្នកចម្រៀងនោះ បាននិយាយលួងលោមឲ្យរូបនាង ទៅដេកជាមួយដោយឲ្យតម្លៃខ្លួនចំនួន300ដុល្លារ។ ប៉ុន្តែនារីរងគ្រោះ បានបដិសេដថា នាងគ្រាន់តែជាអ្នកចម្រៀង និងមិនមែនមកលក់ខ្លួនទេ។ ក្រោយការលួងលោមមិនបានសម្រេច បុរសអះអាងខ្លួនជាផ្កាយបីនោះ បានទះកំផ្លៀងខាងឆ្វេង របស់ស្ត្រីអ្នកចម្រៀងនោះ និងបានបណ្តេញចេញពីតុ ប៉ុន្តែពេលដែលស្ត្រីរងគ្រោះ មិនទាន់បានចេញពីតុផុតផង បុរសយោធាផ្កាយបីនោះ បានវាយនាងមួយដៃទៀត ចំក្បាលពីមុខ រួចក៏ឡើងរថយន្តជិះចេញពីហាង ។ ភ្លាមនោះសាក្សី និងនារីរងគ្រោះ បានថតស្លាកលេខរថយន្តបាន គឺម៉ាក Mazda ស្លាកលេខ ខ.ម 02.2.1215 ។ បន្ទាប់មកនារីរងគ្រោះ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលជ្រោយចង្វា នៅម៉ោងកើតហេតុប្រហែល២៣និង០០នាទីយប់។ មិនមានសេចក្តីរាយការណ៍បញ្ជាក់ថា តើបុរសអះអាងជាផ្កាយបីនោះ ស្ថិតក្នុងអង្គភាពណាមួយទេ និងមិនមានប្រភពណាមួយអះអាងបន្ថែមទៀត លើករណីចោទប្រកាន់នោះឡើយ។
មកដល់ពេលនេះនៅមិនទាន់ដឹងថា សមត្ថកិច្ចនគរបាលប៉ុស្តិ៍រដ្ឋបាល ចាត់ការលើសំណុំរឿងនេះ យ៉ាងណានៅឡើយទេ៕