រថយន្តឡិចស៊ីស បុកម៉ូតូក្រឡាប់បះជើង បណ្តាលឲ្យស្លាប់ម្នាក់ របួសធ្ងន់២នាក់
ពោធិ៍សាត់ៈ បុរសម្នាក់ស្លាប់ និង២នាក់ទៀតរងរបួសធ្ងន់ ដោយករណីគ្រោះថ្នាក់ចរាចររវាងរថយន្តឡិចស៊ីស បុកម៉ូតូក្រឡាប់បះជើង កើតឡើងនៅលើផ្លូវជាតិលេខ៥ ចន្លោះគីឡូម៉ែត្រលេខ២០៦-២០៧ ស្ថិតត្រង់ចំណុចភូមិព្រៃផ្តៅ ឃុំបឹងខ្នារ ស្រុកបាកាន ខេត្តពោធិ៍សាត់ ។ ហេតុការណ៍គ្រោះថ្នាក់នេះ កើតឡើងកាលពី វេលាម៉ោង១០និង៤៥នាទី នៅព្រឹកថ្ងៃទី១២ ខែមីនាឆ្នាំ២០១៩ ។
តាមប្រភពព័ត៌មានបានឲ្យដឹងថា មុនពេលកើតហេតុគេឃើញម៉ូតូធន់ហុងដា១គ្រឿងពណ៌ខ្មៅ ពាក់ស្លាកលេខបាត់ដំបង1V-3210 ជិះគ្នា៣នាក់បើកបរក្នុងទិសដៅពីកើតទៅលិច ខណៈមកដល់ចំណុចខាងលើស្រាប់តែមានរថយន្តម៉ាកឡីចស៊ីស១គ្រឿងពណ៌ស្កពាក់ស្លាកលេខភ្នំពេញZZ-4810 បើកបរក្នុងទិសដៅពីលិចទៅកើត(បញ្រ្ចាសទិសគ្នា) បើកបោះពួយយ៉ាងលឿនបានបុកអ្នកជិះម៉ូតូយ៉ាងពេញទំហឹង បណ្តាលឲ្យអ្នកជិះម៉ូតូស្លាប់ម្នាក់និងអ្នករួមដំណើរ២នាក់ទៀតរងរបួសធ្ងន់ ក្រោយពេលកើតហេតុ ជនរងគ្រោះបានបញ្ជូនទៅមន្ទីរពេទ្យបង្អែកបឹងខ្នារ ចំពោះអ្នកបើកបររថយន្តរត់គេចខ្លួនបាត់ស្រម៉ោល ។
យោងតាមរបាយការណ៍របស់ សមត្ថកិច្ចមូលដ្ឋាន បានឲ្យដឹងថា តាមការឲ្យដឹងពីអ្នកឃើញហេតុការណ៍នេះ ករណីគ្រោះថ្នាក់ បណ្តាលមកពីអ្នកបើកបររថយន្ត បើកវ៉ាជែងរថយន្ត១គ្រឿងទៀតហើយវេរចង្កូត ទៅបុកអ្នកជិះម៉ូតូចំពីមុខតែម្តងហើយត្រឡាប់រថយន្តពីរបីត្រឡប់ តែមិនបណ្តាលឲ្យរងរបួសអ្នកបើកបរនោះឡើយ ។
សមត្ថកិច្ចបានបន្តថា ជនរងគ្រោះទី១ ឈ្មោះ លឹម ភក្តី ភេទប្រុស អាយុ៣៨ឆ្នាំ ។ ទី២ ឈ្មោះ ជុំ អាង ភេទប្រុស អាយុ៥៩ឆ្នាំ រីឯជនរងគ្រោះម្នាក់ មិនស្គាល់អត្តសញ្ញាណបានស្លាប់ រស់នៅស្រុករុក្ខគិរី ខេត្តបាត់ដំបង។ ចំពោះអ្នករងរបួស២នាក់ កំពុងសម្រាកនៅមន្ទីរពេទ្យ សមត្ថកិច្ចកំពុងធ្វើស្រាវជ្រាវរកសាច់ញាតិ និងលំនៅដ្ឋានរបស់ពួកគាត់ ។
ក្រោយពេលកើតហេតុសមត្ថកិច្ច បានយករថយន្តបង្កមករក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ ដើម្បីកសាងសំណុំរឿងតាមនិតិវិធីច្បាប់៕
