សម្តេចតេជោ ហ៊ុន សែនប្រកាសបន្តវិធានការណ៍ផ្លូវច្បាប់លើទណ្ឌិត សម រង្ស៊ី
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកចក្រកម្ពុជា បានប្រកាសថា សម្តេចនឹងបន្តចាត់វិធានការតាមផ្លូវច្បាប់ ជានិច្ចសម្រាប់ជនដែលត្រូវបាន ចោទប្រកាន់នាពេលកន្លងទៅ (ទណ្ឌិត សម រង្ស៊ី) ខណៈបុគ្គលនេះ បានស្រែកពី ក្រៅប្រទេស ជាច្រើនលើកច្រើនសារ ឲ្យប្រជាពលរដ្ឋខ្មែរ និងយោធាធ្វើការបះបោរផ្តួលរំលំរាជរដ្ឋាភិបាលស្របច្បាប់ ដែលបានកើតចេញពីការបោះឆ្នោតនោះ។
ក្នុងវគ្គសំនួរ ចម្លើយ ក្នុងឱកាសសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញឡើងថ្លែងសុន្ទរកថា គន្លឹះក្នុងសន្និសីទអន្តរជាតិលើកទី២៥ ស្តីពី “អនាគតរបស់អាស៊ី” នៅសណ្ឋាគារអ៊ីមភៀរៀល ប្រទេសជប៉ុន នៅថ្ងៃទី ៣០ ខែឧសភា ឆ្នាំ២០១៩ សម្តេចតេជោ ហ៊ុន សែន បានប្រកាសថា សម្តេច កំពុងរង់ចាំការធ្វើសង្គ្រាម ជាមួយមនុស្ស ជាជនក្បត់ជាតិ ដែលបានបានប្រកាសឲ្យប្រជាពលរដ្ឋខ្មែរខ្លះ នៅជប៉ុន កូរ៉េខាងត្បូង និងថៃ ក៏ដូចជា នៅក្នុងប្រទេសកម្ពុជា ធ្វើសង្គ្រាមដើម្បីចាប់សម្តេចមកផ្ដន្ទាទោសនោះ។
ជាមួយគ្នានោះដែរ សម្តេចតេជោ នាយករដ្ឋមន្ត្រី ក៏បានប្រកាសឲ្យជនក្បត់ជាតិ សម រង្ស៊ី និងពលរដ្ឋខ្មែរ មួយចំនួន ដែលចង់ចាប់សម្តេច ដោយសម្តេច បានអះអាងថា សម្តេចកំពុងរងចាំពួកគេឲ្យមកចាប់សម្តេច ដល់គេហដ្ឋានរបស់សម្តេចតែម្តង ប្រសើរបើអ្នកណា ឬបុគ្គលណា ហ៊ានមកនោះ។
យ៉ាងណាក៏ដោយនៅក្នុងសន្និសីទនោះសម្តេចតេជោ ហ៊ុន សែននាយករដ្ឋមន្ត្រីក៏បានបញ្ជាក់ប្រាប់ដល់បុគ្គលទាំងនោះ ក៏ដូចជាពិភពលោកថា សម្តេចមិនធ្វើអ្វីក្រៅពីកិច្ចការដែល សម្តេចកំពុងធ្វើនោះទេ ពោលគឺកិច្ចការងារបំរើផលប្រយោជន៍ជូនដល់ប្រជាពលរដ្ឋ និងប្រ ទេសជាតិទាំងមូលតែម្តងដូច្នេះអ្វី ដែលពួកក្បត់ជាតិចង់ធ្វើសង្គ្រាមជាមួយសម្តេចនោះគឺ សម្តេចរងចាំជាដរាប។
ក្នុងនោះដែរសម្តេចតេជោ នាយករដ្ឋមន្ត្រីក៏បានប្រកាសសាជាថ្មីចំពោះ អតីតតំណាងរាស្ត្រគណបក្សប្រឆាំងដែលត្រូវបានតុលាការសម្រេចមិនឲ្យធ្វើនយោបាយកាលពីចុងឆ្នាំ២០១៧ កន្លងទៅថា ពួកគេអាចមានឱកាសចូលរួមធ្វើនយោបាយឡើងវិញដោយអាច ឈរឈ្មោះនិងបង្កើតគណបក្សនយោបាយដើម្បីចូលរួមប្រកួតប្រជែងក្នុងការបោះឆ្នោតឃុំ សង្កាត់ និងការបោះឆ្នោតតំណាងរាស្ត្រអាណត្តិទី៧ នាពេលខាងមុខនេះផងដែរ ប្រសិនបើពួក គេគេចង់នោះ។
សម្តេចតេជោ ហ៊ុន សែន បានស្នើឱ្យបណ្តាប្រទេសទាំងឡាយត្រូវគោរពនូវវិធានការច្បាប់របស់កម្ពុជា ក៏ដូចជាបណ្តាប្រទេសដទៃទៀត។ «ខ្ញុំគិតយើងគួរត្រូវបានគោរពនូវវិធានច្បាប់តាមប្រទេសនីមួយៗ។ ពិតហើយយើងយល់ពីកង្វល់នានា ប៉ុន្តែគេត្រូវសិក្សាពីអង្គហេតុ និងអង្គច្បាប់ឱ្យបានច្បាស់កុំដាក់បញ្ហាទាក់ទិនរឿងផ្លូវច្បាប់ទៅជាសកម្មភាពនយោបាយ ដែលវាមិនយុត្តិធម៌សម្រាប់កម្ពុជានោះទេ ហើយវាក៏មិនយុត្តិធម៌សម្រាប់ប្រទេសទាំងឡាយ ដែលគេបានអនុវត្តន៍ច្បាប់នៅក្នុងប្រទេសរបស់គេ ហើយបែរជាយើងទៅរារាំង»។
«ខ្ញុំបាននិយាយហើយ ភាពសមស្រម មនោគមន៍វិជ្ជា ការគ្រប់គ្រង និងភាពសមស្របនៅក្នុងប្រទេសមួយ មិនប្រាកដថា យកទៅអនុវត្តន៍នៅក្នុងប្រទេសមួយផ្សេងទៀតបានទេ។ នេះវាជារឿងធម្មតាខ្លាំងណាស់។ ប្រជាធិបតេយ្យនៅប្រទេសជប៉ុន មានបែបផែនមួយ ប្រជាធិបតេយ្យនៅកូរ៉េខាងត្បូងមានបែបផែនមួយទៅ ប្រជាធិបតេយ្យនៅក្នុងប្រទេសនេះ ប្រទេសនោះ មានបែបផែនមួយទៅ។ ដូច្នេះយើងគួរគោរពគ្នាទៅលើបញ្ហានេះ»។ នេះជាការពន្យល់បន្ថែមរបស់សម្តេចតេជោនាយករដ្ឋមន្ត្រី។
ជាមួយគ្នានេះសម្តេចតេជោ ហ៊ុន សែន ក៏បានប្រកាសបង្ហាញជំហរជុំវិញសំណុំរឿងអតីតអ្នកនយោបាយអតីតគណបក្សប្រឆាំងផងដែរថា នៅតែបន្តចាត់វិធានការច្បាប់ចំពោះអ្នកមានទោស។ សម្តេចតេជោ ហ៊ុន សែន ក៏បានប្រកាសផងដែរ ពីការរង់ចាំធ្វើសង្គ្រាមជាមួយទណ្ឌិត សម រង្ស៉ី ដែលសម្តេចហៅថាជា «ឆ្កែមួយក្បាល» នោះ ជុំការប្រកាសរបស់លោកក្នុងការកៀរគរមនុស្សចូលមកចាប់សម្តេច។
សម្តេចតេជោ បានថ្លែងបញ្ជាក់ដូច្នេះ «ខ្ញុំសូមប្រកាសថ្ងៃនេះថា វិធានការច្បាប់នឹងត្រូវតែបន្តចំពោះជនដែលត្រូវបានចោទប្រកាន់។ ទន្ទឹមនេះ ខ្ញុំក៏កំពុងរង់ចាំការធ្វើសង្គ្រាមមួយ ដែលគេបានប្រកាសថា នឹងចលនាឱ្យពលរដ្ឋខ្មែរខ្លះនៅជប៉ុន ខ្មែរខ្លះនៅកូរ៉េខាងត្បូង ខ្មែរខ្លះនៅថៃ ខ្មែរខ្លះនៅក្នុងប្រទេសកម្ពុជា ធ្វើសង្គ្រាម ដើម្បីមកចាប់ខ្ញុំ។ ដរាបគេមិនទាន់ធ្វើចប់ទេខ្ញុំក៏មិនទាន់ធ្វើអ្វីដែរ អ៊ីចឹងខ្ញុំសូមប្រកាសដោយចំហរពីទីនេះ ឱ្យពិភពលោកបានដឹងថា ខ្ញុំកំពុងរង់ចាំសង្គ្រាមមួយដែលវានឹងកើតឡើង តាមរយៈការប្រកាសរបស់ជនក្បត់ជាតិ គេហៅថា ឆ្កែមួយក្បាល ដែលស្រែកពីក្រៅប្រទេស។ ប្រកាសឱ្យប្រជាពលរដ្ឋចាប់ហ៊ុន សែន។ អ៊ីចឹងខ្ញុំមិនធ្វើអ្វីផ្សេងទៀត ក្រៅតែពីដំណើរការផ្លូវច្បាប់ ហើយទុកលទ្ធភាពឱ្យឆ្កែមួយក្បាល ដែលស្រែកពីបរទេសឱ្យកងទ័ពប៉ះបោរ ឱ្យប្រជាពលរដ្ឋប៉ះបោរ ហើយចាប់ ហ៊ុន សែន យកទៅផ្តន្ទាទោសខ្ញុំទុកពេលឱ្យគេធ្វើ។ ដរាបណាគេមិនទាន់ប្រកាសចុះចាញ់សង្គ្រាមនេះទេ ខ្ញុំក៏មិនទាន់ធ្វើអ្វីផ្សេងទៀតដែរ។ ហើយខ្ញុំដំណើរការទៅតាមអ្វីដែលខ្ញុំកំពុងធ្វើ ហើយនឹងដាក់ចេញនូវគោលដៅទាក់ទិនជាមួយដំណើរការសេដ្ឋកិច្ច ហើយឥឡូវនេះទើបនឹងដំណើរការការបោះឆ្នោតក្រុមប្រឹក្សា»។
សម្តេចតេជោ ហ៊ុន សែន ក៏បានថ្លែងបង្ហាញពីការផ្តល់ឱកាសរបស់សម្តេចទៅដល់អ្នកនយោបាយជាប់បំរាមទាំងអស់នោះ ឱ្យសុំសិទ្ធិធ្វើនយោបាយឡើងវិញ។ តែការសុំសិទ្ធិធ្វើនយោបាយឡើងវិញ ឬរង់ចាំរហូតដល់បំរាមរួចផុតដោយខ្លួនឯងនៅកំលុងខែវិច្ឆិកា ឆ្នាំ២០២២ ជាការសម្រេចចិត្តរបស់អ្នកនយោបាយទាំងអស់នោះ។
សម្តេចតេជោ បានបញ្ជាក់បន្ថែមដូច្នេះថា «យើងខ្ញុំបានផ្តល់លទ្ធភាពឱ្យអ្នកជាប់បំរាមធ្វើនយោបាយជ្រើសរើសខ្លួនឯងទៅ។ អ្នកឯងជ្រើសរើសការសម្រេចចិត្តមកធ្វើបក្សនយោបាយ ធ្វើនយោបាយឡើងវិញយើងខ្ញុំផ្តល់សិទ្ធិឱ្យពួកគេ។ ប៉ុន្តែយើងខ្ញុំនឹងមិនផ្តល់ឱ្យដោយគេមិនបានសុំនោះទេ។ អ៊ីចឹងគេជ្រើសរើសទៅ ខ្ញុំបានទុកលទ្ធភាពឱ្យគេជ្រើសរើសទាំងអស់។ អ្នកជ្រើសរើសចូលរួមបោះឆ្នោតឆ្នាំ២០២២ ដោយសុំសិទ្ធិធ្វើនយោបាយ ឬរង់ចាំឱ្យមានការបោះឆ្នោតឆ្នាំ២០២២ បោះឆ្នោតឃុំ សង្កាត់ ២០២២ហើយ បំរាមនឹងត្រូវចប់នៅខែវិច្ឆិកា ឆ្នាំ២០២២។ ចាំពេលនោះចាំអ្នកឯងធ្វើនោះជារឿងរបស់គេ។ ទុកសិទ្ធិឱ្យគេ។ តែខ្ញុំក៏រងចាំមើលសង្គ្រាមដែលគេបានប្រកាសនេះ តើគេធ្វើអ្វីចំពោះខ្ញុំ? ខ្ញុំទុកសេរីភាពឱ្យគេ បើយើងខ្ញុំប្រកាសខុសពីផ្លូវនេះ គេនឹងចាត់ទុកថា ខ្ញុំចាញ់សង្គ្រាម ខ្ញុំមិនអាចចាញ់សង្គ្រាម ហើយក៏រង់ចាំមើលតើគេអាចធ្វើអ្វីខ្ញុំបាន? ព្រោះគេខ្លាំងពូកែណាស់ ទៅលើការធ្វើឱ្យមនុស្សចាប់ ហ៊ុន សែន ទៅផ្តន្ទាទោសនៅពេលហ៊ុន សែន កំពុងគ្រប់គ្រងប្រទេស»៕
