ជនមិនស្គាល់មុខ លួចដុតបំផ្លាញព្រៃលិចទឹក នៅស្រុកក្រឡាញ់
ក្រឡាញ់: ព្រៃលិចទឹក ជាជំរកដ៏សំខាន់ សម្រាប់ត្រីពង នារដូវវស្សា ការពារព្រៃលិចទឹក គឺ រួមចំណែក ការពារធនធាន ជលផល សម្រាប់បងប្អូនប្រជាពលរដ្ឋយើង ខណៈជនមិនស្គាល់មុខ លួចដុតបំផ្លាញ។
កាលពីថ្ងៃទី៣០ ខែ ឧសភា ឆ្នាំ២០១៩ លោក សុខ ណារ៉េត អភិបាលរងស្រុក តំណាងលោកស្រី ម៉ននី រង្សី អភិបាល នៃគណៈអភិបាលស្រុកក្រឡាញ់ និងជាប្រធានគណៈបញ្ជាការឯកភាពស្រុកក្រឡាញ់ បានសហការការជាមួយមន្រ្តីជំនាញខ័ណ្ឌរដ្ឋបាលជលផលខេត្តសៀមរាប ដឹកនាំក្រុមការងារចម្រុះ និងអាជ្ញាធរឃុំសំបួរ ប៉ុស្តិ៍រដ្ឋបាល ប្រជាការពារ ចុះត្រួតពិនិត្យតំបន់ព្រៃលិចទឹក ដែលត្រូវភ្លើងឆេះ ដោយសារជន មិនស្គាល់មុខ លួចដុតបំផ្លាញខូចខាត អស់នាពេលកន្លងមក។
ក្នុងឪកាសនេះ លោកអភិបាលរងស្រុកក៏បានណែនំាដល់អាជ្ញាធរឃុំ សហការជាមួយមន្ត្រីជំនាញពាក់ព័ន្ធ រៀបផែនការណ៍ ដាំកូនឈើ ឡើងវិញ និងដាក់កម្លាំងឃ្លាំមើល ដើម្បីរក្សាការពារឲ្យបានគង់វង់ ទុក ទីតាំងទាំងនេះ ជាសម្បត្តិសាធារណះ របស់រដ្ឋ និងជាជំរកត្រីពងកូន នារដូវវស្សាផងដែរ ។
អនុលោមតាមច្បាប់ស្ដីពីព្រៃឈេី និងច្បាប់ស្ដីពីជលផល ប្រជាពលរដ្ឋ កងកម្លាំងប្រដាប់អាវុធ និងអាជ្ញាធរដែនដីគ្រប់លំដាប់ថ្នាក់ ត្រូវមានករណីយកិច្ចទទួលខុលត្រូវ ថែរក្សា ការពារព្រៃឈើ បង្ការ និងប្រយុទ្ធនឹងភ្លេីងឆេះព្រៃ ចូលរួមថែរក្សាជម្រកមច្ឆាជាតិ ការពារ បង្ការ និងប្រយុទ្ធនឹងភ្លេីងឆេះព្រៃលិចទឹក នៅតាមមូលដ្ឋានរៀងៗខ្លួន។
ជនណាដែលបានប្រព្រឹត្ត ឬបង្ករ ឲ្យមានភ្លេីងឆេះព្រៃ និងព្រៃលិចទឹក ដោយចេតនា ត្រូវផ្ដន្ទាទោសក្រោមបទល្មេីសព្រៃឈេីថ្នាក់ទី១ ឬបទល្មេីសជលផល ថ្នាក់ទី១ ដែលត្រូវជាប់ពន្ធនាគារពី ០៣ឆ្នាំទៅ ០៥ឆ្នាំ ឬពី ០៥ឆ្នាំទៅ ១០ឆ្នាំ ៕
