បើករថយន្តធ្លាក់ចូលទឹកព្រែក បណ្តាលឲ្យស្លាប់ម្នាក់ របួសម្នាក់, តៃកុងឡានត្រូវឃាត់ខ្លួន
ព្រៃវែង ៖ មានគ្រោះថ្នាក់ចរាចរ រថយន្តម៉ាកសាំយ៉ុង ពណ៌លឿង បើកបរក្នុងសភាពធ្វេសប្រហែស បណ្តាលឲ្យបានរេចង្កូតធ្លាក់ចូលទឹកព្រែក បណ្តាលស្លាប់បុរសម្នាក់ និងរងរបួសធ្ងន់ម្នាក់ នៅថ្ងៃទី២១ ខែកក្កដា ឆ្នាំ២០១៨ វេលាម៉ោង៩ នៅចំណុចលើខ្នងប្រឡាយចិន ស្ថិតក្នុងភូមិព្រៃសុធន់ ឃុំព្រៃខ្លា ស្រុកស្វាយអន្ទរ ខេត្តព្រៃវែង ។
នគរបាលមូលដ្ឋាន បានឲ្យដឹងថា មុនពេលកើតហេតុ រថយន្តខាងលើបើកបរក្នុងទិសដៅពីជើងទៅត្បូង លើខ្នងប្រឡាយចិន បើកដោយឈ្មោះ ចាន់ ណែង ភេទប្រុស អាយុ២៦ឆ្នាំ នៅភូមិស្វាយទៀប ឃុំអំពិលក្រៅ ស្រុកស៊ីធរកណ្តាល ខេត្តព្រៃវែង រួមដំណើរដោយមនុស្ស២នាក់ ឈ្មោះសុខ ហើយ ភេទប្រុស៣០ ឆ្នាំ រស់នៅក្នុងខេត្តត្បូងឃ្មុំ (ស្លាប់នៅកន្លែងកើតហេតុ) និងឈ្មោះសៅ លីន ភេទប្រុសអាយុ៣៣ឆ្នាំ ភូមិស្វាយទៀប ឃុំអំពិលក្រៅ ស្រុកស៊ីធរកណ្តាល ខត្តព្រៃវែង រងរបួសធ្ងន់ ត្រូវបានបញ្ជូនទៅមន្ទីរពេទ្យ ។
ក្រោយកើតហេតុ សមត្ថកិច្ចបានចុះត្រួតពិនិត្យ និងឃាត់ខ្លួនអ្នកបើកបរយកទៅសាកសួរ ចំណែករថយន្តអូសយកទៅរក្សាទុកនៅស្នាក់ការប៉ុស្តិ៍ព្រៃខ្លា ៕