ស្លាប់ស្ត្រី២នាក់ របួសស្រាលម្នាក់ រថយន្តស្ទូចចុះចំណោតរ៉ា ដាច់ហ្វ្រាំង បុករះរថយន្ត ២គ្រឿង និងម៉ូតូ២គ្រឿង កំពង់សោម
ព្រះសីហនុ៖ មនុស្សស្រី២នាក់ បានស្លាប់ភ្លាមៗនៅកន្លែងកើតហេតុ និងមនុស្សម្នាក់ទៀតរងរបួសស្រាល ក្នុងហេតុការណ៍គ្រោះថ្នាក់ចរាចរណ៍រថយន្តស្ទូចដាច់ហ្វ្រាំងទៅបុករថយន្ត២គ្រឿងនិងម៉ូតូ២គ្រឿង។ ឧបទ្ទវហេតុនេះបានកើតឡើង នៅវេលាម៉ោង៩នឹង៤៥នាទីព្រឹក ថ្ងៃទី១ ខែមករា ឆ្នាំ២០២០ នៅលើវិថីផែ កែងរ៉ារទេះភ្លើង(P4) សង្កាត់លេខ៣ ក្រុង/ខេត្តព្រះសីហនុ។
មន្ត្រីនគរបាលខេត្តព្រះសីហនុ បានឲ្យដឹងថា មុនពេលកើតហេតុមានរថយន្តស្ទូច១គ្រឿងម៉ាក TADANO ពណ៌លឿង គ្មានផ្លាកលេខ អ្នកបើកបរមិនស្គាល់អត្តសញ្ញាណ (រត់គេចបាត់) មានទិសដៅពីកើតឆ្ពោះទៅលិច លុះមកដល់ចំណុចខាងលើ ស្ថានភាពផ្លូវចុះចំណោត រថយន្តដាច់ហ្វ្រាំងបានជ្រុលទៅបុក នឹងរថយន្ត២គ្រឿង ម៉ូតូ២គ្រឿង៖១-រថយន្តម៉ាក HYUNDAI STAREX ពណ៌ស ពាក់ផ្លាកលេខ ព្រះសីហនុ2A-5731 ឈប់ចត ម្ចាស់មិនទាន់ស្គាល់អត្តសញ្ញាណ។ ២-រថយន្តម៉ាក CAMERY ពណ៌ទឹកប្រាក់ ពាក់ផ្លាកលេខ ភ្នំពេញ2AB-6643 អ្នកបើកបរឈ្មោះ ឃឹម រស្មី ភេទប្រុស អាយុ២៩ឆ្នាំ មានទីលំនៅ ស្រុកស្រែអំបិល ខេត្តកោះកុង។ ៣-ម៉ូតូម៉ាក YAMAHA ពណ៌ស គ្មានផ្លាកលេខ អ្នកបើកបរ មិនទាន់ស្គាល់អត្តសញ្ញាណ ភេទប្រុស។ ៤-ម៉ូតូម៉ាក HONDA C125 ពណ៌ ខ្មៅ ពាក់ផ្លាកលេខ ព្រះសីហនុ1B-5082 អ្នកបើកបរ មិនស្គាល់អត្តសញ្ញាណ រួមដំណើរមនុស្សម្នាក់ឈ្មោះ នាក់ សុភា ភេទស្រី អាយុ៦០ឆ្នាំ មានទីលំនៅភូមិ៣ សង្កាត់លេខ៣ ក្រុង/ខេត្តព្រះសីហនុ។
ប្រភពដដែលបន្តថា គ្រោះថ្នាក់ខាងលើបណ្ដាលឲ្យស្លាប់មនុស្ស ២នាក់(ស្រី) រងរបួសមនុស្ស១នាក់ ឈ្មោះ នាក់ សុភា ភេទស្រី អ្នករួមដំណើរនៅលើម៉ូតូ HONDA C125 ស្លាប់នៅនឹងកន្លែងកើតហេតុ។ ចំណែកអ្នកបើកបររថយន្តបង្ក រត់គេចខ្លួនបាត់ ក្រោយពេលកើតហេតុ។ បច្ចុប្បន្នវត្ថុតាង រថយន្ត៣គ្រឿង និងម៉ូតូ២គ្រឿង សមត្ថកិច្ចជំនាញយកមករក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ ៕
