បុរសយោធាម្នាក់ ត្រូវរថយន្តបែនដឹកថ្ម បុកស្លាប់
ភ្នំពេញ : គ្រោះថ្នាក់ចរាចរណ៍កើតឡើងបង្កឲ្យរថយន្តបែនដឹកថ្ម បុកម៉ូតូបណ្ដាលបុរសមន្រ្តីយោធាម្នាក់ស្លាប់ភ្លាមៗកើតហេតុ នៅវេលាម៉ោង៥ទៀបភ្លឺ ថ្ងៃទី៣ ខែមករា ឆ្នាំ២០២០។
រថយន្តបែន ពណ៌ស អត់ផ្លាកលេខ បានបើបុកម៉ូតូស៊ីរ៉ូសពណ៌ខ្មៅពាក់ផ្លាកលេខភ្នំពេញ ១F-០០០៣ ពីក្រោយ បណ្តាលឲ្យស្លាប់នៅកន្លែង ស្ថិតនៅតាមបណ្តោយកំណត់ផ្លូវជាតិលេខ១ កែងផ្លូវថៃហ្គ័រ ភូមិទួលតាចាន់ សង្កាត់ព្រែកឯង ខណ្ឌច្បារអំពៅ ។
ជនរងគ្រោះ ឈ្មោះ សន កៃ ភេទប្រុស អាយុ ២៨ឆ្នាំ ស្នាក់នៅសង្កាត់តាខ្មៅ ក្រុងតាខ្មៅ ខេត្តកណ្តាល ។
ម៉ូតូម៉ាកស៊ីរ៉ូស ពណ៌ខ្មៅ ពាក់ផ្លាកលេខ ភ្នំពេញ ១F ០០០៣ ក្នុងហេតុការណ៍នេះ អ្វីគួរឲ្យសង្វេគនោះ គឺបុរសរងគ្រោះជាយោធា ទើបតែរៀបការ ហើយបានស្លាប់ចោលប្រពន្ធ ដែលកំពុងមានកូនក្នុងផ្ទៃប្រមាណ ៥ខែ ។ នេះបើតាមការប្រាប់ឲ្យដឹងពីបងប្រុសបង្កើតសពរបស់ជនរងគ្រោះ ។
សមត្ថកិច្ចបានឲ្យដឹងថា ជនរងគ្រោះជិះម៉ូតូនៅពីមុខរថយន្តបែនក្នុងទិសដៅស្របទិស ពីជើងមកត្បូង មិនដឹងថាអ្នកបើករថយន្តងងុយដេក ឬក៏មូលហេតុអ្វីទេ បុកម៉ូតូពីក្រោយបណ្ដាលអូសប្រហែលជិត១០ម៉ែត្រ សពបានប្រគល់ឲ្យគ្រួសារយកទៅបុណ្យតាមប្រពៃណី ចំណែកម៉ូតូនិងរថយន្តបង្ក យករក្សាទុកនៅការិយាល័យចរាចរណ៍ផ្លូវគោកស្នងការរាជធានីភ្នំពេញ ជាបណ្ដោះអាសន្ន៕
