សម្ដេចតេជោ ហ៊ុន សែន នឹងចេញទៅខេត្តកែបនៅពេលបន្តិចទៀតនេះ
ភ្នំពេញ៖ សម្ដេចតេជោ ហ៊ុន សែន នឹងចេញទៅខេត្តកែបនៅពេលបន្តិចទៀតនេះ ដើម្បីចូលរួមដឹកនាំការរុករកសង្រ្គោះកម្មករ ដែលកំពុងជាប់នៅក្រោមអគារដែលដួលរលំ។
បើតាមផេកហ្វេសប៊ុកផ្លូវការ នៅព្រលប់ថ្ងៃទី៣មករានេះ សម្តេចតេជោ នាយករដ្ឋមន្រ្តី បានថ្លែងថា ខ្ញុំនឹងចេញទៅខេត្តកែបនៅ ពេលបន្តិចទៀតនេះ ដើម្បីចូលរួមដឹកនាំការរុករកសង្រ្គោះកម្មករ ដែលកំពុងជាប់ នៅក្រោមអគារដែលដួលរលំ។
កម្មករជាជនរងគ្រោះប្រមាណជា ១៣នាក់ហើយ ត្រូវបានជួយសង្គ្រោះចេញពីក្រោមគំនរអគារ គិតត្រឹមវេលាម៉ោងប្រមាណ៦និង២០នាទីល្ងាច ថ្ងៃទី៣ ខែមករា ឆ្នាំ២០២០នេះ។ មន្ត្រីខេត្តបានអះអាងថា មានជនរងគ្រោះប្រមាណជា២០-៣០នាក់ បានជាប់នៅក្រោមអគារដែលបាក់រលំនេះ ពេលពួកគេកំពុងធ្វើការ។
ចំណែក លោកកែវ វី អ្នកនាំពាក្យគណៈកម្មាធិការជាតិ គ្រប់គ្រងគ្រោះមហន្តរាយ បានថ្លែងថា មន្រ្តីគណៈ កម្មាធិការជាតិគ្រប់គ្រងគ្រោះ មហន្តរាយ និងកម្លាំង៧១១ កំពុងចេញដំណើរចុះទៅជួយសង្រ្គោះពលរដ្ឋ ក្នុងករណីបាក់រលំអគារ នៅខេត្តកែប ចំណែកឯកម្លាំងសមត្ថកិច្ច និងអាជ្ញាធរមូលដ្ឋាន កំពុងអន្តរាគមន៍ជួយសង្រ្គោះ និងយកមនុស្សចេញបាន ជាបន្តបន្ទាប់៕
សូមបញ្ជាក់ថា នៅវេលាម៉ោងប្រមាណ៤និង៣០នាទីល្ងាចថ្ងៃទី៣ ខែមករា ឆ្នាំ២០២០នេះ អគារមួយកន្លែងមានកម្ពស់ប្រមាណជា៧ជាន់ ស្ថិតនៅក្បែរវត្តសមាធិ ក្នុងក្រុងកែប ខេត្តកែប បានបាក់រលំ។ អគារនេះត្រូវបានគេអះអាងថា សាងសង់សម្រេចបានប្រមាណជា ៩០ភាគរយហើយ៕
