អ្នកដឹកអីវ៉ាន់តាមអនឡាញម្នាក់ និងបើករថយន្តដឹកសិស្សម្នាក់ ចាយមិនគ្រប់ បន្ថែមមុខរបរថ្មី ចេញឆក់ជនបរទេស ត្រូវនគរបាលឃាត់ខ្លួន
ភំ្នពេញ ៖ អគ្គស្នងការដ្ឋាននគរបាលជាតិ បានផ្សាយព័ត៌មានថា កម្លាំងជំនាញរបស់ការិយាល័យ បានឃាត់ខ្លួនជនសង្ស័យ២នាក់ ក្នុងបទល្មើស ជាក់ស្តែង នៅចំណុចផ្លូវលេខR៦ (ផ្លូវរថភ្លើង) សង្កាត់ស្រះចក ខណ្ឌដូនពេញ រាជធានីភ្នំពេញ កាលពីថ្ងៃទី២២ ខែមករា ឆ្នាំ២០២០ វេលាម៉ោងប្រហែល ២១និង១០នាទី ដែលបានប្រព្រឹត្តបទល្មើសអំពើលួច មានស្ថានទម្ងន់ទោស (ឆក់កាបូបស្ពាយពណ៌ផ្កាឈូក) ពីជនបរទេស ប្រព្រឹត្តនៅចំណុចមុខផ្ទះលេខ២១៩ ផ្លូវលេខ៩៣ កែងផ្លូវលេខ២១៧ ភូមិ៥ សង្កាត់អូរឫស្សី៤ ខណ្ឌ៧មករា រាជធានីភ្នំពេញ និង ចាប់យកម៉ូតូជាមធ្យោបាយជិះធ្វើសកម្មភាព និងកាបូបរបស់ជនរងគ្រោះ បញ្ជូនមកការិយាល័យ ចាត់ការតាមនីតិវិធី ។
ជនសង្ស័យរួមមាន ៖ ១-ឈ្មោះ ពូន សុទ្ធី ហៅ ហ្វី ភេទ ប្រុស អាយុ១៧ឆ្នាំ ជនជាតិ ខ្មែរ មុខរបរ បើករថយន្តដឹកសិស្ស ស្នាក់នៅផ្ទះលេខ១២៧ ផ្លូវលេខ១៦៩ សង្កាត់មិត្តភាព ខណ្ឌ៧មករា រាជធានីភ្នំពេញ ។ ២-ឈ្មោះ ហែម ចំរើន ហៅ សក្តិ ភេទប្រុស អាយុ ១៧ ឆ្នាំ ជនជាតិ ខ្មែរ មុខរបរ ដឹកអីវ៉ាន់អនឡាញ ស្នាក់នៅផ្ទះគ្មានលេខ ផ្លូវលំ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។ វត្ថុតាងចាប់យក ម៉ូតូម៉ាកហុងដា ស្កុបពី ពណ៌ខ្មៅ ឆ្នាំផលិត២០២០ ពាក់ផ្លាកលេខ ភ្នំពេញ ១IB ៥៥៨០ ។ និងភស្តុតាងចាប់យករួមមាន កាបូបស្ពាយ ពណ៌ផ្កាឈូក ចំនួន ១ ប្រាក់ដុល្លារ ចំនួន ៨០ ដុល្លារអាមេរិក ទូរស័ព្ទដៃម៉ាកហូវៃ លិខិតឆ្លងដែន និងសម្ភារៈមួយចំនួនទៀត។
ចំណែកជនរងគ្រោះ ឈ្មោះ ZHANG YANLING ភេទស្រី អាយុ ៤១ ឆ្នាំជនជាតិ ចិន កាន់លិខិតឆ្លងដែន ស្នាក់នៅសណ្ឋាគារប៉ាស៊ីហ្វិក ផ្លូវលេខ៩៣ សង្កាត់ផ្សារថ្មី២ ខណ្ឌដូនពេញ រាជធានីភ្នពេញ មុខរបរ ទេសចរណ៍ ។
បច្ចុប្បន្នជនសង្ស័យ និងវត្ថុតាងខាងលើ ការិយាល័យកសាងសំណុំរឿងបញ្ជូនទៅ សាលាដំបូងរាជធានីភ្នំពេញ ចាត់ការតាមនីតិវិធី ៕
