ត្រៀមលក្ខណៈគ្រប់គ្រាន់ សម្រាប់បង្ការទប់ស្កាត់ជំងឺរលាកសួត ប្រភេទថ្មីឈ្មោះវីរុស កូរ៉ូណាប្រភេទថ្មី ដាក់ម៉ាស៊ីនស្កែនកំដៅ នៅតាមច្រកចេញចូល អន្តរជាតិ
ព្រះសីហនុ៖ មន្ទីរសុខាភិបាលខេត្តព្រះសីហនុ បានត្រៀមលក្ខណៈគ្រប់គ្រាន់ សម្រាប់បង្ការទប់ស្កាត់ជំងឺរលាកសួត ប្រភេទថ្មីឈ្មោះវីរុស កូរ៉ូណាប្រភេទថ្មី។ ក្រោយពីការផ្ទុះជំងឺរលាកសួតប្រភេទថ្មី ឈ្មោះកូរ៉ូណាវីរុស មាននៅប្រទេសថៃ លើភ្ញៀវទេសចរជនជាតិចិន មកពីទីក្រុងវូហាន ប្រទេសចិន។
លោករដ្ឋមន្រ្តីក្រសួងសុខាភិបាល និងនាយកដ្ឋានប្រយុទ្ធនឹងជំងឺឆ្លង បានពង្រឹងនឹងរៀបចំ ដាក់ម៉ាស៊ីនស្កែនកំដៅ នៅតាមច្រកចេញចូលអន្តរជាតិ ដោយឡែកនៅអាកាសយានដ្ឋានអន្តរជាតិ ខេត្តព្រះសីហនុ ក៏មានរៀបចំដាក់ម៉ាស៊ីនស្កែនកំដៅផងដែរ កាលពីថ្ងៃទី១០ ខែមករា ឆ្នាំ២០២០ ដើម្បីឱ្យក្រុមចត្តាឡីស័ក ធ្វើការស្រាវជ្រាវរកករណីសង្ស័យ ជំងឺឆ្លងប្រភេទថ្មី លើភ្ញៀវទេសចរណ៍មកលេងស្រុកខ្មែរ នៅតាមច្រកអាកាសយានដ្ឋានអន្តរជាតិខេត្តព្រះសីហនុ សម្រាប់បង្ការទប់ស្កាត់ការឆ្លង ចូលមេរោគផ្លូវដង្ហើមប្រភេទថ្មី មកប្រទេសកម្ពុជា។
ទន្ទឹមនោះ មន្ទីរសុខាភិបាល ក៏បានត្រៀមបន្ទប់ដាក់អ្នកជំងឺ ឲ្យនៅដាច់ដោយឡែក នៅក្នុងព្រលានយន្តហោះអន្តរជាតិព្រះសីហនុ និងមន្ទីរពេទ្យបង្អែកខេត្ត និងសម្ភារៈ បរិក្ខារពេទ្យ និងឱសថចាំបាច់សម្រាប់ការព្យាបាលផងដែរ ៕
