ក្រសួងធម្មការ ត្រៀមព្រាងច្បាប់គ្រប់គ្រងសាសនា
ភ្នំពេញ៖ មន្ត្រីជាន់ខ្ពស់ក្រសួងធម្មការ និងសាសនា បានឱ្យដឹងថាក្រសួងកំពុងធ្វើ សេចក្តីព្រាងច្បាប់ស្តីពីការគ្រប់គ្រងសាសនានៃព្រះរាជាណាចក្រកម្ពុជា ដោយថាច្បាប់នេះធ្វើឡើងដើម្បីធានាការអនុវត្តការងារលើវិស័យសាសនាឱ្យមានប្រសិទ្ធភាព ព្រមទាំងដើម្បីរៀបចំសុខដុមនីយកម្ម និងលើកតម្កើងតម្លៃសាសនា។
ក្នុងពិធី ស្រោចស្រពព្រះសុគន្ធវារី ប្រគេនសម្តេចព្រះសង្ឃនាយករង៣ព្រះអង្គ ដែលព្រះមហាក្សត្រទើបត្រាស់បង្គាប់តែងតាំងនៅរាជធានីភ្នំពេញ កាលពីថ្មីៗកន្លងមកនេះ រដ្ឋលេខាធិការប្រចាំការនៃក្រសួងធម្មការ និងសាសនា លោក ប្លោក ផន មានប្រសាសន៍ថា ខាងក្រសួងបានសហការជាមួយព្រះសង្ឃទាំងពីរគណៈបានបង្កើតក្រុមការងាររៀបចំសេចក្តីព្រាង និងធ្វើច្បាប់គ្រប់គ្រងសាសនា។
ប្រភពដដែលបន្តថា ក្រុមការងារនេះ បង្កើតឡើងកាលពីខែវិច្ឆិកា ឆ្នាំមុន ដោយលោកថាក្រុមការងារនេះនឹងចាប់ផ្តើមសិក្សាស្រាវជ្រាវប្រមូលចងក្រង ច្បាប់ជាមាគ៌ា ជាគ្រឹះនៃចក្ខុវិស័យ សម្រាប់យកអនុវត្តន៍លើការគ្រប់គ្រងសាសនា ស្របតាមច្បាប់រដ្ឋជាធរមាន។
ដោយឡែកអ្នកនាំពាក្យក្រសួងធម្មការ និង សាសនា លោក សេង សុមុនី បញ្ជាក់បន្ថែមថា បន្ទាប់ពីក្រសួងបានចេញសេចក្តីប្រកាសចំនួន៣ ពាក់ព័ន្ធវិស័យសាសនានៅកម្ពុជារួច ក្រសួងនឹងយកប្រកាសទាំងនោះ មករៀបចំជាច្បាប់គ្រប់គ្រងសាសនានៃព្រះរាជាណាចក្រកម្ពុជា ។
ច្បាប់នេះលោកថា មានគោលបំណងដើម្បីឱ្យមានភាពសុខដុមរម្យនាសាសនា លើកតម្លៃសាសនា ពិសេសលើកតម្លៃសាសនាព្រះពុទ្ធនៅកម្ពុជាតែម្តង។
លោកមានប្រសាសន៍ថា៖ រួចចំណែកអប់រំគុណធម៌ សីលធម៌ ក្នុងសង្គមជាមួយរាជ រដ្ឋាភិបាល ដើម្បីអភិវឌ្ឍន៍ជាតិ និងលើកតម្លៃសាសនា។ សុទ្ធតែជាគោលបំណងធំៗ ហើយ អ្វីដែលជាលក្ខខណ្ឌនៃការដំណើរ ការ គឺយន្តការរបស់យើង រៀបចំប្រកាសហើយ បានយើងរៀបច្បាប់ ដើម្បីឱ្យទៅតាមដំណាក់កាលនីមួយៗ សម្រាប់អនុវត្តន៍។ ទន្ទឹមនឹងនេះ ក្រុមអ្នកព្រាងច្បាប់ ក៏បាន ព្រាងជាជំពូក ជាមាត្រាជាប្រការ បណ្តើរៗជាមួយគ្នាហ្នឹងផងដែរ ។
អ្នកនាំពាក្យរូបនេះ មិនអាចបញ្ជាក់បានថា ដំណើរការរៀបចំធ្វើច្បាប់ឬ សេចក្តីព្រាង ច្បាប់នេះ នឹងបញ្ចប់ពេលណានោះទេ ប៉ុន្តែលោកថាក្រុមការងារក្រសួងកំពុងខិតខំធ្វើការងារនេះ ៕ដោយ៖ សំរិត
