គ្រឿងញៀន២០គីឡូក្រាម ប្រទះឃើញ អណ្តែតលើផ្ទៃសមុទ្រ
កោះកុង៖ នៅព្រឹកថ្ងៃទី ៣០ ខែ មីនា ឆ្នាំ ២០២០ ឯកឧត្ដម ឧត្ដមសេនីយ៍ទោ សំឃិត វៀន ស្នងការនគរបាលខេត្ត បានធ្វើសន្និសីទសារព័ត៌មាន ស្ដីពីការ ប្រទះឃើញគ្រឿងញៀនចំនួនប្រមាណ ២០ គីឡូក្រាម ដែលប្រជាពលរដ្ឋប្រទះឃើញអណ្តែតទឹកនៅឆ្នេរចម្ការដូងទី ៥ ស្ថិតក្នុងភូមិ អាឡាតាន់ ឃុំជ្រោយប្រស់ ស្រុកកោះកុង រាយការណ៍ មកសមត្ថកិច្ច ដើម្បីយកមកត្រួតពិនិត្យ ។
គ្រឿងញៀនចំនួន២០កញ្ចប់ធំ ដែលសមត្ថកិច្ចបានរកឃើញ កាលពីវេលាម៉ោងជាង១១យប់ នាថ្ងៃទី២៨ ខែមីនា ឆ្នាំ២០២០ នៅចំណុចកោះកុងក្រៅ (ចំការដូងទី៥) ស្ថិតក្នុងឃុំជ្រោយប្រស់ ស្រុកកោះកុង ខេត្តកោះកុង ។
បើតាមការបញ្ជាក់ ពីឯកឧត្តមឧត្តមសេនីយ៍ទោ សំឃិត វៀន បានឲ្យដឹងថា កន្លងមកដោយក្តាប់បាននូវព័ត៌មានថា កាលពីថ្ងៃទី៣ ខែមីនា ឆ្នាំ២០២០ ភាគីថៃបានប្រទះឃើញគ្រឿងញៀនអណ្តែកទឹក រាប់រយគីឡូម៉ែត្រនៅតាមបណ្តោយឆ្នេរកោះកូដ ទើបកម្លាំងជំនាញនៃស្នងការដ្ឋាននគរបាលខេត្តកោះកុង បានធ្វើការទំនាក់ទំនងជាមួយបណ្តាទូកនេសាទ ដើម្បីក្តាប់ព័ត៌មានពីរឿងនេះ រហូតដល់យប់ថ្ងៃទី២៨ ខែមីនា ឆ្នាំ២០២០ ទើបមានប្រជានេសាទមួយរូប បានរាយការណ៍មកថា គាត់បានរើសបានវត្ថុចម្លែកមួយកញ្ចប់ សង្ស័យគ្រឿងញៀន ទើបលោកបានដាក់បទបញ្ជាឲ្យលោកឧត្តមេសនីយ៍ត្រី មីន រស្មី ស្នងការរងទទួលផែនបង្ក្រាបបទល្មើសគ្រឿង ដឹកនាំកម្លាំងការិយាល័យគ្រឿងញៀន សហការជាមួយសមត្ថកិច្ចក្រុង និងសមត្ថកិច្ចមូលដ្ឋានស្រុកកោះកុង ចុះទៅពិនិត្យដល់កន្លែងកើតហេតុ ក៏បានរកឃើញកញ្ចប់ចម្លែកចំនួន១៩កញ្ចប់ធំបន្ថែមទៀត ក្រោយការធ្វើតេស្ត ជាលទ្ធផលឃើញថាពិតជាគ្រឿងញៀនមែន ។
ឯកឧត្តមបានបន្តថា នេះជាលើកទី១ហើយ សម្រាប់ខេត្តកោះកុង ដែលបានរកឃើញគ្រឿងញៀនមេតំហ្វេតាមីន (ម៉ាទឹកកក) រហូតដល់ទៅ២០កញ្ចប់ធំ ដោយក្នុងមួយកញ្ចប់មានទម្ងន់រហូតដល់ទៅ១០២០ក្រាម ហើយតាមការអង្កេតបឋមគ្រឿងញៀនទាំងនេះ អាចមានមូលដ្ឋាននៅក្នុងលំហសមុទ្រតែម្តង ហើយខាងសមត្ថកិច្ច និងធ្វើការសហការជាមួយជំនាញពាក់ព័ន្ធជើងទឹក ដើម្បីបន្តតាមដានស្វែងរកទីតាំងជាក់លាក់ និងអញ្ញត្តិជនដើម្បីមកធ្វើការផ្តន្ទាទោសតាមផ្លូវច្បាប់ ។
ឯកឧត្តមស្នងការក៏បានធ្វើការអំពាវនាវ ដល់ពលរដ្ឋទាំងអស់ បើមានករណីសង្ស័យថាមានការជួញដូរ និងប្រើប្រាស់គ្រឿងញៀន សូមរាយការណ៍មកសមត្ថកិច្ច ដើម្បីកម្លាំងយើងអាចធ្វើការបង្ក្រាប និងទប់ស្កាត់ទាន់ពេលវេលា និងស្នើសុំឲ្យយុវវ័យទាំងអស់ ត្រូវនាំគ្នានៅឲ្យឆ្ងាយពីគ្រឿងញៀន ព្រោះគ្រឿងញៀន អាចធ្វើឲ្យយើងបាត់បង់ពេលវេលានៃការសិក្សា ពិសេសគ្រឿងញៀន អាចនិងបំផ្លាញអនាគតរបស់ប្អូនៗបានយ៉ាងងាយ ។
ទន្ទឹមនិងនេះលោកជំទាវ មិថុនា ភូថង អភិបាលខេត្តកោះកុង ក៏បានថ្លែងអំណរគុណ យ៉ាងជ្រាលជ្រៅចំពោះកិច្ចខិតខំប្រឹងប្រែង អស់ពីកម្លាំងកាយចិត្ត របស់បងប្អូនសមត្ថកិច្ច ដែលបានលះបង់ពេលវេលា ក្នុងការបំពេញភារកិច្ច និងធ្វើការស្នើសុំយ៉ាងទទូច ដល់កងកម្លាំងមានសមត្ថកិច្ចទាំងអស់ មេត្តាបន្តការស៊ើបអង្កេតបន្ថែម លើបញ្ហនេះ។
បច្ចុប្បន្នគ្រឿងញៀនទាំងនោះ ត្រូវបានកម្លាំងការិយាល័យគ្រឿងញៀន កសាងសំណុំរឿង បញ្ជូនទៅកាន់អយ្យការអមសាលាដំបូងខេត្តកោះកុង ចាត់ការបន្តតាមនីតិវិធី ៕
