មិនយូរទេ សួនច្បារថ្មីមួយនឹងលេច ចេញជារូបរាងឆាប់ៗនេះ នៅតាមបណ្តោយវិថីភ្នំពេញ-ហាណូយ ដែលមានទីធ្លាលំហែកំសាន្ត កន្លែងហាត់ប្រាណ ឧបករណ៍ក្មេងលេងផងដែរ
ភ្នំពេញ៖ មិនយូរទេ សួនច្បារថ្មីមួយនឹងលេចចេញជារូបរាង នៅតាមបណ្តោយវិថីភ្នំពេញ-ហាណូយ ដែលមានទីធ្លា សំរាប់លំហែកំសាន្ត កន្លែងហាត់ប្រាណ ឧបករណ៍ក្មេងលេង ដើមឈើ ដាំស្មៅ បង្គន់សាធារណៈ ចំណតរថយន្តនិងម៉ូតូ និងបង្គោលបំភ្លឺសួនច្បារផងដែរ ។
ដើម្បីជម្រុញការងារនេះអោយបានលឿននិងត្រូវតាមគម្រោងប្លង់ លោក ឃួង ស្រេង អភិបាលរាជធានីភ្នំពេញ អមដំណើរដោយលោក ម៉ូវ ម៉ានិត អភិបាលខណ្ឌសែនសុខ កាលពីប៉ុន្មានថ្ងៃមុននេះបានដឹកនាំក្រុមការងារចុះពិនិត្យទីតាំងគម្រោងរៀបចំស្ថាបនាសួនច្បារថ្មីមួយនេះ ដែលសួនថ្មីនេះមានទីតាំង ស្ថិតនៅតាមបណ្តោយផ្លូវលេខ១០១៩ (វិថីភ្នំពេញ-ហាណូយ) ខាងមុខវិទ្យាស្ថានស្រាវជ្រាវ និងអភិវឌ្ឍន៍ ព្រៃឈើ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ ។
មន្ត្រីរដ្ឋបាលរាជធានីភ្នំពេញបានអោយដឹងថា
សួនច្បារថ្មីមួយនេះ មានបណ្តោយប្រវែង ៥៥០ម៉ែត្រ ទទឹង ១៦ម៉ែត្រ ដោយរៀបចំអោយមាន ជាទីធ្លាលំហែកំសាន្ត កន្លែងហាត់ប្រាណ ឧបករណ៍ក្មេងលេង ដាំដើមឈើ ដាំស្មៅ បង្គន់សាធារណៈ ចំណតរថយន្ត ម៉ូតូ និងបង្គោលបំភ្លឺសួនច្បារផងដែរ ដើម្បីងាយស្រួលជូនបងប្អូនប្រជាពលរដ្ឋបានមកលំហែកំសាន្ត និងបានហាត់
ប្រាណនៅទីនេះ ។
លោកសំ សាមុត ប្រធានអង្គភាពសួនច្បារនិងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញធ្លាប់បានបញ្ជាក់អោយដឹងហើយថា សួនច្បារថ្មីនេះបានចាប់ផ្ដើមអនុវត្តការដ្ឋានកាលពីថ្ងៃទី១៣ កុម្ភៈ ឆ្នាំ ២០២០ ហើយជាគំរោងសួនច្បារនេះគ្រោះនឹងស្ថាបនា អោយបានរួចរាល់ក្នុងរយៈពេល៤ទៅ៥ខែទៀត។