រដ្ឋមន្ត្រីការបរទេសអាស៊ាន ឯកភាពបង្កើតមូលនិធិអាស៊ាន សម្រាប់ការឆ្លើយតបនឹងជំងឺកូវីដ១៩
ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ បានចេញលទ្ធផលនៃកិច្ចប្រជុំក្រុមប្រឹក្សាសម្របសម្រួលអាស៊ាន លើកទី២៥ ស្តីពីជំងឺកូវីដ១៩ តាមរយៈកិច្ចប្រជុំតាមប្រព័ន្ធវីដេអូ នៅថ្ងៃទី៩ ខែមេសា ឆ្នាំ២០២០។
នៅព្រឹកថ្ងៃទី៩ ខែមេសា ឆ្នាំ២០២០ នៅទីស្តីការក្រសួងការបរទេស និងសហប្រតិបត្តិការអន្តរជាតិ ឯកឧត្តម ឧបនាយករដ្ឋមន្ត្រី ប្រាក់ សុខុន បានចូលរួមកិច្ចប្រជុំក្រុមប្រឹក្សាសម្របសម្រួលអាស៊ាន ស្តីពីកូវីដ-១៩ ជាមួយរដ្ឋមន្ត្រីការបរទេសអាស៊ានដទៃទៀត តាមរយៈប្រព័ន្ធវីដេអូ (Video Conference) ។
បើយោងតាមសេចក្តីប្រកាសព័ត៌មាន កិច្ចប្រជុំតាមប្រព័ន្ធវីដេអូ រដ្ឋមន្ត្រីការបរទេសអាស៊ាន បានឯកភាពបង្កើតមូលនិធិអាស៊ាន សម្រាប់ការឆ្លើយតបនឹងជំងឺកូវីដ១៩ ក្នុងគោលបំណង ដើម្បីគៀរគរធនធានហិរញ្ញវត្ថុ ដើម្បីដោះស្រាយបញ្ហាកង្វះខាតឧបករណ៍វេជ្ជសាស្ត្រ ផ្តល់ការគាំទ្រដល់កិច្ចការស្រាវជ្រាវ និងអភិវឌ្ឍន៍ឱសថ សម្រាប់ប្រឆាំងនឹងជំងឺកូវីដ១៩ និងប្រើប្រាស់សម្រាប់ការឆ្លើយតបទៅនឹងស្ថានភាពបន្ទាន់នានា ក្នុងពេលអនាគត។
សេចក្តីប្រកាសព័ត៌មាន របស់ក្រសួងការបរទេសកម្ពុជា បានបញ្ជាក់ថា រដ្ឋមន្ត្រីការបរទេសអាស៊ាន បានឯកភាពបង្កើតមូលនិធិអាស៊ាន សម្រាប់ការឆ្លើយតបនឹងជំងឺកូវីដ១៩ ក្នុងគោលបំណងដើម្បីគៀរគរធនធានហិរញ្ញវត្ថុ ដើម្បីដោះស្រាយបញ្ហាកង្វះខាតឧបករណ៍វេជ្ជសាស្ត្រ ផ្តល់ការគាំទ្រដល់កិច្ចការស្រាវជ្រាវ និងអភិវឌ្ឍន៍ឱសថសម្រាប់ប្រឆាំងនឹងជំងឺកូវីដ១៩ និងប្រើប្រាស់សម្រាប់ការឆ្លើយតបទៅនឹងស្ថានភាពបន្ទាន់នានាក្នុងពេលអនាគត។ រដ្ឋមន្ត្រីការបរទេសអាស៊ាន ក៏បានបង្ហាញអំពីការប្តេជ្ញាចិត្តក្នុងការធានាឱ្យបាននូវសង្វាក់ផ្គត់ផ្គង់ក្នុងតំបន់ និងការបើកចំហរទីផ្សារ ព្រមទាំងធ្វើការរួមគ្នាយ៉ាងជិតស្និទ្ធ ដើម្បីកាត់បន្ថយនូវផលប៉ះពាល់លើសេដ្ឋកិច្ចតំបន់ និងសាកលលោក ព្រមទាំងស្តារឡើងវិញនូវទំនុកចិត្តរបស់អតិថិជន និងសហគមន៍ធុរកិច្ច និងដើម្បីរក្សាឱ្យបាននូវស្ថិរភាពសង្គម-វប្បធម៌។
នៅក្នុងកិច្ចប្រជុំតាមប្រព័ន្ធវីដេអូនេះ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា បានពិភាក្សា និងផ្លាស់ប្តូរយោបល់ ជាមួយរដ្ឋមន្ត្រីការបរទេស នៃបណ្តាប្រទេសសមាជិកអាស៊ាន លើវិធានការឆ្លើយតបរួមគ្នា ទៅនឹងការរីករាលដាលយ៉ាងឆាប់រហ័សនៃវីរុសកូរូណា ឆ្នាំ២០១៩ ហៅកាត់ថា កូវីដ១៩។ លើសពីនេះទៅទៀត រដ្ឋមន្ត្រីការបរទេសអាស៊ាន បានបង្ហាញពីការប្តេជ្ញាចិត្តយ៉ាងខ្លាំងក្លា ក្នុងការជំរុញបន្ថែមទៀតនូវវិធានការរួមគ្នា ដើម្បីដោះស្រាយនឹងជំងឺកូវីដ១៩ និងផលប៉ះពាល់ខាងផ្នែកសេដ្ឋកិច្ច និងសង្គមដែលបណ្តាលមកពីវីរុសនេះ ជាពិសេសផលប៉ះពាល់ទៅលើដំណើរការនៃការកសាងសហគមន៍អាស៊ាន តាមរយៈ ការលើកកម្ពស់ការសម្របសម្រួលគោលនយោបាយ ការចែករំលែកនូវបទពិសោធន៍ និងឧត្តម្មានុវត្តន៍ ក៏ដូចជាពិនិត្យលទ្ធភាពក្នុងការផ្តល់ជំនួយដល់គ្នាទៅវិញទៅមករវាងប្រទេសសមាជិកអាស៊ាន។
រដ្ឋមន្ត្រីការបរទេសអាស៊ាន ក៏បានទទួលស្គាល់នូវសារសំខាន់ នៃកិច្ចសហការប្រកបដោយភាពស្ថាបនា ជាមួយប្រទេសដៃគូខាងក្រៅ រួមទាំងដៃគូសន្ទនាអាស៊ាន និងស្ថាប័នអន្តរជាតិ ដើម្បីពង្រីកនូវកិច្ចខិតខំប្រឹងប្រែងរួមគ្នា នៅក្នុងការប្រយុទ្ធប្រឆាំងជាសាកល ទៅនឹងជំងឺកូវីដ១៩។ នៅក្នុងកិច្ចប្រជុំតាមប្រព័ន្ធវីដេអូនេះដែរ ឯកឧត្តមឧបនាយករដ្ឋមន្ត្រី ប្រាក់ សុខុន បានជម្រាបជូនអង្គប្រជុំនូវកិច្ចខិតខំប្រឹងប្រែងរបស់កម្ពុជា ក្នុងការទប់ស្កាត់វីរុសកូវីដ១៩ និងកាត់បន្ថយបញ្ហាប្រឈម ខាងផ្នែកសេដ្ឋកិច្ច និងសង្គម និងបានអះអាងសាជាថ្មីនូវការប្តេជ្ញាយ៉ាងមុតមាំដើម្បីធ្វើការយ៉ាងជិតស្និទ្ធជាមួយអាស៊ាន ដែលនេះជាផ្នែកមួយនៃកិច្ចខិតខំប្រឹងប្រែងជាសាកលប្រឆាំងនឹងជំងឺឆ្លងនេះ។
ឯកឧត្តមឧបនាយករដ្ឋមន្ត្រី ក៏បានស្នើនូវអាទិភាពដែលអាស៊ានគួរផ្តោតជាសំខាន់ ដូចជា ជំរុញការធ្វើកិច្ចសហប្រតិបត្តិការតំបន់ លើកកម្ពស់ការត្រៀមខ្លួនជាស្រេច និងវិធានការឆ្លើយតបដើម្បីកាត់បន្ថយ និងលុបបំបាត់ផលប៉ះពាល់នានា ដែលបណ្តាលមកពីវីរុសកូវីដ១៩ តាមរយៈការលើកកម្ពស់ការសម្របសម្រួល គោលនយោបាយរវាងប្រទេសសមាជិកអាស៊ាន។ ធ្វើការរួមគ្នា ដើម្បីពង្រឹងសមត្ថភាព ក្នុងការដោះស្រាយជំងឺរាតត្បាតតាមរយៈការផ្លាស់ប្តូរជំនាញបច្ចេកទេស និងបទពិសោធន៍នានា ធ្វើការចែករំលែកឧត្តម្មានុវត្តន៍នៃវិធីសាស្ត្រព្យាបាល និងការធ្វើតេស្តស្វែងរករោគសញ្ញា និងការពិនិត្យលទ្ធភាពឱ្យមានគម្រោងស្រាវជ្រាវ និងអភិវឌ្ឍន៍រួមគ្នា នូវឱសថ និងវ៉ាក់សាំងសម្រាប់ប្រឆាំងនឹងជំងឺនេះ។ បន្តផ្តល់ជំនួយ និងការគាំទ្រចាំបាច់នានា ដល់ប្រជាពលរដ្ឋអាស៊ាន ជាពិសេសប្រជាពលរដ្ឋ ដែលកំពុងប្រឈមមុខនឹងការលំបាក ដែលបណ្តាលមកពីការដាក់កម្រិតការធ្វើដំណើរ ការបិទរោងចក្រ និងព្រំដែនបណ្តោះអាសន្ន ព្រមទាំងប្រជាពលរដ្ឋអាស៊ាន ដែលពុំអាចស្វែងរកជំនួយ និងការគាំទ្រខាងផ្នែកកុងស៊ុល ពីបណ្តាស្ថានតំណាងនៃប្រទេសខ្លួន ប្រចាំនៅប្រទេសទី៣។ លើកកម្ពស់ការពិគ្រោះយោបល់ឱ្យកាន់តែជិតស្និទ្ធ ដើម្បីកាត់បន្ថយឱ្យបានជាអប្បបរិមានូវឧបសគ្គនានា ចំពោះសង្វាក់នៃសកម្មភាពពាណិជ្ជកម្ម និងការផ្គត់ផ្គង់ទំនិញក្នុងតំបន់ តាមរយៈការបន្តបើកចំហរនូវទីផ្សារអាស៊ាន ដើម្បីធានាឱ្យបាននូវលំហូរនៃការផ្គត់ផ្គត់ទំនិញចាំបាច់នានា ជាពិសេសស្បៀងអាហារ និងសម្ភារវេជ្ជសាស្ត្រ។ ធ្វើការដោយជិតស្និទ្ធ និងទាន់ពេលវេលាជាមួយ នឹងបណ្តាប្រទេសដៃគូសន្ទនាអាស៊ាន និងអង្គការអន្តរជាតិ ព្រមទាំងធនាគារអភិវឌ្ឍន៍ទាំងថ្នាក់តំបន់ និងពហុភាគី ដើម្បីដោះស្រាយនូវបញ្ហាប្រឈម មិនត្រឹមតែផ្នែកសុខាភិបាលសាធារណៈនេះ ក៏ដូចជាដើម្បីដាក់ចេញនូវវិធានការ
ជាកញ្ចប់ហិរញ្ញវត្ថុ ដែលអាចប្រើប្រាស់បានភ្លាមៗ ប្រកបដោយភាពរឹងមាំ ច្បាស់លាស់ និងប្រសិទ្ធភាព ដើម្បីដោះស្រាយនូវផលប៉ះពាល់សេដ្ឋកិច្ច និងសង្គម។
កិច្ចប្រជុំ បានបញ្ចប់ ដោយរដ្ឋមន្ត្រីការបរទេសអាស៊ានទាំងអស់ មានប្រសាសន៍បង្ហាញអំពីសាមគ្គីភាព ជាភាសាជាតិរៀងៗខ្លួន ដែលមានអត្ថន័យថា “យើងរួបរួមគ្នា ជាមួយនឹងប្រទេសសមាជិកអាស៊ានទាំងអស់ ដើម្បីប្រយុទ្ធប្រឆាំងនឹងជំងឺកូវីដ១៩”។
បើតាមប្រកាសព័ត៌មានដដែល កិច្ចប្រជុំ សង្ឃឹមថា កិច្ចប្រជុំកំពូលអាស៊ានពិសេស ស្តីពីជំងឺកូវីដ១៩ និងកិច្ចប្រជុំកំពូលអាស៊ានបូកបី ពិសេស ស្តីពីជំងឺកូវីដ១៩ ដែលនឹងប្រព្រឹត្តទៅនៅថ្ងៃទី១៤ ខែមេសា ឆ្នាំ២០២០ តាមរយៈប្រព័ន្ធវីដេអូ នឹងប្រព្រឹត្តទៅប្រកបដោយលទ្ធផលជាផ្លែផ្កា៕
