ឃាត់ខ្លួនជនសង្ស័យចំនួន២នាក់ ក្រោយទទួលបណ្ដឹងពីជនរងគ្រោះ ករណីលួចរថយន្ត
ភ្នំពេញ៖ប៉ុស្តិ៍រដ្ឋបាលនគរបាលទួលទំពូង១ បានទទួលពាក្យបណ្តឹងពីជនរងគ្រោះឈ្មោះ វឹង មួយហួង ភេទស្រី អាយុ៣៥ឆ្នាំ ជនជាតិខ្មែរ មុខរបរ លក់កាហ្វេ មានទីលំនៅផ្ទលេខ១២៨ ផ្លូវ៤៥០ ក្រុម១២ ភូមិ២ សង្កាត់ទួលទំពូងទី១ ខណ្ឌចំការមន រាជធានីភ្នំពេញ ថាបានបាត់រថយន្ត១គ្រឿងម៉ាកតូយូតា ព្រូស ពណ៌ស លេខតួ JTDKB20U667531463 លេខម៉ាស៊ីន1NZU079537 ផ្លាកលេខ ភ្នំពេញ 2AO-7613 នៅចំណុចលើចិញ្ចើមផ្លូវ លេខ៤៥០ មុខផ្ទះខាងលើ ។
បើតាមរបាយការណ៍របស់ស្នងការនគរបាលរាជធានីភ្នំពេញ បានឲ្យដឹងថា នៅថ្ងៃទី១០ ខែកញ្ញា ឆ្នាំ២០២០ វេលាម៉ោង ១៣ និង០០នាទី ដោយឆែកមើលតាមកាម៉ារ៉ាសុវត្ថិភាពឃើញជនសង្ស័យចំនួនប្រហែល២នាក់ មិនស្គាល់អត្តសញ្ញាណជិះរថយន្ត១គ្រឿង ម៉ាកTOYOTAព្រូសពណ៌ស្ក មិនស្គាល់ផ្លាកលេខ មកធ្វើសកម្មភាពលួចយករថយន្តរបស់គាត់ចេញទៅបាត់ ។
ក្រោយពីបានទទួលពាក្យបណ្តឹងរួច កម្លាំងប៉ុស្តិ៍រដ្ឋបាលនគរបាលទួលទំពូង១ សហការជាមួយកម្លាំងជំនាញខណ្ឌចំការមន និង កម្លាំងជំនាញរបស់ស្នងការនគរបាលរាជធានីភ្នំពេញ បានចុះឆែកកាម៉ារ៉ាសុវត្ថិភាពនៅជុំវិញកន្លែងកើតហេតុ ក៏កំណត់បានមុខសញ្ញាជនសង្ស័យ រហូតដល់វេលាម៉ោង១៩ និង០០នាទីថ្ងៃទី១១ ខែកញ្ញា ឆ្នាំ២០២០ នេះ បានធ្វើការឃាត់ខ្លួនបានជនសង្ស័យចំនួនពីរនាក់ ។
ជនសង្ស័យទី១មានឈ្មោះ ឆាយ ម៉ងទីន ភេប្រុសអាយុ២៧ឆ្នាំ ខ្មែរ មានទីលំនៅមិនពិតប្រាកដ។
ជនសង្ស័យទី២ មានឈ្មោះ បាន ប៊ន ភេប្រុស អាយុ២៧ឆ្នាំ មានទីលំនៅមិនពិតប្រាកដ នៅចំនុណបុរី លឹម ឈាងហាក់ ភូមិម័រ សង្កាត់ដង្កោ ខណ្ឌដង្កោ រាជធានីភ្នំពេញ និង ចាប់យកវត្ថុតាងរថយន្តបាន២គ្រឿង ម៉ាកតូយូតាព្រូស ពណ៌ស និងពណ៌ស្ក ដែលជនសង្ស័យលួចបាននោះមកវិញ ។
បច្ចុប្បន្នជនសង្ស័យទាំងពីរនាក់ខាងលើ និង វត្ថុតាងរថយន្តទាំពីគ្រឿង មានផ្លាកលេខដូចក្នុងរូបថត បាននាំមកកាន់អធិការដ្ឋាននគរបាលខណ្ឌចំការមន ដើម្បីកសាងសំណុំរឿងបញ្ជូនទៅតុលាការរាជធានីភ្នំពេញ ដើម្បីចាត់ការតាមច្បាប់៕
