ស្ថានទូតជប៉ុន ៖ ទីភ្នាក់ងារស្វែងរកការងារមួយកន្លែង តម្រូវអោយអ្នកដាក់ពាក្យ បង់ប្រាក់កម្រៃជើងសា
ភ្នំពេញ ៖ ស្ថានទូតជប៉ុន បានបញ្ជាក់ថា ថ្មីៗនេះមានករណីមួយបានកើតឡើង ដោយមានទីភ្នាក់ងារស្វែងរកការងារមួយកន្លែង តម្រូវអោយអ្នកដាក់ពាក្យ បង់ប្រាក់កម្រៃជើងសា ដើម្បីទទួលបានឱកាសការងារនៅការិយាល័យកុងស៊ុលជប៉ុនប្រចាំខេត្តសៀមរាប ។
នៅរសៀលថ្ងៃទី១០ វិច្ឆិកា ២០២០នេះ តាមរយៈផេកផ្លូវការ នៃស្ថានទូតជប៉ុន ប្រចាំនៅព្រះរាជាណាចក្រកម្ពុជា បានជូនដំណឹងដល់សាធារណជនទាំងអស់ឲ្យបានជ្រាបថា រាល់ការជ្រើសរើសបុគ្គលិករបស់ស្ថានទូតជប៉ុន នៅរាជធានីភ្នំពេញ និងការិយាល័យកុងស៊ុល នៅខេត្តសៀមរាប មិនដែលធ្វើតាមរយៈក្រុមហ៊ុន ឬទីភ្នាក់ងារស្វែងរកការងារទេ ។
សូមជម្រាបថា រាល់ព័ត៌មានទាំងអស់ មានផ្សព្វផ្សាយតែលើគេហទំព័រស្ថានទូត និងទំព័រហ្វេសប៊ុកផ្លូវការរបស់ស្ថានទូតជប៉ុនប្រចាំកម្ពុជាតែប៉ុណ្ណោះ ។
អាស្រ័យដូច្នេះ សូមអ្នកទាំងអស់គ្នាប្រុងប្រយ័ត្ន ដើម្បីចៀសវាងការខាតបង់ដោយប្រការណាមួយ ៕