មន្រ្តីជាន់ខ្ពស់ក្រសួងកសិកម្ម ពន្យល់ជុំវិញការធ្លាក់ចុះតម្លៃស្រូវក្នុងស្រុកដែលជាកង្វល់របស់ប្រជាពលរដ្ឋ
ភ្នំពេញ៖ លោក ងិន ឆាយ ប្រតិភូរាជរដ្ឋា ភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម នៅថ្ងៃទី២៦ វិច្ឆិកានេះ បានពន្យល់ជុំវិញការធ្លាក់ចុះតម្លៃស្រូវក្នុងស្រុកដែលជាកង្វល់របស់ប្រជាពលរដ្ឋ ខណៈក្រសួងក៏ដូចជាស្ថាប័នពាក់ព័ន្ធ កំពុងធ្វើការរួមគ្នាលើ បញ្ហានេះ ដើម្បីស្វែងរកដំណោះស្រាយជូនកសិករ។
ក្នុងសន្និសីទសារព័ត៌មានដែលរៀបចំដោយអង្គភាពអ្នកនាំពាក្យរាជរដ្ឋាភិបាល ស្ដីពី «កិច្ចអន្ដរាគមន៍ឆ្លើយតបនឹងស្ដារឡើងវិញ បន្ទាប់ពីគ្រោះមហន្ដរាយទឹកជំនន់ ក្នុងផលិតកម្មកសិកម្ម» នៅថ្ងៃទី២៦ វិច្ឆិកា នាទីស្តីការគណះរដ្ឋមន្រ្តី លោក ងិន ឆាយ បានបញ្ជាក់ថា ការធ្លាក់ចុះតម្លៃស្រូវ គឺបណ្ដាលមកពីកត្តាជាច្រើន ក្នុងនោះរួមមាន៖ កត្តាផ្គត់ផ្គង់ និងកត្ដាតម្រូវការ, កត្តាទីផ្សារ, កត្តាអាកាសធាតុ និងកត្តាគុណភាព ទើបបណ្ដាលឲ្យតម្លៃស្រូវមានការប្រែប្រួល។
បេីតាមលោក ងិន ឆាយ បានគូសបញ្ជាក់ថា ជារៀងរាល់ឆ្នាំឲ្យតែដល់រដូវប្រមូលផលស្រូវ គឺតម្លៃតែងតែមានការធ្លាក់ចុះ ព្រោះការផ្គត់ផ្គង់មានច្រើន ហើយការប្រមូលទិញមិនអស់ ឬការកែច្នៃសម្រាប់ការនាំចេញមិនអស់លទ្ធភាព។
តែទោះបីយ៉ាងនេះក្តីលោក បានបន្ថែមថា ក្រសួងកសិកម្ម នឹងព្យាយាមសម្របសម្រួល ជាពិសេសក្រសួងត្រូវធ្វើការជាមួយសហព័ន្ធស្រូវអង្ករ និងក្រសួងពាណិជ្ជកម្ម។
លោកបន្តថា មន្ដ្រីជំនាញ បានសម្របសម្រួលជាមួយអ្នកដែលប្រមូលទិញ សូមព្យាយាមជួយទិញកសិករឲ្យបានច្រើន ហើយកុំទម្លាក់ថ្លៃខ្លាំងពេក ទោះបីស្រូវរបស់គាត់មានគុណភាពដោយសារកត្តាអាកាសធាតុបន្ដិចបន្ទួចក៏ដោយ៕ សំរិត