ប្រណាំងគ្មានគូរ បុករះពន្លះរបងផ្ទះគេ របួសធ្ងន់២នាក់

ភ្នំពេញ÷បុរសម្នាក់បើករថយន្តក្នុងល្បឿន បួងចង្កូតឆ្លងផ្លូវបុកម៉ូតូមួយគ្រឿង រួចបន្តទៅបុករះកូនឈើ និងរបងដែកបាក់មួយផ្ទាំងទៅមុខលែងរួច បណ្តាលឲ្យរងរបួសធ្ងន់២នាក់ នៅវេលាម៉ោង ១០ព្រឹក ថ្ងៃអង្គារទី៨ ខែធ្នូ ឆ្នាំ ២០២០ ស្ថិតនៅតាមបណ្តោយផ្លូវ ហាណូយ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភពព័ត៌មានបន្តពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញម៉ូតូម៉ាក ស្គុប ពី ពណ៌ស មួយគ្រឿងដែលពាក់ផ្លាកលេខ ភ្នំពេញ 1TH 55 45 ជិះឌុបគ្នាពីរនាក់ ធ្វើដំណើរតាមបណ្តោយផ្លូវ ហាណូយ ក្នុងទិសដៅ ពីជើងមកត្បូងក្នុងល្បឿនមធ្យម ខណៈមកដល់ចំណុចកើតហេតុខាងលើ ក៏ត្រូវបានរថយន្តស៊េរីទំទើបមួយគ្រឿង ដែលពាក់ផ្លាកលេខ 2V 81 46
បើកបរដោយបុរសម្នាក់ធ្វើដំណើរ ក្នុងទិសដៅបញ្រ្ចាសគ្នា ពីត្បូងមកជើងក្នុងល្បឿនលឿន ឆ្លងផ្លូវមកបុកចំពីមុខម៉ូតូពេញទំហឹង បណ្តាលឲ្យម្ចាស់ម៉ូតូ និងអ្នករួមដំណើរ រងរបួសធ្ងន់ស្រាលបញ្ជូនទៅមន្ទីរពេទ្យ រួចបន្តបើកទៅមុខឡើងខឿន ទៅបុករះដើមឈើ និងបុករបងដែកបាក់អស់មួយផ្ទាំង ចំណែករថយន្តវិញ រងការខូចខាតផ្ទៃខាងមុខស្ទើរទាំងស្រុង ។

ប្រភពបន្តែមពីសមត្ថកិច្ច បានបន្តថា ក្នុងករណីគ្រោះថ្នាក់ចរាចរណ៍នេះ មិនបណ្តាលឲ្យមាននរណាម្នាក់ បាត់បង់ជីវិតនោះឡើយ គឺគ្រាន់តែរងរបួសទាំងជនរងគ្រោះ៕