រកឃើញបុគ្គលិកស្រីនៅហាងលក់សម្លៀកបំពាក់ Pedro ម្នាក់ទៀត រស់នៅសង្កាត់ព្រែកឫស្សី ឆ្លងជំងឺកូវីដ១៩

ភ្នំពេញ៖ ក្រសួងសុខាភិបាល នៅយប់ថ្ងៃទី៨ ខែធ្នូនេះ បានរកឃើញបុគ្គលិកស្រីនៅហាងលក់សម្លៀកបំពាក់  Pedro ម្នាក់ទៀត រស់នៅសង្កាត់ព្រែកឫស្សី ក្រុងតាខ្មៅ ឆ្លងជំងឺកូវីដ១៩។

ស្រ្តីរូបនោះ ត្រូវក្រុមគ្រូពេទ្យ បញ្ជូនទៅសម្រាកព្យាបាលនៅមន្ទីរពេទ្យចាក់អង្រែ ហើយដោយឡែកគ្រួសាគាត់១៣នាក់ផ្សេងទៀត ត្រូវបញ្ជូនមកសម្រាកព្យាបាលជំងឺនៅមន្ទីរពេទ្យជ័យជំនះខេត្ត ដើម្បីយកសំណាក និងចត្តាឡីស័ក១៤ ថ្ងៃ។ សូមរង់ចាំការប្រកាសជាផ្លូវការរបស់ក្រសួងសុខាភិបាលនៅថ្ងៃស្អែក និងជូនពរអ្នកទាំងអស់គ្នាចៀសផុតពីកូវីដ រួមគ្នាបំផ្លាញចោលព្រឹត្តិការណ៍ សហគមន៍ ២៨ វិច្ឆិកា ជាមួយរាជរដ្ឋាភិបាលរបស់យើង។

សូមបញ្ជាក់ថា ក្រសួងសុខាភិបាល នៅព្រឹកថ្ងៃទី៨ ខែធ្នូ ឆ្នាំ២០២០នេះ បានចេញសេក្តីប្រកាសព័ត៌មាន បញ្ជាក់ពីការរកឃើញអ្នកឆ្លងកូវីដ១៩ ថ្មីចំនួន២នាក់ថែមទៀត ដែលបានទៅហាង Zando និង Pedro ។

អ្នកទាំង២នាក់ដែលឆ្លងកូវីដ១៩ គឺ ទី១៖ បុរសជនជាតិខ្មែរ ឈ្មោះ ស្រៀន គីមស៊្រុន អាយុ២២ឆ្នាំ ស្នាក់នៅសង្កាត់វត្តភ្នំ ខណ្ឌដូនពេញ ជានិស្សិតច្បាប់នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានទៅហាង Zando បឹងកេងកង នៅថ្ងៃទី២៧ ខែវិច្ឆិកា ឆ្នាំ២០២០។ លទ្ធផលធ្វើតេស្តលើសំណាកបុរសនេះ ផ្តល់ដោយវិទ្យាស្ថានប៉ាស្ទ័រកម្ពុជា គឺវិជ្ជមានវីរុសកូវីដ១៩ ហើយបច្ចុប្បន្ន អ្នកជំងឺត្រូវបានដាក់ឲ្យសម្រាកព្យាបាល នៅមណ្ឌលសុខភាពចាក់អង្រែ។ ២៖ ស្ត្រីជនជាតិខ្មែរ ឈ្មោះ អៀម ធីតា អាយុ៣៥ឆ្នាំ ស្នាក់នៅសង្កាត់បឹងទំពន់ ខណ្ឌមានជ័យ បានទៅហាង Pedro នៅថ្ងៃទី២៧ ខែវិច្ឆិកា ឆ្នាំ២០២០។ លទ្ធផលធ្វើតេស្តវត្ថុសំណាក របស់បុគ្គលនេះ ផ្តល់ដោយវិទ្យាស្ថានប៉ាស្ទ័រកម្ពុជា គឺវិជ្ជមានវីរុសកូវីដ១៩ ហើយបច្ចុប្បន្នអ្នកជំងឺត្រូវបានដាក់ឲ្យសម្រាកព្យាបាល នៅមណ្ឌលសុខភាពចាក់អង្រែ។

សម្រាប់លទ្ធផលធ្វើតេស្តអ្នកប៉ះពាល់ក្នុងព្រឹត្តិការណ៍ សហគមន៍២៨វិច្ឆិកា នៅថ្ងៃទី៧ ខែធ្នូ ឆ្នាំ២០២០ វត្ថុសំណាកដែលនៅសល់ពីថ្ងៃទី៦ ធ្នូ ចំនួន២២៨ សំណាក បូកបន្ថែមចំនួនវត្ថុសំណាកទទួលបានបន្ថែមពីខេត្ត និងរាជធានីភ្នំពេញ ដែលធ្វើតេស្តលើកទី២ សម្រាប់ ព្រឹត្តិការណ៍សហគមន៍ ២៨វិច្ឆិកា សុរបមានចំនួន ២៤៨៣សំណាក់ ត្រូវបានធ្វើតេស្តវិភាគដោយវិទ្យាស្ថានប៉ាស្ទ័រកម្ពុជា គឺមានលទ្ធផលវិជ្ជមានវីរុសកូវីដ១៩ ថ្មីចំនួន២នាក់ ដែលជាអ្នកជំងឺខាងលើ ។ ដោយឡែកមាននៅវត្ថុសំណាកចំនួន ១៦០៥សំណាកផ្សេងទៀត ដែលត្រូវវិភាគបន្តនៅថ្ងៃទី៨ធ្នូនេះ។

សូមជម្រាបថា គិតត្រឹមម៉ោង៧ព្រឹកថ្ងៃទី៨ ខែធ្នូនេះ បានរកឃើញអ្នកឆ្លងកូវីដ១៩ ចំនួន៣៥០នាក់ ក្នុងនោះព្យាបាលជាសះស្បើយ ចំនួន៣០៧នាក់ និងកំពុងសម្រាកព្យាបាលនៅមន្ទីរពេទ្យចំនួន៤៣នាក់៕