ករណីយុវតីម្នាក់ត្រូវគេចាប់យកទៅបង្ខាំងទុកបីថ្ងៃ នគរបាលខណ្ឌដង្កោអះអាងជារឿងប្រឌិត ព្រោះនាងបាត់ខ្លួនចេញពីផ្ទះបីថ្ងៃ
ភ្នំពេញ ៖ ករណីយុវតីសិស្សវិទ្យាល័យទួលអំពិលថា ត្រូវបានក្រុមមិនស្គាល់មុខចាប់ជំរិតនោះ ត្រូវកម្លាំងសមត្ថកិច្ចក្រសួងមហាផ្ទៃ សហការជាមួយអគ្គស្នងការនគរបាលជាតិ ចុះស្រាវជ្រាវដោយបានអះអាងថា ក្មេងស្រីរូបនេះ បានបាត់ខ្លួនចេញពីផ្ទះ អស់រយៈពេល៣ថ្ងៃ ហើយពេលវិលត្រឡប់មកវិញ បាននិយាយភូតកុហកឪពុកម្តាយ ថាមានគេចាប់ខ្លួនយកទៅបង្ខាំង ហើយម្យ៉ាងទៀត រហូតមកដល់ពេលនេះ មិនមានពាក្យប្តឹង របស់ឪពុកម្តាយក្មេងផ្សេងទៀត ថាបាត់កូនខ្លួននោះទេ ។
ក្រោយពេលលេចឮព័ត៌មានផ្សព្វផ្សាយថា មានករណីជនមិនស្គាល់មុខមួយក្រុម បានចាប់យុវតីសិស្សវិទ្យាល័យទួលអំពិល កាលពីរសៀលថ្ងៃទី៣ ខែសីហាឆ្នាំ២០១៨ ស្ថិតនៅផ្លូវ៥០ម៉ែត្រ ភូមិពាម សង្កាត់ព្រៃស ខណ្ឌដង្កោ ដែលបានអះអាង ពីឪពុកបង្កើតរបស់យុវតីរងគ្រោះ តាមការរៀបរាប់ពីកូនស្រីរបស់គាត់។
បន្ទាប់ពីទទួលបានព័ត៌មានថា មានករណីចាប់បង្ខាំងក្មេងស្រីជាង១០នាក់ យកទៅលាក់ទុកក្នុងផ្ទះមួយកន្លែង នៅខណ្ឌចំការមន ។ ប៉ុន្តែនៅថ្ងៃទី៧ ខែសីហា ឆ្នាំ២០១៨ កម្លាំងសមត្ថកិច្ចក្រសួងមហាផ្ទៃ សហការជាមួយអគ្គស្នងការនគរបាលជាតិ នៃស្នងការនគរបាលរាជធានីភ្នំពេញ និងរួមសហការជាមួយកម្លាំងនគរបាលខណ្ឌដង្កោ ព្រមទាំងកម្លាំងអាវុធហត្ថ បានបើកការស្រាវជ្រាវយ៉ាងយកចិត្តទុកដាក់បំផុត និងបានប្រមូលពាក្យបណ្តឹងតាមបណ្តាប៉ុស្តិ៍នគរបាលរដ្ឋបាលទាំង២៥ខេត្ត ក្រុង គឺពុំមានបានទទួលបណ្តឹងពីអាណាព្យាបាលក្មេងស្រីជាង១០នាក់ផ្សេងទៀត ដែលបានបាត់កូនរបស់ខ្លួននោះទេ ។ ដូច្នេះការរៀបរបស់យុវតី ស៊ុ ណាវិន ដែលថា មានយុវតីជាង១០នាក់ ដែលជនមិនស្គាល់មុខបង្ខាំងទុក យកទៅលក់នោះដូចជា រឿងប្រឌិត ដើម្បីឆ្លើយយករួចខ្លួនពីឪពុកម្តាយរបស់នាង ដែលខ្លួនបានបាត់ពីផ្ទះអស់រយៈពេល៣ថ្ងៃ ក្រែងឪពុកម្តាយរករឿងទើបនាងឆ្លើយដូច្នេះ។
ទោះជាយ៉ាងណា ឪពុកយុវតីខាងលើនោះ នៅតែអះអាងថា កូនស្រីគាត់ ត្រូវគេចាប់ញាត់ចូលរថយន្ត ដឹកយកទៅបង្ខាំងទុកជាមួយក្មេងស្រី១០នាក់ផ្សេងទៀត ហើយរូបគាត់ក៏បាននាំសមត្ថកិច្ច ទៅចង្អុលចំណុច ដែលពួកជនសង្ស័យ ចាប់កូនរបស់គាត់។
ទោះជាយ៉ាងណា រឿងនេះជាការពិត ឬជាការប្រឌិតនោះ សមត្ថកិច្ចនៅតែបន្តការស្រាវ រង់ចាំយុវតីខាងលើចេញពីមន្ទីរពេទ្យ ដោយសារតែពេលនេះ នាងកំពុងតែសម្រាកព្យាបាលនៅមន្ទីរពេទ្យ ព្រោះអាការៈរបស់យុវតីរងគ្រោះនេះ ពុំទាន់បានធូរស្បើយនៅឡើយ ៕
