អាជ្ញាធរនិងមន្ទីរកសិកម្ម បានអំពាវនាវដល់ឈ្មួញ ជួយរកទីផ្សារ ទិញបន្លែគ្រប់ប្រភេទពីកសិករ ដែលពួកគាតដាំបាន
ត្បូងឃ្មំ៖ មន្ដ្រី នៃមន្ទីរកសិកម្ម រួមជាមួយ មន្ដ្រី អាជ្ញាធរខេត្តត្បូងឃ្មុំ បានចុះពិនិត្យ ជួយផ្សព្វផ្សាយ និងជួយរកដំណោះស្រាយបញ្ហាប្រមូលទិញត្រសក់ ដោយអំពាវនាវដល់ អ្នកពាក់ព័ន្ធ ជួយសហការស្វែងរកទីផ្សារ ដើម្បីជួយសម្រួលជីវភាពរបស់ប្រជាកសិករ ដែលពួកគាតកំពុងដាំបន្លែធម្មជាតិគ្រប់មុខ ទទួលបានផលល្អច្រើន ជាងឆ្នាំមុនៗ ។ ដំណើរចុះពិនិត្យនេះ បានប្រព្រឹត្ដទៅកាលពីថ្ងៃទី១៨ ធ្នូ ឆ្នាំ២០២០ ដោយ មានការចូលរួមពីលោក ជាម ច័ន្ទសោភ័ណ អភិបាលខេត្តត្បូងឃ្មុំ និងលោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ និងមន្ដ្រីជំនាញពាក់ព័ន្ធជាច្រើនទៀតផងដែរ ។
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានមានប្រសាសន៍ថា៖ ដើម្បីជួយដោះស្រាយបញ្ហាត្រសក់ជន់ជោរ ខ្វះទីផ្សារ នេះ លោក ជាម ច័ន្ទសោភ័ណ អភិបាលខេត្តត្បូងឃ្មុំ ក៏បានស្នើរឲ្យមន្ទីរ អង្គភាពជំនាញជុំវិញខេត្ត ជួយផ្សព្វផ្សាយ បន្ដដល់ឈ្មួញរកស៊ី និងអ្នក ដែលពាក់ព័ន្ធទាំងអស់ សូមសហការគ្នាជួយរកទីផ្សារជូនប្រជាកសិករដែលដាំដំណាំត្រសក់ និងបន្លែគ្រប់ប្រភេទ ឱ្យមានទីផ្សារសម្រាប់លក់បានតម្លៃសមរម្យ ដើម្បីសម្រួលដល់ជីវភាពរបស់ពួកគាត់ ។
លោកបន្តថា ជំហានដំបូងនេះ មន្ទីរកសិកម្ម និងស្ថាប័នពាក់ព័ន្ធទាំងអស់ កំពុងរកអ្នកបញ្ជាទិញក្នុងតម្លៃមួយសមរម្យ ជាការលើកទឹកចិត្តកសិករឱ្យខិតខំដាំដំណាំបន្ថែមទៀត ប៉ុន្តែត្រូវផ្លាស់ប្តូរមុខបន្លែ ដោយជ្រើស រើសយកប្រភេទបន្លែមានទីផ្សារ ទទួលបានតម្លៃខ្ពស់ រក្សាទុកបានយូរ ចៀសវាងការដាំបន្លែដដែលៗជាន់គ្នា ដែលធ្វើឱ្យប៉ះពាល់ដល់តម្លៃនិងទីផ្សារ បច្ចុប្បន្ន ។
ទាក់ទងនឹងទីផ្សារ គឺមន្ទីរបាននិងកំពុងទំនាក់ទំនងទៅអ្នកបញ្ជាទិញមួយចំនួន និងទីផ្សារធំៗ ហើយ ហើយបានពន្យល់ណែនាំដល់ពួកគាត់នៅក្នុងក្រុមឱ្យចេះធ្វើទីផ្សារ គឺថា ចេះយក កសិផល នៅក្នុងស្រុករបស់ខ្លួន ទៅលក់នៅលើទីផ្សារតូច.ធំដោយក្នុងសមរម្យជាដំបូងនៅពេលអ្នកទិញយកទៅពិសារឃើញថារបស់ធម្មជាតិគេនិងផ្សព្វផ្សាយបន្ដរួចយើងទើបពង្រីកតម្លៃ ។ ទន្ទឹមគ្នានឹងកំពុងរកអ្នកបញ្ជាទិញធំៗ ហើយ ក្រុមផលិតហ្នឹង ត្រូវចេះប្រជុំពង្រឹងគ្នា រៀបចំផែន ការដាំ ទាំងប្រភេទដំណាំត្រូវដាំ ទាំងពេលវេលា ដែលត្រូវចាប់ផ្ដើមដាំ ធ្វើយ៉ាងណាកុំឱ្យពិបាករកទីផ្សារ ។
សូមបញ្ជាក់ថា៖ ក្នុងពេលចុះពិនិត្យបន្លែធម្មជាតិរបស់ប្រជាកសិករនេះដែរលោក ជាម ច័ន្ទសោភ័ណ និងលោកស្រី ក៏បានឧបត្ថម្ភថវិកាផ្ទាល់ខ្លួន ជូនដល់កសិករដាំត្រសក់ដែលកំពុងរងផលប៉ះពាល់ពីតម្លៃ នៅស្រុកក្រូចឆ្មារ ខេត្តត្បូងឃ្មុំ ចំនួន៣៩គ្រួសារ ដោយក្នុង១គ្រួសារៗ ទទួលបានថវិកាចំនួន៥០០,០០០ រៀល និងបានជួយទិញត្រសក់ចំនួន៤តោន ចែកជូន
នគរបាល កងរាជអាវុធហត្ថ កងទ័ព កងពលលេខ២១ ពន្ធនាគារ និងសម្រាប់ ចែទៅមន្ទីរពេទ្យបង្អែកនានា នៅក្នុងខេត្ដផងដែរ៕. សំរិត
