រថយន្តម៉ាកព្រូស បុកបង្កាន់ដៃស្ពានអាកាសផ្សារដីហុយ ខ្ទេចផ្នែកខាងមុខទាំងស្រុង
ភ្នំពេញ ៖ បុរសម្នាក់បើករថយន្តព្រូសក្នុងល្បឿនលឿនបុករបាំងថ្មបង្កាន់ដៃគល់ស្ពានអាកាសផ្សាដីហុយ បណ្តាលឲ្យរថយន្តរងការខូចខាតផ្ទៃខាងមុខទាំងស្រុង នៅវេលាម៉ោង ១១ និង៥០នាទីយប់ ថ្ងៃទី ១៨ ខែមករា ឆ្នាំ ២០២១ ស្ថិតនៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់ទឹកអូបែកក្អម ខណ្ឌសែនសុខ រាជធានីភ្នំពេញ។
មុនពេលកើតហេតុមានរថយន្តម៉ាកព្រូស ពណ៌ទឹកប្រាក់មួយគ្រឿងពាក់ផ្លាកលេខ ភ្នំពេញ2-BJ-4201 បើកបរដោយបុរសម្នាក់ធ្វើដំណើរតាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចមកកើតក្នុងល្បឿនយ៉ាងលឿនខណៈមកដល់ចំណុចកើតហេតុ បានរេចង្កូតទៅបុករបាំងថ្មបង្កាន់ដៃស្ពាន អាកាសផ្សារដីហុយ ពេញទំហឹងបណ្តាលឲ្យរថយន្តខ្ទេចផ្ទៃខាងមុខស្ទើរទាំងស្រុង។ សំណាងល្អក្នុងករណីគ្រោះថ្នាក់ចរាចរណ៍នេះ មិនបង្កឲ្យប៉ះពាល់ទៅដល់ភាគីដទៃនោះទេ រងការខូចខាតតែរថយន្តនិងបង្កាន់ដៃស្ពានតិចតួច។ សមត្ថកិច្ចចរាចរណ៍ជំនាញខណ្ឌទួលគោក បានយករថយន្តទៅរក្សាទុក នៅស្នងការនគរបាលចរាចរណ៍រាជធានីភ្នំពេញ ជាបណ្តោះអសន្ន ៕
