លោក ស សុខា ៖កីឡាករ-កីឡាការិនីវ័យក្មេងត្រូវខំប្រឹងឲ្យខ្លាំងចេញពីខ្លួនយើងទើបអាចកែប្រែវាសនាខ្លួនឲ្យត្រដែតដូចវីរកីឡាការិនី កែ ឡេង អ៊ុក ស្រីមុំ និងស្រ៊ាង សូរ៉ាឃីម
ភ្នំពេញ៖ក្រុមកីឡាករ-កីឡាការិនីប៉េតង់ចំនួន៣៥០នាក់ចូលរួមព្រឹត្តិការណ៍ការប្រកួតកីឡាប៉េតង់ ជ្រើសរើសជើងឯកថ្នាក់ជាតិប្រចាំឆ្នាំ២០២០រយៈពេល៣ថ្ងៃចាប់ពីថ្ងៃទី២៩ ដល់ថ្ងៃទី៣១ ខែមករា ឆ្នាំ២០២១ នៅទីលានសហព័ន្ធនៃពហុកីឡដ្ឋានជាតិអូឡាំពិក រៀបចំឡើងដោយសហព័ន្ធកីឡាប៊ូល និងប៉េតង់កម្ពុជាប្រើប្រាស់ថវិកាគាំទ្ររបស់ក្រសួងអប់រំ យុវជន និងកីឡា។
ក្នុងឳកាសបើកការប្រកួតជាផ្លូវការនាព្រឹកថ្ងៃទី២៩ ខែមករា ឆ្នាំ២០២១អញ្ជើញចូលរួមពីសំណាក់លោក ស សុខា រដ្ឋលេខាធិការក្រសួងអប់រំ យុវជន និងកីឡា និងប្រធានសហព័ន្ធកីឡាប៊ូល និងប៉េតង់កម្ពុជា និងប្រធានសមាគម-ក្លិបកីឡាប៊ូលនិងប៉េតង់ នៅតាមក្រសួង ស្ថាប័ន រាជធានី-ខេត្ត។
លោក សូម៉ៃ សុខគា អគ្គលេខាធិការរងនៃសហព័ន្ធកីឡាប៊ូល និងប៉េតង់កម្ពុជាបានប្រាប់ឲ្យដឹងថា ការប្រកួតឆ្នាំនេះមានគណៈប្រតិភូចំនួន៥០នាក់ គ្រូបង្វឹកចំនួន៥២នាក់ និងក្រុមកីឡាករ-កីឡាការិនីប៉េតង់ចំនួន៣៥០នាក់សរុបចំនួន៤៥២នាក់ ។ វិញ្ញាសាវិញមានចំនួន៦ រួមមាន៖ ១-វិញ្ញាសាបុរស ៣នាក់ទល់៣នាក់ (ពានធំ) ,វិញ្ញាសានារី ៣នាក់ទល់៣នាក់, យុវជនអាយុ១៨ឆ្នាំចុះ ៣នាក់ទល់៣នាក់ (ឆ្នាំកំណើតពីឆ្នាំ២០០២), យុវនារីអាយុ១៨ឆ្នាំចុះ ២នាក់ទល់២នាក់ (ឆ្នាំកំណើតពីឆ្នាំ២០ ០២), យុវជនអាយុ១៥ឆ្នាំចុះ ១នាក់ទល់១នាក់ (ឆ្នាំកំណើតពីឆ្នាំ២០០៥) និងវិញ្ញាសា អាយុ១៥ឆ្នាំចុះ ១នាក់ទល់១នាក់ (ឆ្នាំកំណើតពីឆ្នាំ២០០៥)។
លោក ស សុខា បានមានប្រសាសន៍ថា សូមឲ្យការប្រកួតពានរង្វាន់ថ្នាក់ជាតិនេះប្រកបដោយតម្លាភាព សុក្រឹតភាព និងប្រកបដោយលក្ខណៈបច្ចេកទេសពិតៗ ជាពិសេសការកាត់សេចក្ដីមិនលម្អៀងតាមរយៈខ្សែនោះឡើយ ព្រោះថា បើយកខ្សែអត់មានសមត្ថភាពទៅប្រកួតលើឆាកអន្តរជាតិ និងធ្វើមិនបានល្អ ច្បាស់ជាខ្មាស់គេហើយ។ យើងត្រូវប្រកួតឲ្យអស់សមត្ថភាព ហាមយោគយល់គ្នា ឬប្រកួតលំៗ ទោះស្គាល់គ្នាក្ដី ព្រោះថាលទ្ធផល ឈ្នះលំៗ ដែលដៃគូម្ខាងទៀត បន្ធូរ=jyមិនអាចយកទៅប្រជែងលើឆាកអន្តរជាតិបានទេ។
លោកបានបន្តថ កីឡាករ-កីឡាការិនីវ័យក្មេងក៏ត្រូវប្រឹងឲ្យខ្លាំងដូចគ្នា ឬអាចនិយាយបានថា ការប្រកួតលើកនេះ អាចកែប្រែវាសនាខ្លួនឲ្យត្រដែតដូចវីរកីឡាការិនី កែ ឡេង អ៊ុក ស្រីមុំ និងស្រ៊ាង សូរ៉ាឃីម។ ការខំប្រឹងចេញពីខ្លួនយើង គឺមានតម្លៃណាស់ ហើយសូមមើលគន្លងវីរកីឡាការិនី កែ ឡេង មានជីវិតតស៊ូមកពីខេត្តរហូតក្លាយជាវីរនារីល្បីឈ្មោះប្រចាំប្រទេសរបស់យើង និងឈ្នះជើងឯកពិភពលោក៤សម័យ រួមទាំងមេដាយកម្រិតអាស៊ីជាច្រើនទៀត៕
