លោក ប៉ាន សូរស័ក្តិ៖ជំរុញកីឡាករ-កីឡាការិនីពង្រឹងសមត្ថភាពឆ្ពោះទៅព្រឹត្តិការណ៍ SEA GAMES លើកទី៣២ ឆ្នាំ២០២៣
កណ្ដាល៖កាលពីរសៀលថ្ងៃទី៣១ ខែមករា ឆ្នាំ២០២១ ការប្រកួតកីឡាទូកប្រពៃណីខ្នាតអន្តរជាតិ “ទូកនាគ” ទូកកានូ-កាយ៉ាក់ និងទូករ៉ូអ៊ីងជ្រើសរើសជើងឯកថ្នាក់ជាតិ២០២០ “និងពានរង្វាន់សម្តេចក្រឡាហោម ស ខេង លើកទី៧ ឆ្នាំ២០២០” ត្រូវបានបញ្ចប់ដោយជោគជ័យដោយមានអញ្ជើញចូលរួមឯកឧត្តមប៉ានសូរស័ក្តិរដ្ឋមន្ត្រីក្រសួងពាណិជ្ជកម្មនិងជាអនុប្រធានទី១សហព័ន្ធកីឡាទូកកានូ និងរ៉ូអ៊ីងកម្ពុជា នៅទីក្រុងតាខ្មៅខេត្តកណ្ដាល ។
ឯកឧត្តមប៉ានសូរស័ក្តិបានមានប្រសាសន៍ថាបានសម្ដែងនូវការកោតសរសើរថ្លែងអំណរគុណនិងវាយតម្លៃខ្ពស់ចំពោះកិច្ចសហការយ៉ាងល្អពីគ្រប់ភាគីពាក់ព័ន្ធដែលបានខិតខំប្រឹងប្រែងយកអស់កម្លាំងកាយចិត្តប្រកបដោយស្មារតីទទួលខុសត្រូវខ្ពស់ក្នុងការរៀបចំព្រឹត្តិ
ការណ៍ប្រកួតនេះប្រកបដោយភាពរលូននិងទទួលបានជោគជ័យ។លោករដ្ឋមន្ត្រីបានជំរុញឲ្យកីឡាករខិតខំពង្រឹងសមត្ថភាពឆ្ពោះទៅព្រឹត្តិការណ៍SEA GAMES ២០២៣ និងបានផ្តល់អនុសាសន៍គន្លឹះមួយចំនួនដើម្បីឲ្យ វិស័យកីឡាទូកកានូ-កាយ៉ាក់ ទូករ៉ូអ៊ីង និងទូកប្រពៃណីខ្នាតអន្តរជាតិ ឬហៅថា “ទូកនាគ” កាន់តែមានការរីកចម្រើន និងទទួលបានជោគជ័យបន្ថែមទៀត។
ឯកឧត្តមអនុប្រធានបន្តថាសហព័ន្ធត្រូវខិតខំបើកវគ្គបណ្តុះបណ្តាលនិងបង្កើនបរិមាណកីឡាករកីឡាការិនីនៅតាមបណ្តាសមាគមកីឡាទូកប្រពៃណីខ្នាតអន្តរជាតិ“ទូកនាគ”ទូកកានូនិងទូករ៉ូអ៊ីងទូទាំងប្រទេសបង្កើតធនធាននិងសម្ភារហ្វឹកហាត់ឲ្យបានគ្រប់គ្រាន់ជាអាទិ៍សមាគមកីឡាទូករាជធានី-ខេត្ត និង ក្រសួងពាក់ព័ន្ធ ចាំបាច់ត្រូវមានទូកផ្ទាល់ខ្លួន ដើម្បីងាយស្រួលក្នុងការហ្វឹកហាត់ ក៏ដូចជាចូលរួម ប្រកួតទាំងថ្នាក់ភូមិភាគ និងថ្នាក់ជាតិ។ ត្រូវពង្រឹងរចនាសម្ព័ន្ធគ្រប់គ្រងផ្ទៃក្នុងរបស់សហព័ន្ធ និងសមាគមកីឡាទូក ទូទាំងប្រទេស ដោយផ្តោតលើការបំពេញមុខងាររបស់គណៈកម្មការជំនាញនីមួយៗប្រកបដោយភាពទទួលខុសត្រូវខ្ពស់និងត្រូវពង្រឹងសមត្ថភាពអាជ្ញាកណ្តាល និងចៅក្រមឲ្យកាន់តែល្អប្រសើរ ទាំងបរិមាណ និងគុណភាព ដើម្បីអាចគ្រប់គ្រង និងរៀបចំការប្រកួតបានគ្រប់កម្រិត។
ការខិតខំស្វែងរកដៃគូសហការ និងក្រុមហ៊ុនឧបត្ថម្ភបន្ថែមទៀត ដើម្បីបង្កើតព្រឹត្តិការណ៍ប្រកួតឲ្យបានកាន់តែច្រើនក្នុងមួយឆ្នាំៗ តាមដែលអាចធ្វើបានគឺកាន់តែប្រសើរ។ជាមួយគ្នានេះត្រូវជំរុញផ្សព្វផ្សាយអំពីព្រឹត្តិការណ៍ប្រកួតនិងសកម្មភាពការងាររបស់សហព័ន្ធឲ្យបានទូលំទូលាយ ដើម្បីទាក់ទាញការគាំទ្រពីវិស័យឯកជន និងសាធារណជនជាតិ និងអន្តរជាតិ ឲ្យកាន់តែច្រើនទៀត៕
